ಕಾಲವನ್ನೇ ಸೋಲಿಸಿದ 'ಮಹಾಶಯ': 193ನೇ ವರ್ಷಕ್ಕೆ ಕಾಲಿಟ್ಟ ಜೊನಾಥನ್!
ಇತಿಹಾಸದ ಪುಟಗಳು ಬದಲಾಗಬಹುದು, ಸಾಮ್ರಾಜ್ಯಗಳು ಉರುಳಬಹುದು, ಆದರೆ ಜೊನಾಥನ್ ಮಾತ್ರ ಅಚಲ. ವಿಶ್ವದ ಅತ್ಯಂತ ಹಳೆಯ ಜೀವಂತ ಭೂಚರ ಪ್ರಾಣಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಈ ಆಮೆ, ಇಂದು ತನ್ನ 193ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುತ್ತಿದೆ.
1832ರಲ್ಲಿ ಜನಿಸಿದ ಜೊನಾಥನ್ ಕೇವಲ ಒಂದು ಪ್ರಾಣಿಯಲ್ಲ, ಬದಲಾಗಿ ಚಲಿಸುವ ಇತಿಹಾಸದ ಭಂಡಾರ. ಈತ ತನ್ನ ಜೀವಿತಾವಧಿಯಲ್ಲಿ ಕಂಡ ಪ್ರಮುಖ ಬದಲಾವಣೆಗಳು ಹಲವು. ಬ್ರಿಟನ್ನ 8 ರಾಜಮನೆತನದ ಆಡಳಿತಗಾರರು ಹಾಗೂ ಅಮೆರಿಕದ 40 ಅಧ್ಯಕ್ಷರ ಅಧಿಕಾರಾವಧಿಯನ್ನು ಈತ ಕಂಡಿದ್ದಾನೆ.
ಎರಡು ಮಹಾಯುದ್ಧಗಳ ಭೀಕರತೆ ಮತ್ತು ಜಗತ್ತು ಶಾಂತಿಯತ್ತ ಮರಳಿದ ಕ್ಷಣಗಳಿಗೆ ಇವನು ಮೂಕಸಾಕ್ಷಿ. ಅಚ್ಚರಿಯೆಂದರೆ, ಈ ಜಗತ್ತಿಗೆ ಬಲ್ಬ್ (Lightbulb) ಪರಿಚಯವಾಗುವ ಮುನ್ನವೇ ಜೊನಾಥನ್ ಜನಿಸಿದ್ದ! ಮೋಟಾರು ಕಾರುಗಳಿಂದ ಹಿಡಿದು ಇಂದಿನ ಕೃತಕ ಬುದ್ಧಿಮತ್ತೆಯವರೆಗಿನ ಎಲ್ಲಾ ಬೆಳವಣಿಗೆಗಳು ಈತನ ಕಣ್ಣೆದುರೇ ನಡೆದಿವೆ. ವಯಸ್ಸಾದರೂ ಕುಂದದ ಗತ್ತು ವಯೋಸಹಜವಾಗಿ ಜೊನಾಥನ್ಗೆ ಈಗ ಕಣ್ಣು ಕಾಣಿಸುವುದಿಲ್ಲ ಮತ್ತು ವಾಸನೆ ಗ್ರಹಿಸುವ ಶಕ್ತಿಯೂ ಕುಂದಿದೆ. ಆದರೆ, ಒಬ್ಬ 'ವೈಸ್ ಓಲ್ಡ್ ಗ್ಯಾಂಗ್ಸ್ಟರ್' ರೀತಿ ತನ್ನ ಪಾಲನೆ ಮಾಡುವವರ ಧ್ವನಿ ಮತ್ತು ಸ್ಪರ್ಶವನ್ನು ಇಂದಿಗೂ ನಿಖರವಾಗಿ ಗುರುತಿಸುತ್ತಾನೆ.
"ಜೊನಾಥನ್ ಸಮಯವನ್ನು ಕೇವಲ ಅಳೆಯುತ್ತಿಲ್ಲ, ಬದಲಾಗಿ ಸಮಯವನ್ನೇ ಗೊಂದಲಕ್ಕೀಡು ಮಾಡುತ್ತಿದ್ದಾನೆ. ನಮ್ಮಲ್ಲಿ ಅನೇಕರು ಬರುವ ಮುನ್ನವೇ ಈತನಿದ್ದ, ಹೋದ ಮೇಲೂ ಈತ ಇರುತ್ತಾನೆ ಎಂಬುದು ಅಚ್ಚರಿಯಾದರೂ ಸತ್ಯ."
ಸೇಂಟ್ ಹೆಲೆನಾ ದ್ವೀಪದ ಈ ಹೆಮ್ಮೆಯ ನಿವಾಸಿಗೆ ಜಗತ್ತಿನಾದ್ಯಂತ ಶುಭಾಶಯಗಳ ಮಹಾಪೂರವೇ ಹರಿಯುತ್ತಿದೆ. ಇತಿಹಾಸವನ್ನು ತನ್ನ ಬೆನ್ನಿನ ಮೇಲೆ ಹೊತ್ತು ಸಾಗುತ್ತಿರುವ ಈ 'ಲಿಜೆಂಡ್' ಇನ್ನೂ ಹಲವು ವರ್ಷ ಬಾಳಲಿ ಎಂಬುವುದೇ ಎಲ್ಲರ ಆಶಯ.
PublicNext
01/04/2026 05:27 pm
ಸಂಬಂಧಿತ ಸುದ್ದಿ
LOADING...
