ಎಬೊಲಾ ಮಹಾಮಾರಿಗೆ ಕಾಂಗೋದಲ್ಲಿ 220 ಮಂದಿ ಬಲಿ
ಜಿನೀವಾ: ಆಫ್ರಿಕಾ ಖಂಡದಲ್ಲಿ ವೇಗವಾಗಿ ಹರಡುತ್ತಿರುವ ಎಬೊಲಾ ಮಹಾಮಾರಿಗೆ ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋ (DRC) ನಲ್ಲಿ 220 ಮಂದಿ ಬಲಿಯಾಗಿದ್ದು, ಸೋಂಕಿತರ ಸಂಖ್ಯೆ 990ಕ್ಕೆ ಏರಿಕೆಯಾಗಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ (WHO) ಮಹಾನಿರ್ದೇಶಕ ಟೆಡ್ರೋಸ್ ಅಧನೋಮ್ ಘೆಬ್ರೆಯೆಸಸ್ ಘೋಷಿಸಿದ್ದಾರೆ.
ಎಬೊಲಾ ವೈರಸ್ ವೇಗವಾಗಿ ಹರಡುತ್ತಿರುವ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಟೆಡ್ರೋಸ್, ವಿಶ್ವದಾದ್ಯಂತ ಇರುವ ದೇಶಗಳು ಈಗಲಾದರೂ ಅಗತ್ಯ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳಬೇಕೆಂದು ಕರೆ ನೀಡಿದ್ದಾರೆ.
ಕಾಂಗೋ ಸರ್ಕಾರದ ಅಂಕಿಅಂಶಗಳ ಪ್ರಕಾರ ಇದುವರೆಗೆ 101 ಪ್ರಕರಣಗಳು ಮಾತ್ರ ದೃಢಪಟ್ಟು, 10 ಸಾವುಗಳು ಸಂಭವಿಸಿವೆ. ಆದರೆ, ವಾಸ್ತವ ಪರಿಸ್ಥಿತಿ ಸರ್ಕಾರಿ ಅಂಕಿಅಂಶಗಳಿಗಿಂತಲೂ ತುಂಬಾ ಗಂಭೀರವಾಗಿದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ. ಈ ಮಾರಕ ವೈರಸ್ ನಿಯಂತ್ರಣಕ್ಕೆ ತರಲು ಕಾಂಗೋ ಆರೋಗ್ಯ ಇಲಾಖೆಯ ಅಧಿಕಾರಿಗಳು ತೀವ್ರ ಪ್ರಯತ್ನ ನಡೆಸುತ್ತಿದ್ದಾರೆ ಎಂದು ತಿಳಿಸಿದರು.
ಈ ತಿಂಗಳ 17 ರಂದು WHO ಎಬೊಲಾ ಕುರಿತು 'ಜಾಗತಿಕ ಸಾರ್ವಜನಿಕ ಆರೋಗ್ಯ ತುರ್ತು ಪರಿಸ್ಥಿತಿ'ಯನ್ನು ಘೋಷಿಸಿತ್ತು. ಇದೇ ವೇಳೆ, ಎಬೊಲಾ ವೈರಸ್ ನೆರೆಯ ಉಗಾಂಡಾಕ್ಕೂ ವ್ಯಾಪಿಸಿದ್ದು, ಅಲ್ಲಿ ಇದುವರೆಗೆ ಐದು ಪ್ರಕರಣಗಳು ದಾಖಲಾಗಿವೆ ಮತ್ತು ಒಬ್ಬರು ಮೃತಪಟ್ಟಿದ್ದಾರೆ ಎಂದು ಮಾಹಿತಿ ನೀಡಿದರು.
ಎಬೊಲಾ ವೈರಸ್ಗೆ ಸಂಬಂಧಿಸಿದಂತೆ, WHO ಅನುಮೋದಿಸಿದ ಯಾವುದೇ ಲಸಿಕೆಗಳು ಅಥವಾ ಚಿಕಿತ್ಸೆಗಳು ಪ್ರಸ್ತುತ ಲಭ್ಯವಿಲ್ಲ ಎಂಬುದು ಕಳವಳಕಾರಿ ಸಂಗತಿ. ಈ ನಿರ್ದಿಷ್ಟ ರೀತಿಯ ವೈರಸ್ ಈ ಹಿಂದೆ ಕೇವಲ ಎರಡು ಬಾರಿ ಮಾತ್ರ ಕಾಣಿಸಿಕೊಂಡಿತ್ತು – 2007ರಲ್ಲಿ ಉಗಾಂಡಾದಲ್ಲಿ ಮತ್ತು 2012ರಲ್ಲಿ ಕಾಂಗೋದಲ್ಲಿ. ಪ್ರಸ್ತುತ ಎಬೊಲಾ ಹರಡುವಿಕೆಯನ್ನು ಸಂಪೂರ್ಣವಾಗಿ ತಡೆಯಲು ವಿಶ್ವ ಆರೋಗ್ಯ ಸಂಸ್ಥೆ ಬದ್ಧವಾಗಿದೆ ಎಂದು ಟೆಡ್ರೋಸ್ ಈ ಸಂದರ್ಭದಲ್ಲಿ ಪುನರುಚ್ಚರಿಸಿದರು.
PublicNext
29/05/2026 05:15 pm
ಸಂಬಂಧಿತ ಸುದ್ದಿ
LOADING...
