ದಿಢೀರ್ ಕುಸಿದ ಮ್ಯಾನ್ಹೋಲ್ ಮುಚ್ಚಳ: ಆಳವಾದ ಚರಂಡಿ ಗುಂಡಿಗೆ ಬಿದ್ದ ಕುದುರೆ - ರಕ್ಷಣೆಗೆ ಮುಗಿಬಿದ್ದ ಸಿಬ್ಬಂದಿ!
ವಡೋದರಾ: ರಸ್ತೆಯಲ್ಲಿ ರಾಜಗಾಂಭೀರ್ಯದಿಂದ ಹೆಜ್ಜೆ ಹಾಕುತ್ತಿದ್ದ ಕುದುರೆಯೊಂದು ಮ್ಯಾನ್ಹೋಲ್ ಮುಚ್ಚಳ ದಿಢೀರ್ ಕುಸಿದ ಪರಿಣಾಮ ಆಳವಾದ ಚರಂಡಿ ಚೇಂಬರ್ನೊಳಗೆ ಬಿದ್ದು ಸಿಲುಕಿಕೊಂಡಿರುವ ಆತಂಕಕಾರಿ ಘಟನೆ ಗುಜರಾತ್ನ ವಡೋದರಾದ ಕಿಸ್ಕೋಲಿ ಸರ್ಕಲ್ ಬಳಿ ಸಂಭವಿಸಿದೆ.
ಕಾಂಕ್ರೀಟ್ನಿಂದ ನಿರ್ಮಿಸಲಾದ ಈ ಆಳವಾದ ಚರಂಡಿ ಗುಂಡಿಯೊಳಗೆ ಕೊಳಕು ನೀರು ಮತ್ತು ಕಸದ ರಾಶಿ ತುಂಬಿದ್ದು, ಅದರ ಮಧ್ಯೆ ಮೂಕಪ್ರಾಣಿ ಸಿಲುಕಿ ಒದ್ದಾಡುತ್ತಿದೆ. ಘಟನೆ ತಿಳಿಯುತ್ತಿದ್ದಂತೆ ಎಚ್ಚೆತ್ತ ತುರ್ತು ಸೇವಾ ಸಿಬ್ಬಂದಿ ಮತ್ತು ಅಗ್ನಿಶಾಮಕ ದಳದ ತಂಡಗಳು ಸ್ಥಳಕ್ಕೆ ದೌಡಾಯಿಸಿದ್ದು, ಯುದ್ಧೋಪಾದಿಯಲ್ಲಿ ರಕ್ಷಣಾ ಕಾರ್ಯಾಚರಣೆ ಆರಂಭಿಸಿವೆ.
ಸ್ಥಳೀಯ ಮಾಧ್ಯಮಗಳು ಹಂಚಿಕೊಂಡಿರುವ ದೃಶ್ಯಗಳ ಪ್ರಕಾರ, ಕಿರಿದಾದ ಕಾಂಕ್ರೀಟ್ ಚೇಂಬರ್ನಿಂದ ಕುದುರೆಯನ್ನು ಸುರಕ್ಷಿತವಾಗಿ ಹೊರತರಲು ಅಗ್ನಿಶಾಮಕ ಸಿಬ್ಬಂದಿ ಹರಸಾಹಸ ಪಡುತ್ತಿದ್ದಾರೆ. ಚರಂಡಿಯ ಆರ್.ಸಿ.ಸಿ (RCC) ಗೋಡೆಯ ಒಂದು ಭಾಗವನ್ನು ಒಡೆದು ಕುದುರೆ ಹೊರಬರಲು ದಾರಿ ಮಾಡಿಕೊಡಲಾಗುತ್ತಿದೆ. ಪ್ರಾಣಿಗೆ ಯಾವುದೇ ಹೆಚ್ಚಿನ ಗಾಯಗಳಾಗದಂತೆ ಎಚ್ಚರಿಕೆ ವಹಿಸಿ, ಹಗ್ಗ ಹಾಗೂ ವಿಶೇಷ ಉಪಕರಣಗಳನ್ನು ಬಳಸಿ ಮೇಲಕ್ಕೆತ್ತಲು ಪ್ರಯತ್ನಿಸಲಾಗುತ್ತಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಈ ಘಟನೆಯ 11 ಸೆಕೆಂಡುಗಳ ವಿಡಿಯೋ ವೈರಲ್ ಆಗಿದ್ದು, ಅದನ್ನು ನೋಡಿದ ಸಾರ್ವಜನಿಕರು ಮರುಗುತ್ತಿದ್ದಾರೆ. ಕಿರಿದಾದ ಮತ್ತು ಕತ್ತಲೆಯಿಂದ ಕೂಡಿದ ಚರಂಡಿ ನೀರೊಳಗೆ ಕುದುರೆಯು ದಿಕ್ಕುತೋಚದೆ ಕಷ್ಟಪಡುತ್ತಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ. ರಕ್ಷಣಾ ಸಿಬ್ಬಂದಿ ಈಗಾಗಲೇ ಕುದುರೆಯ ದೇಹಕ್ಕೆ ಗುಲಾಬಿ ಬಣ್ಣದ ಹಗ್ಗವನ್ನು ಕಟ್ಟಿ ಅದರ ಚಲನವಲನವನ್ನು ನಿಯಂತ್ರಿಸುತ್ತಿದ್ದಾರೆ.
ನಗರದ ಹೃದಯಭಾಗದಲ್ಲೇ ನಡೆದ ಈ ವಿಚಿತ್ರ ಹಾಗೂ ಕರುಣಾಜನಕ ಘಟನೆಯನ್ನು ನೋಡಲು ನೂರಾರು ಸ್ಥಳೀಯರು ಮತ್ತು ಹಾದಿಹೋಕರೇ ಸ್ಥಳದಲ್ಲಿ ನೆರೆದಿದ್ದಾರೆ. ಸದ್ಯ ಕಾರ್ಯಾಚರಣೆ ಪ್ರಗತಿಯಲ್ಲಿದ್ದು, ಕುದುರೆಯನ್ನು ಜೀವಂತವಾಗಿ ಹೊರತರುವ ಎಲ್ಲ ಪ್ರಯತ್ನಗಳು ನಡೆಯುತ್ತಿವೆ. ಮತ್ತೊಂದೆಡೆ, ಭಾರಿ ತೂಕ ತಡೆಯಬೇಕಾದ ಮ್ಯಾನ್ಹೋಲ್ ಮುಚ್ಚಳ ಹೀಗೆ ದಿಢೀರನೆ ಕುಸಿದಿದ್ದರ ಬಗ್ಗೆ ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ.
PublicNext
10/06/2026 09:57 pm
ಸಂಬಂಧಿತ ಸುದ್ದಿ
LOADING...
