ವಾಷಿಂಗ್ಟನ್‌ : 22 ವರ್ಷಗಳ ಬಾಹ್ಯಾಕಾಶ ಪಯಣ ಅಂತ್ಯ; ಭೂಮಿಗೆ ಮರಳಲಿದೆ NASA ಉಪಗ್ರಹ
ವಾಷಿಂಗ್ಟನ್‌ : ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ NASAಗೆ ಸೇರಿದ 22 ವರ್ಷ ಹಳೆಯ ನೀಲ್ ಗೆಹ್ರೆಲ್ಸ್ ಸ್ವಿಫ್ಟ್ ಅಬ್ಸರ್ವೇಟರಿ (Neil Gehrels Swift Observatory) ಇಂದು ಭೂಮಿಯ ವಾತಾವರಣವನ್ನು ಪ್ರವೇಶಿಸುವ ನಿರೀಕ್ಷೆಯಿದೆ. ಉಪಗ್ರಹದ ಅವಶೇಷಗಳು ಎಲ್ಲಿ ಪತನಗೊಳ್ಳಲಿವೆ ಎಂಬುದು ಇನ್ನೂ ಖಚಿತವಾಗಿಲ್ಲ. ಆದರೆ NASA ಗುರುತಿಸಿರುವ ಸಂಭಾವ್ಯ ವ್ಯಾಪ್ತಿಯಲ್ಲಿ ಬೆಂಗಳೂರು ಸೇರಿದಂತೆ ಭಾರತದ ಪ್ರಮುಖ ನಗರಗಳೂ ಸೇರಿರುವುದು ಕುತೂಹಲ ಮೂಡಿಸಿದೆ.
ಭಾರತೀಯ ಕಾಲಮಾನ ಪ್ರಕಾರ ಇಂದು ಮಧ್ಯಾಹ್ನ 2 ಗಂಟೆಯೊಳಗೆ ಉಪಗ್ರಹ ವಾತಾವರಣ ಪ್ರವೇಶಿಸಬಹುದು ಎಂದು ಅಂದಾಜಿಸಲಾಗಿದೆ. ಈ ಸಂದರ್ಭದಲ್ಲಿ ಉಂಟಾಗುವ ತೀವ್ರ ಉಷ್ಣತೆಯಿಂದ ಉಪಗ್ರಹದ ಬಹುತೇಕ ಭಾಗಗಳು ಸುಟ್ಟು ನಾಶವಾಗಲಿವೆ. ಆದರೆ ಶಾಖವನ್ನು ತಡೆದುಕೊಳ್ಳುವ ಕೆಲವು ಲೋಹದ ತುಣುಕುಗಳು ಭೂಮಿಯ ಮೇಲ್ಮೈ ತಲುಪುವ ಸಾಧ್ಯತೆಯಿದೆ.
NASA ಗುರುತಿಸಿರುವ ಸಂಭಾವ್ಯ ಪತನ ವಲಯದಲ್ಲಿ ಆಫ್ರಿಕಾ, ಆಸ್ಟ್ರೇಲಿಯಾ, ಭಾರತ, ಆಗ್ನೇಯ ಏಷ್ಯಾ ಹಾಗೂ ಮಧ್ಯ ಮತ್ತು ದಕ್ಷಿಣ ಅಮೆರಿಕದ ಪ್ರದೇಶಗಳು ಸೇರಿವೆ. ಭಾರತದ ಬೆಂಗಳೂರು, ಮುಂಬೈ, ಹೈದರಾಬಾದ್ ಮತ್ತು ಚೆನ್ನೈ ನಗರಗಳೂ ಈ ವ್ಯಾಪ್ತಿಯಲ್ಲಿವೆ. ಆದರೆ ಈ ನಗರಗಳ ಮೇಲೆಯೇ ಅವಶೇಷಗಳು ಬೀಳುತ್ತವೆ ಎಂಬ ಖಚಿತತೆ ಇಲ್ಲ. ಪತನದ ನಿಖರ ಸ್ಥಳವನ್ನು ಸದ್ಯಕ್ಕೆ ಗುರುತಿಸಲಾಗಿಲ್ಲ.
ಉಪಗ್ರಹದ ಹೆಚ್ಚಿನ ಅವಶೇಷಗಳು ಜನವಸತಿಯಿಲ್ಲದ ಸಮುದ್ರ ಪ್ರದೇಶಕ್ಕೆ ಬೀಳುವ ಸಾಧ್ಯತೆಯಿದೆ. ಅದು ವಾತಾವರಣ ಪ್ರವೇಶಿಸುವ ಸಮಯದಲ್ಲಿ ಹೊಂದಿರುವ ಸ್ಥಾನ ಮತ್ತು ಚಲನೆಯ ಆಧಾರದ ಮೇಲೆ ಪತನದ ಸ್ಥಳ ನಿರ್ಧಾರವಾಗಲಿದೆ. ಹೀಗಾಗಿ ಆಸ್ಟ್ರೇಲಿಯಾ, ಆಗ್ನೇಯ ಏಷ್ಯಾ ಹಾಗೂ ಅಮೆರಿಕ ಖಂಡಗಳ ಕೆಲವು ಭಾಗಗಳೂ ಸಂಭಾವ್ಯ ಪ್ರದೇಶಗಳಾಗಿವೆ.
22 ವರ್ಷಗಳ ಬಾಹ್ಯಾಕಾಶ ಕಾರ್ಯಾಚರಣೆ
ನೀಲ್ ಗೆಹ್ರೆಲ್ಸ್ ಸ್ವಿಫ್ಟ್ ಅಬ್ಸರ್ವೇಟರಿಯನ್ನು 2004ರ ನವೆಂಬರ್ 20ರಂದು ಬಾಹ್ಯಾಕಾಶಕ್ಕೆ ಉಡಾವಣೆ ಮಾಡಲಾಗಿತ್ತು. ಆರಂಭದಲ್ಲಿ ಕೇವಲ ಎರಡು ವರ್ಷಗಳ ಕಾರ್ಯಾಚರಣೆಗಾಗಿ ವಿನ್ಯಾಸಗೊಳಿಸಲಾಗಿದ್ದ ಈ ಉಪಗ್ರಹ ಸುಮಾರು 1.5 ಟನ್ ತೂಕ ಹೊಂದಿದ್ದು, 22 ವರ್ಷಗಳ ಕಾಲ ಕಾರ್ಯನಿರ್ವಹಿಸಿದೆ. ಬಾಹ್ಯಾಕಾಶ ಸಂಶೋಧನೆಯಲ್ಲಿ ಮಹತ್ವದ ಕೊಡುಗೆ ನೀಡಿರುವ ಈ ಉಪಗ್ರಹ ತನ್ನ ನಿರೀಕ್ಷಿತ ಕಾರ್ಯಾವಧಿಯನ್ನು ಮೀರಿ ಸೇವೆ ಸಲ್ಲಿಸಿದೆ.
ಗಾಮಾ ಕಿರಣಗಳ ಸ್ಫೋಟಗಳ ಅಧ್ಯಯನ
ಬಾಹ್ಯಾಕಾಶದಲ್ಲಿ ಸಂಭವಿಸುವ ಗಾಮಾ ಕಿರಣಗಳ ಸ್ಫೋಟಗಳನ್ನು (Gamma Ray Bursts) ಪತ್ತೆಹಚ್ಚುವುದು ಈ ಉಪಗ್ರಹದ ಪ್ರಮುಖ ಉದ್ದೇಶವಾಗಿತ್ತು. ತನ್ನ ಕಾರ್ಯಾಚರಣೆಯ ಅವಧಿಯಲ್ಲಿ 2,000ಕ್ಕೂ ಹೆಚ್ಚು ಗಾಮಾ ಕಿರಣಗಳ ಸ್ಫೋಟಗಳನ್ನು ಅಧ್ಯಯನ ಮಾಡಿದೆ. ಇದರ ಜೊತೆಗೆ 1,400ಕ್ಕೂ ಹೆಚ್ಚು ಸೂಪರ್‌ನೋವಾ ಘಟನೆಗಳ ವೀಕ್ಷಣೆಗೂ ಕೊಡುಗೆ ನೀಡಿದೆ.
PublicNext
04/11/2026 10:19 am
ಸಂಬಂಧಿತ ಸುದ್ದಿ
LOADING...
