VIDEO: ಎಪ್ಸ್ಟೀನ್ ಕೇಸ್ನಲ್ಲಿ ನಾನು ಯಾವುದೇ ತಪ್ಪು ಮಾಡಿಲ್ಲ - ನೀವು ಕೆಟ್ಟ ಪತ್ರಕರ್ತೆ ಎಂದ ಗುಡುಗಿದ ಟ್ರಂಪ್
ವಾಷಿಂಗ್ಟನ್: ಕುಖ್ಯಾತ ಲೈಂಗಿಕ ಅಪರಾಧಿ ಜೆಫ್ರಿ ಎಪ್ಸ್ಟೀನ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಮೆರಿಕದ ನ್ಯಾಯಾಂಗ ಇಲಾಖೆ (DOJ) ಲಕ್ಷಾಂತರ ಪುಟಗಳ ಹೊಸ ದಾಖಲೆಗಳನ್ನು ಬಿಡುಗಡೆ ಮಾಡಿದ್ದು, ಇದು ದೊಡ್ಡ ರಾಜಕೀಯ ಬಿರುಗಾಳಿಯನ್ನೇ ಎಬ್ಬಿಸಿದೆ. ಈ ಕುರಿತು ಶ್ವೇತಭವನದಲ್ಲಿ ಮಂಗಳವಾರ (ಫೆಬ್ರವರಿ 3, 2026) ಸುದ್ದಿಗಾರರ ಪ್ರಶ್ನೆಗಳಿಗೆ ಉತ್ತರಿಸಿದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ತಮ್ಮ ಮೇಲಿನ ಆರೋಪಗಳನ್ನು ಸಾರಾಸಗಟಾಗಿ ತಳ್ಳಿಹಾಕಿದ್ದಾರೆ.
ನ್ಯಾಯಾಂಗ ಇಲಾಖೆ ಬಿಡುಗಡೆ ಮಾಡಿರುವ ಸುಮಾರು 30 ಲಕ್ಷ ಪುಟಗಳ ಬೃಹತ್ ದಾಖಲೆಗಳಲ್ಲಿ ಡೊನಾಲ್ಡ್ ಟ್ರಂಪ್ ಅವರ ಹೆಸರು 1,000ಕ್ಕೂ ಹೆಚ್ಚು ಬಾರಿ ಪ್ರಸ್ತಾಪವಾಗಿದೆ. ಈ ದಾಖಲೆಗಳ ಪ್ರಕಾರ, ಟ್ರಂಪ್ ಅವರು ಎಪ್ಸ್ಟೀನ್ ಜೊತೆ ಸಾಮಾಜಿಕವಾಗಿ ಒಡನಾಟ ಹೊಂದಿದ್ದರು ಮತ್ತು ಆತನ ವಿಮಾನದಲ್ಲಿ ಪ್ರಯಾಣಿಸಿದ್ದರು ಎಂಬ ಅಂಶಗಳು ಹೊರಬಂದಿವೆ. ಆದಾಗ್ಯೂ, ಟ್ರಂಪ್ ಯಾವುದೇ ಕಾನೂನುಬಾಹಿರ ಕೃತ್ಯ ಎಸಗಿದ್ದಾರೆ ಎಂಬುದಕ್ಕೆ ಈ ದಾಖಲೆಗಳಲ್ಲಿ ನೇರ ಪುರಾವೆಗಳಿಲ್ಲ ಎಂಬುದು ಸದ್ಯದ ಮಾಹಿತಿ.
ವರದಿಗಾರ್ತಿ ಮೇಲೆ ಟ್ರಂಪ್ ವಾಗ್ದಾಳಿ: "ನೀವು ನಗುವುದನ್ನೇ ನೋಡಿಲ್ಲ!"
ಈ ಗಂಭೀರ ವಿಷಯದ ಬಗ್ಗೆ ಸಿಎನ್ಎನ್ (CNN) ವರದಿಗಾರ್ತಿ ಕೈಟ್ಲಾನ್ ಕಾಲಿನ್ಸ್ ಪ್ರಶ್ನೆ ಕೇಳಿದಾಗ ಟ್ರಂಪ್ ಕೆಂಡಾಮಂಡಲರಾದರು. "ಸಂತ್ರಸ್ತರಿಗೆ ನ್ಯಾಯ ಸಿಗುತ್ತದೆಯೇ?" ಎಂದು ಪ್ರಶ್ನಿಸಿದ ಕಾಲಿನ್ಸ್ ಅವರಿಗೆ ಉತ್ತರಿಸುವ ಬದಲು, ಟ್ರಂಪ್ ಅವರು ವೈಯಕ್ತಿಕ ದಾಳಿ ನಡೆಸಿದರು.
"ನೀವು ಅತ್ಯಂತ ಕೆಟ್ಟ ವರದಿಗಾರ್ತಿ. ಕಳೆದ 10 ವರ್ಷಗಳಿಂದ ನಿಮ್ಮನ್ನು ನೋಡುತ್ತಿದ್ದೇನೆ, ನಿಮ್ಮ ಮುಖದಲ್ಲಿ ಒಮ್ಮೆಯೂ ನಾನು ನಗು ನೋಡಿಲ್ಲ. ನಿಮ್ಮ ಸಂಸ್ಥೆಯ ಬಗ್ಗೆ ನಿಮಗೇ ನಾಚಿಕೆಯಾಗಬೇಕು," ಎಂದು ಟ್ರಂಪ್ ಕಿಡಿಕಾರಿದ್ದಾರೆ. ಎಪ್ಸ್ಟೀನ್ ಪ್ರಕರಣದ ಬಗ್ಗೆ ಚರ್ಚೆ ಸಾಕು ಎಂದಿರುವ ಟ್ರಂಪ್, "ಈಗಾಗಲೇ ಎಲ್ಲವೂ ಸ್ಪಷ್ಟವಾಗಿದೆ. ನನ್ನ ವಿರುದ್ಧ ಯಾವುದೇ ತಪ್ಪುಗಳು ಕಂಡುಬಂದಿಲ್ಲ. ಇದು ನನ್ನ ವಿರುದ್ಧ ನಡೆಯುತ್ತಿರುವ ಪಿತೂರಿ. ಈಗ ದೇಶವು ಆರೋಗ್ಯ ಸೇವೆ ಮತ್ತು ಇತರ ಮುಖ್ಯ ವಿಷಯಗಳತ್ತ ಗಮನ ಹರಿಸುವ ಸಮಯ ಬಂದಿದೆ," ಎಂದು ಹೇಳುವ ಮೂಲಕ ಪ್ರಕರಣವನ್ನು ಕೈಬಿಡಲು ಸೂಚಿಸಿದ್ದಾರೆ.
ಆದರೆ, ಸಾಮಾಜಿಕ ಜಾಲತಾಣಗಳಲ್ಲಿ ಟ್ರಂಪ್ ಅವರ ನಡೆಗೆ ಭಾರಿ ಟೀಕೆ ವ್ಯಕ್ತವಾಗುತ್ತಿದೆ. ಮಹಿಳಾ ವರದಿಗಾರ್ತಿಯನ್ನು ನಡೆಸಿಕೊಂಡ ರೀತಿ ಮತ್ತು ಸಂತ್ರಸ್ತರ ಬಗ್ಗೆ ತೋರಿದ ಅಸಮಾಧಾನವು ಅವರ ಮೇಲಿನ ಅನುಮಾನಗಳನ್ನು ಮತ್ತಷ್ಟು ಹೆಚ್ಚಿಸಿದೆ ಎಂದು ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
PublicNext
04/02/2026 04:28 pm
ಸಂಬಂಧಿತ ಸುದ್ದಿ
LOADING...
