ಬೆಂಗಳೂರು: ಮೇ 28 ಸಿದ್ದರಾಮಯ್ಯನವರು ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸಿದ ದಿನ. ರಾಜ್ಯದ ರಾಜಕೀಯ ಆಡಳಿತದ ಇತಿಹಾಸದಲ್ಲಿ ಒಂದು ಮಹತ್ವದ ಅಧ್ಯಾಯ ಕೊನೆಗೊಂಡಿತು. ಸಿದ್ದರಾಮಯ್ಯನವ್ರು ರಾಜಕೀಯಲ್ಲಿ ಸಕ್ರಿಯರಾಗಿ ಇರುತ್ತೇನೆ ಎಂದು ತಿಳಿಸಿದ್ದರೂ, ಅವರ ಅಧಿಕಾರದ ತ್ಯಾಗವು ಕನ್ನಡಿಗರಿಗೆ ಆಘಾತವನ್ನೇ ಉಂಟು ಮಾಡಿತು.

ಹೌದು.. ಸಿದ್ದರಾಮಯ್ಯನವರ ಆಡಳಿತ, ನಾಯಕತ್ವ ಹಾಗೂ ಅಚಲ ಕರ್ತವ್ಯ ನಿಷ್ಠೆ, ಸಂಯಮ ಮತ್ತು ದೃಢ ಸಂಕಲ್ಪವನ್ನು ಅನಾವರಣಗೊಳಿಸುವ ಕೆಲವು ವೈಯಕ್ತಿಕ ನೆನಪುಗಳನ್ನು ಐಎಎಸ್ ಅಧಿಕಾರಿ ಹಾಗೂ ಮುಖ್ಯಮಂತ್ರಿಗಳ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿಯಾಗಿದ್ದ ಎಲ್. ಕೆ. ಅತೀಕ್ ಹಂಚಿಕೊಂಡಿದ್ದಾರೆ.

ನಾ ಕಂಡ ಸಿದ್ದರಾಮಯ್ಯ

ನಾನು ಅವರ ಪ್ರಧಾನ ಕಾರ್ಯದರ್ಶಿಯಾಗಿ ಹಾಗೂ ಅವರು ಹಣಕಾಸು ಸಚಿವರಾಗಿದ್ದಾಗ ರಾಜ್ಯದ ಹಣಕಾಸು ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸುವ ಸೌಭಾಗ್ಯ ಪಡೆದಿದ್ದೆ. ಸಾಧಾರಣ ಹಿನ್ನೆಲೆಯಿಂದ ಬಂದರೂ ಕರ್ನಾಟಕದ ಅತಿ ಹೆಚ್ಚು ಕಾಲ ಸೇವೆ ಸಲ್ಲಿಸಿದ ಮುಖ್ಯಮಂತ್ರಿಯಾದ ಅವರ ಗಮನಾರ್ಹ ರಾಜಕೀಯ ಪಯಣ, ಅವರ ಚತುರತೆ ಮತ್ತು ಸತ್ಯಾಂಶಗಳು ಹಾಗೂ ಅಂಕಿಅಂಶಗಳ ಕುರಿತ ಅದ್ಭುತ ಜ್ಞಾಪಕ ಶಕ್ತಿ ನನ್ನ ಮನಸ್ಸಿನಲ್ಲಿ ಅಚ್ಚಳಿಯದೆ ಉಳಿದಿದೆ.

ವೈಯಕ್ತಿಕ ಸಂಕಷ್ಟದಲ್ಲೂ ಕರ್ತವ್ಯದ ಕರೆ

ಜುಲೈ 2016ರಲ್ಲಿ, ಸಿದ್ದರಾಮಯ್ಯನವ್ರಿಗೆ ತಮ್ಮ ಮಗ ರಾಕೇಶ್ ಬೆಲ್ಜಿಯಂನ ಆಂಟ್‌ವರ್ಪ್ ಆಸ್ಪತ್ರೆಯಲ್ಲಿ ಗಂಭೀರವಾಗಿ ಗಾಯಗೊಂಡು ದಾಖಲಾಗಿದ್ದಾರೆ ಎಂಬ ಆಘಾತಕಾರಿ ಸುದ್ದಿ ತಲುಪಿತ್ತು. ಮುಖ್ಯಮಂತ್ರಿಗಳು ತಕ್ಷಣವೇ ಹೊರಡಲು ಸಿದ್ಧರಾದ್ರು, ನಾನು ಅವರೊಂದಿಗೆ ಪ್ರಯಾಣ ಬೆಳೆಸಿದ್ದೆ. ಆದರೆ, ನಾವು ಹೊರಡುವ ಕೆಲವೇ ಗಂಟೆಗಳ ಮೊದಲು, ಸಾರಿಗೆ ಸಚಿವ ರಾಮಲಿಂಗಾ ರೆಡ್ಡಿ KSRTC ನೌಕರರ ಸಂಘದ ನಾಯಕರೊಂದಿಗೆ ಆಗಮಿಸಿದ್ರು, ಆಗ ನೌಕರರ ಮುಷ್ಕರದ ಕುರಿತ ಮಾತುಕತೆಗಳು ಬಿಕ್ಕಟ್ಟಿಗೆ ಸಿಲುಕಿದ್ದವು. ನಾನು ಆ ಚರ್ಚೆಗಳ ವೇಳೆ ಹಾಜರಿದ್ದೆ. ಮಾತುಕತೆಯು ಉದ್ವಿಗ್ನವಾಗಿತ್ತು. ಆದರೂ, ಸಿದ್ದರಾಮಯ್ಯನವರು ಶಾಂತ ಮತ್ತು ಸಂಯಮದಿಂದ ವರ್ತಿಸಿದ್ದರು. ಅಂತಹ ಆತಂಕಕಾರಿ ಸುದ್ದಿಯನ್ನು ಕೇಳಿದ ಯಾವುದೇ ತಂದೆಗೆ ಸಹಜವಾಗಿ ಉಂಟಾಗುವ ಆತಂಕವನ್ನು ಅವರು ಒಮ್ಮೆಯೂ ಹೊರಹಾಕಲಿಲ್ಲ. ಸುದೀರ್ಘ ಮಾತುಕತೆಗಳ ನಂತರ, ಒಪ್ಪಂದಕ್ಕೆ ಬರಲಾಯಿತಲ್ಲದೇ ಮುಷ್ಕರ ತಪ್ಪಿಸಲಾಯಿತು. ಆ ನಂತರವಷ್ಟೇ ಅವರು ವಿಮಾನ ನಿಲ್ದಾಣಕ್ಕೆ ಹೊರಟರು.

ಆಂಟ್‌ವರ್ಪ್‌ನಿಂದಲೇ ಬೆಂಗಳೂರು ಪ್ರವಾಹ ನಿರ್ವಹಣೆ

ಬೆಲ್ಜಿಯಂನ ಆಂಟ್‌ವರ್ಪ್‌ನಲ್ಲಿಯೂ ಸಿದ್ದರಾಮಯ್ಯನವರು ಅದೇ ಸ್ಥಿತಪ್ರಜ್ಞೆಯನ್ನು ಪ್ರದರ್ಶಿಸಿದ್ದರು. ಪ್ರತಿದಿನ ನಾವು ಆಸ್ಪತ್ರೆಗೆ ಭೇಟಿ ನೀಡುತ್ತಿದ್ದೆವು, ಅಲ್ಲಿ ರಾಕೇಶ್ ಕೋಮಾದಲ್ಲಿದ್ದರು. ಆ ನೋವಿನ ಸಂದರ್ಭಗಳಲ್ಲಿಯೂ ಸಿದ್ದರಾಮಯ್ಯ ತಮ್ಮ ಜವಾಬ್ದಾರಿಗಳ ಬಗ್ಗೆ ಗಮನ ಹರಿಸಿದರು. ನಾವು ಅಲ್ಲಿ ತಂಗಿದ್ದ 2 ದಿನಗಳ ನಂತರ, ಬೆಂಗಳೂರಿನಲ್ಲಿ ಭಾರೀ ಮಳೆಯಾಗಿ, ದೊಡ್ಡ ಕೆರೆಗಳು ತುಂಬಿ ಹರಿದು ನಗರದ ಕೆಲವು ಭಾಗಗಳು ಜಲಾವೃತಗೊಂಡಿದ್ದವು. ಸಿದ್ದರಾಮಯ್ಯನವರು ತಕ್ಷಣವೇ ಬೆಂಗಳೂರು ಅಭಿವೃದ್ಧಿ ಸಚಿವ ಕೆ.ಜೆ. ಜಾರ್ಜ್ ಮತ್ತು ಹಿರಿಯ ಬಿಬಿಎಂಪಿ ಅಧಿಕಾರಿಗಳೊಂದಿಗೆ ವೀಡಿಯೊ ಕಾನ್ಫರೆನ್ಸ್ ವ್ಯವಸ್ಥೆ ಮಾಡುವಂತೆ ನನಗೆ ಸೂಚಿಸಿದರು.

ವೈಯಕ್ತಿಕ ದುಃಖದಲ್ಲೂ ಸಾರ್ವಜನಿಕ ಸೇವೆಗೆ ಬದ್ಧತೆ

ನಂತರ ಸಂಭವಿಸಿದ ದುರಂತ ಎಲ್ಲರಿಗೂ ತಿಳಿದಿದೆ. ಒಂದು ಶನಿವಾರ ಬೆಳಗ್ಗೆ, ರಾಕೇಶ್ ನಿಧನರಾದರು ಎಂಬ ಹೃದಯವಿದ್ರಾವಕ ಸುದ್ದಿ ನಮಗೆ ತಲುಪಿತು. ಮುಖ್ಯಮಂತ್ರಿಗಳು ತಮ್ಮ ಮಗನ ಪಾರ್ಥಿವ ಶರೀರದೊಂದಿಗೆ ತಕ್ಷಣವೇ ಮೈಸೂರಿಗೆ ಹಿಂದಿರುಗಲು ಆತಂಕಗೊಂಡಿದ್ದರು. ವಿಶೇಷ ವಿಮಾನವನ್ನು ನೀಡಲಾಗಿದ್ದರೂ, ಚರ್ಚೆಯ ನಂತರ ವಿಳಂಬವಾದ್ರೂ ಕಮರ್ಷಿಯಲ್ ಫ್ಲೈಟ್‌ನಲ್ಲಿ ಪ್ರಯಾಣಿಸಲು ಸಿದ್ದರಾಮಯ್ಯ ಸುಲಭವಾಗಿ ಒಪ್ಪಿಕೊಂಡ್ರು, ಅದು ವಾರಾಂತ್ಯವಾಗಿದ್ದರಿಂದ, ದೇಹವನ್ನು ಬಿಡುಗಡೆ ಮಾಡಿಸುವುದು ಮತ್ತು ಅಗತ್ಯ ಔಪಚಾರಿಕತೆಗಳನ್ನು ಪೂರ್ಣಗೊಳಿಸುವುದು ಸುಲಭವಾಗಿರಲಿಲ್ಲ. ಬೆಲ್ಜಿಯಂನಲ್ಲಿರುವ ಭಾರತೀಯ ರಾಯಭಾರಿ ಅಮೂಲ್ಯ ನೆರವು ನೀಡಿತ್ತು, ಆಗಿನ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಅವರು ವೈಯಕ್ತಿಕವಾಗಿ ಮುಖ್ಯಮಂತ್ರಿಗಳಿಗೆ ಕರೆ ಮಾಡಿ ಸಂತಾಪ ಸೂಚಿಸಿ ಬೆಂಬಲದ ಭರವಸೆ ನೀಡಿದರು.

ಆರ್.ವಿ. ದೇಶಪಾಂಡೆ ಅವರು ಜೆಟ್ ಏರ್‌ವೇಸ್ ಅಧ್ಯಕ್ಷ ನರೇಶ್ ಗೋಯಲ್ ಅವರೊಂದಿಗೆ ನನ್ನನ್ನು ಸಂಪರ್ಕಿಸಿ, ಅವರು ವ್ಯವಸ್ಥೆಗಳನ್ನು ಪೂರ್ಣಗೊಳಿಸಲು ಆಮ್‌ಸ್ಟರ್‌ಡ್ಯಾಮ್‌ನಿಂದ ಹಿರಿಯ ಕಾರ್ಯನಿರ್ವಾಹಕರೊಬ್ಬರನ್ನು ನಿಯೋಜಿಸಿದರು.

ಈ ಅನುಭವವು ಸಿದ್ದರಾಮಯ್ಯನವರು ಎದುರಿಸಿದ ವೈಯಕ್ತಿಕ ದುರಂತವನ್ನು ಮಾತ್ರವಲ್ಲದೆ, ಅವರು ಅದನ್ನು ಸಹಿಸಿಕೊಂಡ ಘನತೆಯನ್ನೂ ಅನಾವರಣಗೊಳಿಸಿತು. ಅಲ್ಪಾವಧಿಯ ಶೋಕಾಚರಣೆಯ ನಂತರ, ಅವರು ಮತ್ತೆ ಆಡಳಿತದಲ್ಲಿ ಸಂಪೂರ್ಣವಾಗಿ ತೊಡಗಿಸಿಕೊಂಡರು. ವೈಯಕ್ತಿಕ ದುಃಖವು ಅವರ ಸಾರ್ವಜನಿಕ ಕರ್ತವ್ಯದ ಬದ್ಧತೆಯನ್ನು ಎಂದಿಗೂ ಕುಂದಿಸಲಿಲ್ಲ.

ಬಜೆಟ್ ರೂಪಿಸುವಲ್ಲಿ ಸಿದ್ದರಾಮಯ್ಯನವರ ನಿಖರತೆ

ಸಿದ್ದರಾಮಯ್ಯನವರ ಮತ್ತೊಂದು ಗಮನಾರ್ಹ ಗುಣ, ಅವರು ವಾರ್ಷಿಕ ಬಜೆಟ್ ಅನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸುತ್ತಿದ್ದ ರೀತಿ. ಅವರು ಇಲಾಖಾ ಪ್ರಸ್ತಾವನೆಗಳನ್ನು ಸೂಕ್ಷ್ಮವಾಗಿ ಪರಿಶೀಲಿಸುತ್ತಿದ್ರು. ನಾಗರಿಕರು ಮತ್ತು ಶಾಸಕರಿಂದ ಸ್ವೀಕರಿಸಿದ ಮನವಿಗಳನ್ನು ಆಗಾಗ್ಗೆ ನೆನಪಿಸಿಕೊಳ್ಳುತ್ತಿದ್ರು. ಕಾಂಗ್ರೆಸ್ ಪ್ರಣಾಳಿಕೆಯನ್ನು ಪರಿಶೀಲಿಸುವಂತೆ ಅವರು ಒತ್ತಾಯಿಸುತ್ತಿದ್ದರು.

ಅದ್ಭುತ ಜ್ಞಾಪಕ ಶಕ್ತಿ ಮತ್ತು ಹಾಸ್ಯಪ್ರಜ್ಞೆ

ಅಂಕಿಅಂಶಗಳ ಬಗ್ಗೆ ಅವರ ಜ್ಞಾಪಕ ಶಕ್ತಿ ನಿಜಕ್ಕೂ ಅದ್ಭುತವಾಗಿತ್ತು. ಹಣಕಾಸು ಕಾರ್ಯದರ್ಶಿ ಐ.ಎಸ್.ಎನ್. ಪ್ರಸಾದ್ ಆಗಾಗ್ಗೆ ತಮಾಷೆ ಮಾಡುತ್ತಿದ್ದರು: "ಸರ್, ನಾವು ನಿಮಗೆ ಅಂದಾಜು ಅಂಕಿಅಂಶಗಳನ್ನು ನೀಡಿದಾಗ, ದಶಮಾಂಶಗಳವರೆಗೂ ನಿಖರವಾದ ಸಂಖ್ಯೆಗಳನ್ನು ನೀವು ನೆನಪಿಸುತ್ತೀರಿ. ಸಿದ್ದರಾಮಯ್ಯನವರ ಸಾರ್ವಜನಿಕ ವ್ಯಕ್ತಿತ್ವದ ಹಿಂದೆ, ಸಹೋದ್ಯೋಗಿಗಳು ಮೆಚ್ಚುವಂತಹ ಸೂಕ್ಷ್ಮ ಹಾಸ್ಯಪ್ರಜ್ಞೆ ಇತ್ತು.

ಎಲ್ಲಕ್ಕಿಂತ ಹೆಚ್ಚಾಗಿ, ಸಿದ್ದರಾಮಯ್ಯನವರು ಅದ್ಭುತ ಮೆಂಟಲಿ ಸ್ಟ್ರಾಂಗ್, ಸೋಶಿಯಲ್ ಜಸ್ಟಿಸ್ ಬಗ್ಗೆ ಅಚಲ ಬದ್ಧತೆಯನ್ನು ಹೊಂದಿದ್ದರು. ಅಷ್ಟೇ ಅಲ್ಲದೆ ಇದನ್ನು ಗ್ರಾಮೀಣ ಜೀವನದ ಸರಳ ಭಾಷೆಯಲ್ಲಿ ಜನರಿಗೆ, ರಾಜಕೀಯ ನಾಯಕರಿಗೆ ಮನದಟ್ಟು ಮಾಡುತ್ತಿದ್ದರು.

ಸಿದ್ದರಾಮಯ್ಯನವರೊಂದಿಗೆ ಕೆಲಸ ಮಾಡಿದ್ದು ನನ್ನ ಸೌಭಾಗ್ಯ. ನಾನು ಹ ತ್ತಿರದಿಂದಲೇ ಅಸಾಧಾರಣ ಮೆಮೊರಿ ಪವರ್‌, ಆಡಳಿತ ಸಾಮರ್ಥ್ಯ ಹೊಂದಿರುವ ನಾಯಕರನ್ನು ಕಂಡೆ ಎಂದು ಎಲ್. ಕೆ. ಅತೀಕ್ ಕೊಂಡಾಡಿದ್ದಾರೆ.