ಮುಂಬೈ: ಪ್ರಸ್ತುತ ಕ್ರಿಕೆಟ್ ಲೋಕದಲ್ಲಿ ಟೀಮ್ ಇಂಡಿಯಾ ಆಟಗಾರರ ಪ್ರಾಬಲ್ಯ ಎಷ್ಟಿದೆ ಎಂಬುದಕ್ಕೆ ಆಸ್ಟ್ರೇಲಿಯಾದ ಮಾಜಿ ದಿಗ್ಗಜ ಹಾಗೂ ಸ್ಟಾರ್ ಆಲ್ ರೌಂಡರ್ ಶೇನ್ ವಾಟ್ಸನ್ ನೀಡಿರುವ ಒಂದು ಹೇಳಿಕೆಯೇ ಸಾಕ್ಷಿ. "ಭಾರತದ ಮೂವರು ಕ್ರಿಕೆಟಿಗರಿಂದ ತಲಾ ಒಂದೊಂದು ಅದ್ಭುತ ಗುಣ ಅಥವಾ ಕೌಶಲ್ಯವನ್ನು ಕದಿಯುವ (Steal) ಅವಕಾಶ ಸಿಕ್ಕರೆ ಯಾರನ್ನು ಆಯ್ಕೆ ಮಾಡುತ್ತೀರಿ?" ಎಂಬ ಆಸಕ್ತಿದಾಯಕ ಪ್ರಶ್ನೆಗೆ ವಾಟ್ಸನ್ ನೀಡಿರುವ ಉತ್ತರ ಈಗ ಕ್ರಿಕೆಟ್ ವಲಯದಲ್ಲಿ ಭಾರಿ ವೈರಲ್ ಆಗಿದೆ.

ಆಸ್ಟ್ರೇಲಿಯಾದ ದಿಗ್ಗಜ ಶೇನ್ ವಾಟ್ಸನ್, ಭಾರತದ ಅಗ್ರ ಮೂವರು ಕ್ರಿಕೆಟಿಗರಿಂದ ತಮಗೆ ಬೇಕಾದ ಗುಣಗಳನ್ನು ಹೆಸರಿಸಿದ್ದು, ಈ ಪಟ್ಟಿಯಲ್ಲಿ ಜಸ್‌ಪ್ರಿತ್ ಬುಮ್ರಾ ಮತ್ತು ಶ್ರೇಯಸ್ ಅಯ್ಯರ್ ಜೊತೆಗೆ ಯುವ ಆಟಗಾರ ವೈಭವ್ ಸೂರ್ಯವಂಶಿಯ ಹೆಸರನ್ನು ಮೊದಲ ಸ್ಥಾನದಲ್ಲಿ ಉಲ್ಲೇಖಿಸಿ ಅಚ್ಚರಿ ಮೂಡಿಸಿದ್ದಾರೆ.

ವೈಭವ್ ಸೂರ್ಯವಂಶಿ: ಮೈದಾನ ಸೀಳುವ ಶಕ್ತಿ ಮತ್ತು ನಿರ್ಭೀತ ಆಟ

"ನನ್ನ ಮೊದಲ ಆಯ್ಕೆ ಯುವ ಆಟಗಾರ ವೈಭವ್ ಸೂರ್ಯವಂಶಿ" ಎಂದು ಹೇಳಿರುವ ವಾಟ್ಸನ್, "ಅವನ ಬ್ಯಾಟಿಂಗ್‌ನಲ್ಲಿರುವ ಅದ್ಭುತ ಶಕ್ತಿ ನನಗೆ ಬೇಕು. ಮೈದಾನದ ಬೌಂಡರಿ ಲೈನ್‌ಗಳಾದ ನೆಟ್ಟಗೆ (Straight) ಅಥವಾ ಲೆಗ್ ಸೈಡ್‌ನಲ್ಲಿ ಮಾತ್ರವಲ್ಲದೆ, ಆಫ್‌ಸೈಡ್‌ನಲ್ಲೂ ಚೆಂಡನ್ನು ಸಿಕ್ಸರ್‌ಗೆ ಅಟ್ಟುವ ಸಾಮರ್ಥ್ಯ ಅವನಲ್ಲಿದೆ. ಇದರ ಜೊತೆಗೆ ಅವನ 'ಫಿಯರ್‌ಲೆಸ್ ಮೈಂಡ್‌ಸೆಟ್' (ಭಯವಿಲ್ಲದ ಆಟ) ನನಗಿಷ್ಟ. ಔಟ್ ಆಗುವ ಯಾವುದೇ ಭಯವಿಲ್ಲದೆ ಆತ ಬ್ಯಾಟ್ ಬೀಸುತ್ತಾನೆ. ಆದರೆ, ನನ್ನ ವೃತ್ತಿಜೀವನದ ಬಹುತೇಕ ಭಾಗದಲ್ಲಿ ನಾನು ಔಟ್ ಆಗುವ ಭಯದ ವಿರುದ್ಧ ಸಾಕಷ್ಟು ಹೋರಾಡಬೇಕಾಗಿ ಬಂದಿತ್ತು" ಎಂದು ಮನಸ್ಸು ಬಿಚ್ಚಿ ಹೊಗಳಿದ್ದಾರೆ.

ಶ್ರೇಯಸ್ ಅಯ್ಯರ್ : ಆಫ್‌ಸೈಡ್‌ನಲ್ಲಿ ಸಿಕ್ಸರ್ ಬಾರಿಸುವ ತಾಕತ್ತು

ತಾನು ಕದಿಯಬಯಸುವ ಎರಡನೇ ಕೌಶಲ್ಯದ ಬಗ್ಗೆ ಮಾತನಾಡಿದ ವಾಟ್ಸನ್, "ಶ್ರೇಯಸ್ ಅಯ್ಯರ್ ಅವರ ಬ್ಯಾಟಿಂಗ್ ಶೈಲಿ ಅದ್ಭುತ. ಅದರಲ್ಲೂ ಆಫ್‌ಸೈಡ್‌ನ ಮೇಲೆ ಅತ್ಯಂತ ಶಕ್ತಿಶಾಲಿಯಾಗಿ ಚೆಂಡನ್ನು ಬೌಂಡರಿ ದಾಟಿಸುವ ಕಲೆ ಅವರಿಗೆ ಒಲಿದಿದೆ. ತಮಗಿರುವ ಈ ಕೌಶಲ್ಯ ಎಷ್ಟು ಅದ್ಭುತ ಮತ್ತು ಅಪರೂಪದ್ದು ಎಂಬುದು ಬಹುಶಃ ಶ್ರೇಯಸ್ ಅಯ್ಯರ್ ಅವರಿಗೇ ಇನ್ನು ಸರಿಯಾಗಿ ಮನವರಿಕೆಯಾದಂತಿಲ್ಲ" ಎಂದು ಅಯ್ಯರ್ ಅವರ ತಂತ್ರಗಾರಿಕೆಯನ್ನು ಶ್ಲಾಘಿಸಿದ್ದಾರೆ.

ಜಸ್‌ಪ್ರಿತ್ ಬುಮ್ರಾ: ಮಾರಕ ಯಾರ್ಕರ್‌ಗಳು ಮತ್ತು ಚೇಂಜ್ ಆಫ್ ಪೇಸ್

ಕೊನೆಯದಾಗಿ ಟೀಮ್ ಇಂಡಿಯಾದ ಪ್ರಮುಖ ವೇಗಿ ಜಸ್‌ಪ್ರಿತ್ ಬುಮ್ರಾ ಅವರನ್ನು ಉಲ್ಲೇಖಿಸಿರುವ ವಾಟ್ಸನ್, "ಮೂರನೇ ಗುಣವೆಂದರೆ ಬುಮ್ರಾ ಅವರ ಚೇಂಜ್ ಆಫ್ ಪೇಸ್ (ವೇಗದಲ್ಲಿ ತರುವ ಬದಲಾವಣೆ) ಮತ್ತು ಅವರ ಮಾರಕ ಯಾರ್ಕರ್‌ಗಳು. ಬೌಲಿಂಗ್‌ನಲ್ಲಿ ಇಂತಹ ಅದ್ಭುತ ಕೌಶಲ್ಯ ನನ್ನ ಬಳಿ ಇರಲಿಲ್ಲ, ಕನಿಷ್ಠ ಆ ಮಟ್ಟಿಗಂತೂ ಖಂಡಿತಾ ಇರಲಿಲ್ಲ" ಎಂದು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಒಟ್ಟಾರೆ, ಜಾಗತಿಕ ಕ್ರಿಕೆಟ್‌ನಲ್ಲಿ ತಮ್ಮದೇ ಛಾಪು ಮೂಡಿಸಿದ್ದ ಶೇನ್ ವಾಟ್ಸನ್ ಅವರೇ ಭಾರತದ ಹಿರಿಯ ಹಾಗೂ ಕಿರಿಯ ಆಟಗಾರರ ವಿಶಿಷ್ಟ ಕೌಶಲ್ಯಗಳನ್ನು ತಮಗೂ ಬೇಕಿತ್ತು ಎಂದು ಶ್ಲಾಘಿಸಿರುವುದು ಭಾರತೀಯ ಕ್ರಿಕೆಟ್ ಅಭಿಮಾನಿಗಳಿಗೆ ಹೆಮ್ಮೆ ತಂದಿದೆ.