ಆಧ್ಯಾತ್ಮಿಕ ಸ್ಪರ್ಶಕ್ಕೆ ಮನಸೋತ ಜನ - ಐಪಿಎಲ್ನಲ್ಲಿ ಅನುಷ್ಕಾ ಧರಿಸಿದ್ದ ತುಳಸಿ ಮಾಲೆ ಖರೀದಿಗೆ ಮುಗಿಬಿದ್ದ ಭಕ್ತರು
ನವದೆಹಲಿ: ಇತ್ತೀಚೆಗೆ ನಡೆದ ಐಪಿಎಲ್ ಫೈನಲ್ ಪಂದ್ಯದಲ್ಲಿ ನಟಿ ಅನುಷ್ಕಾ ಶರ್ಮಾ ಧರಿಸಿದ್ದ ತುಳಸಿ ಕಂಠಿ ಮಾಲೆ ಇದೀಗ ಸೋಷಿಯಲ್ ಮೀಡಿಯಾದಲ್ಲಿ ಭಾರೀ ಸದ್ದು ಮಾಡುತ್ತಿದೆ. ಅನುಷ್ಕಾ ಶರ್ಮಾ ಧರಿಸಿದ್ದ ಈ ಮಾಲೆ ಎಲ್ಲರ ಗಮನ ಸೆಳೆದಿದ್ದು, ಅದರ ಬೇಡಿಕೆಯು ಗಣನೀಯವಾಗಿ ಹೆಚ್ಚಾಗಿದೆ. ಈ ತಿಂಗಳ ಆರಂಭದಲ್ಲಿ ಆರ್ಸಿಬಿ ಮತ್ತು ಗುಜರಾತ್ ಟೈಟಾನ್ಸ್ ನಡುವಿನ ಐಪಿಎಲ್ ಪಂದ್ಯದಲ್ಲಿ ಅನುಷ್ಕಾ ಧರಿಸಿದ್ದ ಈ ಮಾಲೆ ಟ್ರೆಂಡಿಂಗ್ ವಿಷಯವಾಗಿತ್ತು.
ಅನುಷ್ಕಾ ಶರ್ಮಾ ಈ ಮಾಲೆ ಧರಿಸಿದ ನಂತರ, ಹಲವು ಬ್ರ್ಯಾಂಡ್ಗಳ ತುಳಸಿ ಮಾಲೆಗಳು ಆನ್ಲೈನ್ನಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಮಾರಾಟವಾಗುತ್ತಿವೆ. ಇನ್ಸ್ಟಾಗ್ರಾಂ ಸ್ಟೋರ್ ‘ಐ ಲವ್ ಮಾಯಾಪುರ’ ಸಂಸ್ಥಾಪಕ ಪೀಟರ್ ಪ್ಯಾನ್ಸ್ಟಿಂಗಲ್ ಅವರ ಪ್ರಕಾರ, ಕಳೆದ ಕೆಲವು ವಾರಗಳಲ್ಲಿ ತುಳಸಿ ಮಾಲೆಗಳ ಮಾರಾಟದಲ್ಲಿ ಶೇ.10 ರಿಂದ 15ರಷ್ಟು ಏರಿಕೆ ಕಂಡುಬಂದಿದೆ. ಹಲವರು ಅನುಷ್ಕಾ ಧರಿಸಿದ್ದ ಅದೇ ಮಾಲೆ ಬೇಕೆಂದು ಕೇಳುತ್ತಿರುವುದಾಗಿ ಅವರು ತಿಳಿಸಿದ್ದಾರೆ. ವೃಂದಾವನ ಮೂಲದ ‘ಪ್ಯೂರ್ ತುಳಸಿ ಮಾಲಾ’ ಸಂಸ್ಥೆಯ ರೋಹಿತ್ ಗುಪ್ತಾ ಅವರ ಪ್ರಕಾರ, ವಿಶೇಷವಾಗಿ ಅನುಷ್ಕಾ ಧರಿಸಿದ್ದ ಗಾಢ ಬಣ್ಣದ ಮಾಲೆಗೆ ಹೆಚ್ಚಿನ ಬೇಡಿಕೆ ವ್ಯಕ್ತವಾಗಿದೆ. ಈ ಮಾಲೆಗಳ ಬೆಲೆ ಸಾಮಾನ್ಯವಾಗಿ 150 ರಿಂದ 700ರ ವರೆಗೆ ಇರುತ್ತದೆ.
ಸಾಂಪ್ರದಾಯಿಕವಾಗಿ, ತುಳಸಿ ಕಂಠಿ ಮಾಲೆಯನ್ನು ಶ್ರೀಕೃಷ್ಣನ ಭಕ್ತಿಯ ಸಂಕೇತವಾಗಿ ಧರಿಸಲಾಗುತ್ತದೆ. ತುಳಸಿ ಗಿಡದ ಕಾಂಡದಿಂದ ತಯಾರಿಸುವ ಈ ಮಾಲೆಗಳು ಆಧ್ಯಾತ್ಮಿಕ ಮಹತ್ವವನ್ನು ಹೊಂದಿವೆ. ಅನುಷ್ಕಾ ಶರ್ಮಾ ಮತ್ತು ಅವರ ಪತಿ, ಕ್ರಿಕೆಟಿಗ ವಿರಾಟ್ ಕೊಹ್ಲಿ, ವೃಂದಾವನದ ಆಧ್ಯಾತ್ಮಿಕ ಗುರು ಪ್ರೇಮಾನಂದ ಗೋವಿಂದ ಶರಣ್ ಅವರ ಅನುಯಾಯಿಗಳಾಗಿದ್ದಾರೆ. ಅನುಷ್ಕಾ ಹೆಚ್ಚಾಗಿ ಎರಡು ಸುತ್ತಿನ ತುಳಸಿ ಮಾಲೆ ಧರಿಸಿರುವುದು ಕಂಡುಬರುತ್ತದೆ. ಒಂದು ಅಥವಾ ಎರಡು ಸುತ್ತಿನ ತುಳಸಿ ಕಂಠಿ ಮಾಲೆಯನ್ನು ಶ್ರೀಕೃಷ್ಣ ಭಕ್ತರು ಹಾಗೂ ವೈಷ್ಣವ ಸಂಪ್ರದಾಯದ ಅನುಯಾಯಿಗಳು ಧರಿಸುತ್ತಾರೆ. ಇಸ್ಕಾನ್ ದ್ವಾರಕಾದ ತುಷ್ಟ್ ಗೌರ್ ಅವರು ತಿಳಿಸಿದಂತೆ, ಮೂರು ಸುತ್ತಿನ ಮಾಲೆಯನ್ನು ಗುರುಗಳಿಂದ ದೀಕ್ಷೆ ಪಡೆದ ಭಕ್ತರು ಧರಿಸುವ ಸಂಪ್ರದಾಯವಿದೆ.
PublicNext
14/06/2026 04:51 pm
ಸಂಬಂಧಿತ ಸುದ್ದಿ
LOADING...
