ಬೆಂಗಳೂರು: ಐಪಿಎಲ್ ಅಖಾಡದಲ್ಲಿ ತಮ್ಮ ಬಿರುಗಾಳಿಯ ಬ್ಯಾಟಿಂಗ್ ಮೂಲಕ ಇಡೀ ಕ್ರಿಕೆಟ್ ಜಗತ್ತನ್ನೇ ತನ್ನತ್ತ ತಿರುಗಿ ನೋಡುವಂತೆ ಮಾಡಿದ 15 ವರ್ಷದ ಅದ್ಭುತ ಪ್ರತಿಭೆ ವೈಭವ್ ಸೂರ್ಯವಂಶಿ ಇದೀಗ ಭಾರತೀಯ ಕ್ರಿಕೆಟ್‌ನ ‘ಮಹಾ ಗುರು’ ರಾಹುಲ್ ದ್ರಾವಿಡ್ ಅವರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ. ರಾಜಸ್ಥಾನ ರಾಯಲ್ಸ್ ತಂಡದ ಮುಖ್ಯ ಕೋಚ್ ಆಗಿ ಸೂರ್ಯವಂಶಿ ಅವರ ಅಸಾಮಾನ್ಯ ಆಟವನ್ನು ಹತ್ತಿರದಿಂದ ಕಂಡಿರುವ ದ್ರಾವಿಡ್, ಈ ಯುವ ಆಟಗಾರನ ಬ್ಯಾಟಿಂಗ್ ಶೈಲಿ ಹಾಗೂ ಅದಕ್ಕಿಂತ ಹೆಚ್ಚಾಗಿ ಅವರ ಮಾನಸಿಕ ದೃಢತೆಗೆ ಸಂಪೂರ್ಣವಾಗಿ ಮನಸೋತಿದ್ದಾರೆ.

ವೈಭವ್ ಅವರ ಆಟವನ್ನು ಮುಕ್ತಕಂಠದಿಂದ ಶ್ಲಾಘಿಸಿರುವ ರಾಹುಲ್ ದ್ರಾವಿಡ್, "ವೈಭವ್ ಸೂರ್ಯವಂಶಿ ಆಡುವ ಆ ಮೈಂಡ್ಸೆಟ್ ಇದೆಯಲ್ಲ, ಅದನ್ನು ಯಾರಿಗೂ ಕೋಚ್ ಮಾಡಲು ಸಾಧ್ಯವಿಲ್ಲ. ಅದನ್ನು ಹುಟ್ಟಿನಿಂದಲೇ ರಕ್ತದಲ್ಲಿ ತರಬೇಕು!" ಎಂದು ಹೇಳಿದ್ದಾರೆ. ದ್ರಾವಿಡ್ ಅವರ ಈ ಮಾತುಗಳು ವೈಭವ್ ಅವರ ಅಸಾಧಾರಣ ಪ್ರತಿಭೆಗೆ ಹಿಡಿದ ಕೈಗನ್ನಡಿಯಾಗಿದೆ.

ಮೊದಲ ಎಸೆತದಲ್ಲೇ ಸಿಕ್ಸರ್: ದ್ರಾವಿಡ್ ಕಂಡ ವಂಡರ್ ಕಿಡ್

ಕಳೆದ ಸೀಸನ್‌ನಲ್ಲಿ ರಾಹುಲ್ ದ್ರಾವಿಡ್ ನೇತೃತ್ವದ ರಾಜಸ್ಥಾನ ರಾಯಲ್ಸ್ ತಂಡವು ವೈಭವ್ ಸೂರ್ಯವಂಶಿ ಅವರನ್ನು ಕೇವಲ 1.10 ಕೋಟಿ ರೂಪಾಯಿಗಳಿಗೆ ತಂಡಕ್ಕೆ ಸೇರಿಸಿಕೊಂಡಾಗ ಹಲವರು ಅಚ್ಚರಿ ವ್ಯಕ್ತಪಡಿಸಿದ್ದರು. ಆದರೆ, ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧದ ತಮ್ಮ ಚೊಚ್ಚಲ ಐಪಿಎಲ್ ಪಂದ್ಯದಲ್ಲೇ, ಅಂತರರಾಷ್ಟ್ರೀಯ ಬೌಲರ್ ಶಾರ್ದೂಲ್ ಠಾಕೂರ್ ಎದುರಿಸಿದ ಮೊದಲ ಎಸೆತವನ್ನೇ ಸಿಕ್ಸರ್‌ಗೆ ಅಟ್ಟುವ ಮೂಲಕ ವೈಭವ್ ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಿದರು. ಇದು ದ್ರಾವಿಡ್ ಅವರ ಪ್ರತಿಭಾ ಶೋಧನೆಯ ಶ್ರೇಷ್ಠತೆಯನ್ನು ಜಗತ್ತಿಗೆ ಮನವರಿಕೆ ಮಾಡಿಸಿತು. ಅಷ್ಟೇ ಅಲ್ಲದೆ, ಗುಜರಾತ್ ಟೈಟನ್ಸ್ ವಿರುದ್ಧ ಕೇವಲ 35 ಎಸೆತಗಳಲ್ಲಿ ಶತಕ ಸಿಡಿಸಿದ ವೈಭವ್, ಐಪಿಎಲ್ ಇತಿಹಾಸದಲ್ಲೇ ಅತ್ಯಂತ ಕಿರಿಯ ಶತಕ ಸಿಡಿಸಿದ ಆಟಗಾರ ಎಂಬ ಹೊಸ ದಾಖಲೆ ಸೃಷ್ಟಿಸಿದರು.

"ಕೋಚ್ ಆಗಿ ನಾನು ಅವನಿಗೆ ಅಡ್ಡಿಪಡಿಸಲ್ಲ": ದ್ರಾವಿಡ್ ಮಾರ್ಗದರ್ಶನ

ವೈಭವ್ ಅವರ ಬ್ಯಾಟಿಂಗ್ ಕುರಿತು ಮಾತನಾಡಿರುವ ದ್ರಾವಿಡ್, "ಅವನಿಗೆ ಅದ್ಭುತವಾದ ಕೌಶಲ್ಯವಿದೆ. ಆದರೆ ಅದಕ್ಕಿಂತ ಹೆಚ್ಚಾಗಿ ಆತನಲ್ಲಿರುವ ನಿರ್ಭೀತ ಮನೋಭಾವವೇ ದೊಡ್ಡದು. ಒಬ್ಬ ಕೋಚ್ ಆಗಿ, ಅವನಿಗೆ ಹೀಗೇ ಆಡು ಎಂದು ಸೂಚನೆಗಳನ್ನು ನೀಡಿ ಅವನ ಸ್ವಾತಂತ್ರ್ಯವನ್ನು ಕಸಿದುಕೊಳ್ಳಲು ನಾನು ಇಷ್ಟಪಡುವುದಿಲ್ಲ. ನೆಟ್ಸ್‌ನಲ್ಲಿ ವಿಭಿನ್ನ ಹಾಗೂ ಸವಾಲಿನ ಪರಿಸ್ಥಿತಿಗಳನ್ನು ನಿರ್ಮಿಸಿ, ಆತನೇ ಅದಕ್ಕೆ ತನ್ನದೇ ಆದ ವಿಶಿಷ್ಟ ದಾರಿಯಲ್ಲಿ ಉತ್ತರ ಕಂಡುಕೊಳ್ಳುವಂತೆ ಮಾಡುವುದು ನಮ್ಮ ಕೆಲಸ. ಇದು ಸ್ವಯಂ ಶೋಧನೆಯ ಪ್ರಕ್ರಿಯೆ, ಇದರಲ್ಲಿ ಕೋಚ್‌ಗಳು ಮಧ್ಯಪ್ರವೇಶಿಸಬಾರದು," ಎಂದು ತಮ್ಮ ಮಾರ್ಗದರ್ಶನ ತತ್ವವನ್ನು ವಿವರಿಸಿದ್ದಾರೆ.

ಕೇವಲ 15ನೇ ವಯಸ್ಸಿಗೆ ರನ್‌ಗಳ ಸುರಿಮಳೆಗರೆದು ಟೂರ್ನಿಯ ಅತ್ಯಂತ ಮೌಲ್ಯಯುತ ಆಟಗಾರ ಆಗಿ ಹೊರಹೊಮ್ಮಿದ ವೈಭವ್ ಸೂರ್ಯವಂಶಿ, ಸದ್ಯ ಶ್ರೀಲಂಕಾದಲ್ಲಿ ನಡೆಯುತ್ತಿರುವ ಇಂಡಿಯಾ 'ಎ' ಸರಣಿಯಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದ್ದಾರೆ. ಇದು ಮಾತ್ರವಲ್ಲದೆ, ಮುಂಬರುವ ಐರ್ಲೆಂಡ್ ಹಾಗೂ ಇಂಗ್ಲೆಂಡ್ ಪ್ರವಾಸದ ಟಿ20 ಸರಣಿಗೂ ಭಾರತ ತಂಡಕ್ಕೆ ಆಯ್ಕೆಯಾಗುವ ಮೂಲಕ ಅತಿ ಕಿರಿಯ ವಯಸ್ಸಿಗೆ ಟೀಮ್ ಇಂಡಿಯಾ ಜರ್ಸಿ ಧರಿಸುವ ಐತಿಹಾಸಿಕ ಸಾಧನೆಯ ಹೊಸ್ತಿಲಲ್ಲಿ ನಿಂತಿದ್ದಾರೆ.

41ನೇ ವಯಸ್ಸಿನ ಪ್ರವೀಣ್ ತಾಂಬೆ ಅವರನ್ನು ಐಪಿಎಲ್‌ಗೆ ಪರಿಚಯಿಸಿದವರೂ ಇದೇ ದ್ರಾವಿಡ್, ಹಾಗೆಯೇ 14-15ನೇ ವಯಸ್ಸಿನ ವೈಭವ್ ಸೂರ್ಯವಂಶಿ ಅವರನ್ನು ಜಗತ್ತಿಗೆ ಪರಿಚಯಿಸಿದವರೂ ಇದೇ ದ್ರಾವಿಡ್. ದ್ರಾವಿಡ್ ಅವರ ಕಣ್ಣಿಗೆ ಬಿದ್ದಿರುವ ಸೂರ್ಯವಂಶಿ, ಭಾರತೀಯ ಕ್ರಿಕೆಟ್‌ನ ಮುಂದಿನ ಸೂಪರ್‌ಸ್ಟಾರ್ ಆಗುವುದರಲ್ಲಿ ಯಾವುದೇ ಅನುಮಾನವಿಲ್ಲ.