ಅಮೆರಿಕದ ಸೋಲಿಗೆ ಯುದ್ಧಇಸ್ರೇಲ್ ನೀತಿಯೇ ಕಾರಣ ಜೆ.ಡಿ. ವ್ಯಾನ್ಸ್ ಸ್ಫೋಟಕ ಮಾತು
ವಾಷಿಂಗ್ಟನ್ : ಅಮೆರಿಕದ ಮಧ್ಯಂತರ ಚುನಾವಣೆಯಲ್ಲಿ ರಿಪಬ್ಲಿಕನ್ ಪಕ್ಷಕ್ಕೆ ಎದುರಾದ ಆಘಾತಕಾರಿ ಹಿನ್ನಡೆಗೆ ಇರಾನ್ ವಿರುದ್ಧದ ಯುದ್ಧ ಹಾಗೂ ಇಸ್ರೇಲ್ ಜೊತೆಗಿನ ಸರ್ಕಾರದ ಸಂಬಂಧವೇ ಮುಖ್ಯ ಕಾರಣ ಎಂದು ಅಮೆರಿಕದ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಒಪ್ಪಿಕೊಂಡಿದ್ದಾರೆ.
ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಡಳಿತದ ಒಳಗಿನಿಂದಲೇ ಹೊರಬಿದ್ದಿರುವ ಈ ನೇರ ಮತ್ತು ನಿಷ್ಠುರ ಹೇಳಿಕೆ ಇದೀಗ ಜಾಗತಿಕ ರಾಜಕೀಯ ವಲಯದಲ್ಲಿ ಭಾರಿ ಸಂಚಲನ ಮೂಡಿಸಿದೆ. ಕಾಂಗ್ರೆಸ್‌ನ ಎರಡೂ ಸದನಗಳಲ್ಲಿ (ಸೆನೆಟ್ ಮತ್ತು ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್) ರಿಪಬ್ಲಿಕನ್ ಪಕ್ಷ ಬಹುಮತ ಕಳೆದುಕೊಂಡ ಬೆನ್ನಲ್ಲೇ ಸಾಮಾಜಿಕ ಜಾಲತಾಣ 'ಎಕ್ಸ್'ನಲ್ಲಿ ಸುದೀರ್ಘ ಪೋಸ್ಟ್ ಹಂಚಿಕೊಂಡಿರುವ ವ್ಯಾನ್ಸ್, ಪಕ್ಷದ ಸೋಲಿನ ಬಗ್ಗೆ ಮಹತ್ವದ ಆಂತರಿಕ ವಿವರಗಳನ್ನು ಹಂಚಿಕೊಂಡಿದ್ದಾರೆ.
"ಚುನಾವಣೆಯಲ್ಲಿ ರಿಪಬ್ಲಿಕನ್ನರು ಸೋಲಲು ಮತದಾರರು ಬೂತ್‌ಗಳಿಗೆ ಬಾರದಿರುವುದು ಕಾರಣವಲ್ಲ. ಬದಲಿಗೆ, 2024ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಟ್ರಂಪ್-ವ್ಯಾನ್ಸ್ ಜೋಡಿಯನ್ನು ಬೆಂಬಲಿಸಿದ್ದ ಅಪಾರ ಸಂಖ್ಯೆಯ ಮತದಾರರೇ ಆಡಳಿತದ ವಿದೇಶಾಂಗ ನೀತಿಯಿಂದ ಬೇಸತ್ತು ವಿರೋಧಿ ಡೆಮಾಕ್ರಟಿಕ್ ಪಕ್ಷದ ಪರವಾಗಿ ಮತ ಚಲಾಯಿಸಿದ್ದಾರೆ" ಎಂದು ವ್ಯಾನ್ಸ್ ಸ್ಪಷ್ಟಪಡಿಸಿದ್ದಾರೆ.
ಇನ್ನು ತಮ್ಮ ಆಂತರಿಕ ಚುನಾವಣಾ ಸಮೀಕ್ಷೆಗಳನ್ನು ಉಲ್ಲೇಖಿಸಿದ ಅವರು, ಮತದಾರರು ಪಕ್ಷದಿಂದ ದೂರ ಸರಿಯಲು ಹಾಗೂ ತಿರುಗಿ ಬೀಳಲು ನಾಲ್ಕು ಪ್ರಮುಖ ಅಂಶಗಳು ಕಾರಣವಾಗಿವೆ ಎಂದು ವಿಶ್ಲೇಷಿಸಿದ್ದಾರೆ:
ಇರಾನ್ ವಿರುದ್ಧದ ಯುದ್ಧ: ಸುದೀರ್ಘ ಸಂಘರ್ಷದಿಂದ ಬೇಸತ್ತಿರುವ ಅಮೆರಿಕನ್ನರು ಯುದ್ಧ ತಕ್ಷಣವೇ ಕೊನೆಗೊಳ್ಳಬೇಕೆಂದು ಬಯಸಿದ್ದಾರೆ.
ಏರುತ್ತಿರುವ ಜೀವನ ವೆಚ್ಚ: ಯುದ್ಧದಿಂದ ತೈಲ ಬೆಲೆ ಏರಿಕೆ ಹಾಗೂ ಹಣದುಬ್ಬರ ಗಗನಕ್ಕೇರಿದ್ದು, ಜನಸಾಮಾನ್ಯರ ಜೇಬಿಗೆ ಕತ್ತರಿ ಬಿದ್ದಿದೆ.
‘ಅಮೆರಿಕ ಫಸ್ಟ್’ ಅಜೆಂಡಾಕ್ಕೆ ಧಕ್ಕೆ: ದೇಶದ ಆಂತರಿಕ ಸಮಸ್ಯೆಗಳನ್ನು ಬಗೆಹರಿಸುವುದನ್ನು ಬಿಟ್ಟು ಹೊರದೇಶಗಳ ಯುದ್ಧದಲ್ಲಿ ತೊಡಗಿಸಿಕೊಂಡಿರುವುದಕ್ಕೆ ಆಕ್ರೋಶ ವ್ಯಕ್ತವಾಗಿದೆ.
ಇಸ್ರೇಲ್ ಜೊತೆಗಿನ ನೀತಿ ಬದಲಾವಣೆಗೆ ಒತ್ತಾಯ: ಇಸ್ರೇಲ್‌ನೊಂದಿಗಿನ ಅಮೆರಿಕದ ಏಕಮುಖ ಮೈತ್ರಿ ಮತ್ತು ಪ್ರಸ್ತುತ ರಾಜತಾಂತ್ರಿಕ ನಿಲುವಿನಲ್ಲಿ ತುರ್ತು ಬದಲಾವಣೆ ಬೇಕೆಂಬ ಅಸಮಾಧಾನ ಮತದಾರರಲ್ಲಿದೆ.
"ನಾವು ಸೋಲಲು ನೈಜ ಕಾರಣ ಯುದ್ಧವೇ. ಇದನ್ನು ಮುಚ್ಚಿಡಲು ಸಾಧ್ಯವಿಲ್ಲ. ಮುಂದಿನ ಆರು ವರ್ಷಗಳ ಕಾಲ ಸೆನೆಟ್‌ನಲ್ಲಿ ಅಧಿಕಾರ ಕಳೆದುಕೊಂಡಿರುವುದು ಈ ಯುದ್ಧಕ್ಕೆ ತೆತ್ತ ದೊಡ್ಡ ಬೆಲೆ" ಎಂದು ವ್ಯಾನ್ಸ್ ಬೇಸರ ವ್ಯಕ್ತಪಡಿಸಿದ್ದಾರೆ. ಟ್ರಂಪ್ ಆಡಳಿತದ ಪ್ರಮುಖ ನಾಯಕರೊಬ್ಬರೇ ಇರಾನ್ ಸಂಘರ್ಷ ತಮ್ಮ ಪಕ್ಷಕ್ಕೆ ದೊಡ್ಡ ರಾಜಕೀಯ ಹೊರೆಯಾಗಿ ಪರಿಣಮಿಸಿತು ಎಂದು ಸಾರ್ವಜನಿಕವಾಗಿ ಒಪ್ಪಿಕೊಂಡಿರುವುದು ಅಮೆರಿಕ ರಾಜಕಾರಣದಲ್ಲಿ ಭಾರಿ ಸಂವಾದಕ್ಕೆ ನಾಂದಿ ಹಾಡಿದೆ.
PublicNext
05/11/2026 01:51 pm
ಸಂಬಂಧಿತ ಸುದ್ದಿ
LOADING...
