ಧರ್ಮಸ್ಥಳ ಛಲೋ ಕಾರ್ಯಕ್ರಮದಲ್ಲಿ ಸಕಲೇಶಪುರದ ಅಲ್ಪಸಂಖ್ಯಾತ ಮುಖಂಡ ನೇಮನ್ ಶೇಕ್ ಭಾಗಿ
ಸಕಲೇಶಪುರ: ಬಿಜೆಪಿ ಆಯೋಜಿಸಿದ ಧರ್ಮಸ್ಥಳ ಛಲೋ ಕಾರ್ಯಕ್ರಮದಲ್ಲಿ ಸಕಲೇಶಪುರದ ಪ್ರಮುಖ ಅಲ್ಪಸಂಖ್ಯಾತ ಮುಖಂಡರಾದ ನೇಮನ್ ಶೇಕ್ ಭಾಗವಹಿಸಿ, ಧರ್ಮಸ್ಥಳದ ಪಾವಿತ್ರ್ಯವನ್ನು ಗೌರವಿಸುವ ಮೂಲಕ ಭಾವೈಕ್ಯತೆಯ ಉದಾತ್ತ ಸಂದೇಶವನ್ನು ಸಾರಿದರು.
ಈ ಕಾರ್ಯಕ್ರಮದಲ್ಲಿ ಭಾಗವಹಿಸುವ ಮೂಲಕ ಅವರು ಧರ್ಮಗಳ ಒಗ್ಗಟ್ಟಿನ ಸಾಮರಸ್ಯವನ್ನು ಮತ್ತೊಮ್ಮೆ ಎತ್ತಿ ಹಿಡಿದರು. ಕಾರ್ಯಕ್ರಮದ ಬಳಿಕ ತಮ್ಮ ಭಾವನೆಗಳನ್ನು ಹಂಚಿಕೊಂಡ ನೇಮನ್ ಶೇಕ್, “ಧರ್ಮಸ್ಥಳವು ಕೇವಲ ಒಂದು ಯಾತ್ರಾ ಸ್ಥಳವಲ್ಲ; ಅದು ಶ್ರದ್ಧೆ, ಭಕ್ತಿ, ನಂಬಿಕೆ ಮತ್ತು ಮಾನವೀಯತೆಯ ಸಂಗಮ. ಈ ಪವಿತ್ರ ಕ್ಷೇತ್ರದ ವಿರುದ್ಧ ಯಾವುದೇ ಅಪಪ್ರಚಾರ ಅಥವಾ ಷಡ್ಯಂತ್ರವನ್ನು ಸಹಿಸಲು ಸಾಧ್ಯವಿಲ್ಲ.
ಕಷ್ಟದ ಸಮಯದಲ್ಲಿ ಧರ್ಮಸ್ಥಳ ಸಂಸ್ಥೆಯು ಅನೇಕ ಮುಸ್ಲಿಂ ಕುಟುಂಬಗಳಿಗೆ ಸಾಲ ಸೌಲಭ್ಯ ಒದಗಿಸಿದ್ದು, ಬಡ ಮಕ್ಕಳಿಗೆ ಅನ್ನದಾನ ಮಾಡಿದ್ದು ಸದಾ ಸ್ಮರಣೀಯ,” ಎಂದು ಭಾವುಕವಾಗಿ ನುಡಿದರು.
“ನಾನು ಈ ಹಿಂದೆಯೂ ಧರ್ಮಸ್ಥಳಕ್ಕೆ ಭೇಟಿ ನೀಡಿದ್ದೇನೆ ಮತ್ತು ಮುಂದೆಯೂ ಬರುವೆ. ಯಾವ ಧರ್ಮವೂ ದ್ವೇಷವನ್ನು ಬೋಧಿಸುವುದಿಲ್ಲ; ಪ್ರೀತಿ, ಸಾಮರಸ್ಯ ಮತ್ತು ಮಾನವೀಯತೆಯೇ ಎಲ್ಲ ಧರ್ಮಗಳ ತಿರುಳು. ನಾವು ನಮ್ಮ ಧರ್ಮವನ್ನು ಗೌರವಿಸುವುದರ ಜೊತೆಗೆ, ಇತರ ಧರ್ಮಗಳನ್ನೂ ಗೌರವಿಸುವ ಸಹಿಷ್ಣುತೆಯನ್ನು ಬೆಳೆಸಿಕೊಳ್ಳಬೇಕು. ಯಾರ ಭಾವನೆಗೂ ಧಕ್ಕೆ ತರುವ ಕೆಲಸವಾಗಬಾರದು,” ಎಂದು ತಮ್ಮ ಸಾರ್ವತ್ರಿಕ ದೃಷ್ಟಿಕೋನವನ್ನು ವ್ಯಕ್ತಪಡಿಸಿದರು.
ನೇಮನ್ ಶೇಕ್‌ರ ಈ ಭಾವೈಕ್ಯತೆಯ ಕಾರ್ಯವೈಖರಿಯನ್ನು ಕ್ಷೇತ್ರದ ಬಿಜೆಪಿ ಕಾರ್ಯಕರ್ತರು ಹಾಗೂ ಸ್ಥಳೀಯರು ಶ್ಲಾಘಿಸಿದರು. “ನೇಮನ್ ಶೇಕ್ ಎಲ್ಲ ಧರ್ಮದವರನ್ನೂ ಸಮಾನ ದೃಷ್ಟಿಯಿಂದ ಕಾಣುವ ಮಾನವೀಯ ಗುಣದ ಮುಖಂಡ. ಮಹಾಮಾರಿ ಕೊರೊನಾ ಸಂದರ್ಭದಲ್ಲಿ ಎಲ್ಲ ಧರ್ಮದವರ ಒಳಿತಿಗಾಗಿ ಅವರು ತೋರಿದ ಸಮರ್ಪಣೆಯ ಶ್ರಮವನ್ನು ನಾವು ಮರೆಯಲಾರೆವು,” ಎಂದು ಸ್ಥಳೀಯರು ಮೆಚ್ಚುಗೆಯ ಮಾತುಗಳನ್ನಾಡಿದರು.
ನೇಮನ್ ಶೇಕ್‌ರ ಈ ಭಾಗವಹಿಸುವಿಕೆ ಮತ್ತು ಧರ್ಮಸ್ಥಳದ ಪವಿತ್ರತೆಯನ್ನು ಕೊಂಡಾಡಿದ ರೀತಿಯು ಸಕಲೇಶಪುರದ ಜನರಲ್ಲಿ ಒಗ್ಗಟ್ಟಿನ ಸಂದೇಶವನ್ನು ಮತ್ತಷ್ಟು ಬಲಪಡಿಸಿದೆ. ಧರ್ಮಸ್ಥಳದ ಛಲೋ ಕಾರ್ಯಕ್ರಮವು ಧರ್ಮಗಳ ಗಡಿಯಾಚೆಗಿನ ಭಾವೈಕ್ಯತೆಯ ಸಂಕೇತವಾಗಿ ಮತ್ತೊಮ್ಮೆ ಗಮನ ಸೆಳೆದಿದೆ.
PublicNext
03/09/2025 06:46 pm
ಸಂಬಂಧಿತ ಸುದ್ದಿ
LOADING...
