ಚಿಕ್ಕಮಗಳೂರು: ಸಿಬ್ಬಂದಿ ಇಲ್ಲದೆ ಸೊರಗುತ್ತಿದೆ ಕುದುರೆಮುಖ ವನ್ಯಜೀವಿ ವಿಭಾಗ

ಅಪ್ಲಿಕೇಶನ್‌ನಲ್ಲಿ ಉಚಿತವಾಗಿ ಪೂರ್ಣ ವೀಡಿಯೊವನ್ನು ವೀಕ್ಷಿಸಿ

ಚಿಕ್ಕಮಗಳೂರು: ಸಿಬ್ಬಂದಿ ಇಲ್ಲದೆ ಸೊರಗುತ್ತಿದೆ ಕುದುರೆಮುಖ ವನ್ಯಜೀವಿ ವಿಭಾಗ - ಕಾಡುಗಳ್ಳರಿಗೆ ಹಬ್ಬ? ಪರಿಸರಕ್ಕೆ ಕುತ್ತು!

ಚಿಕ್ಕಮಗಳೂರು: ವಿಶ್ವದ ಎಂಟು ಅತ್ಯಂತ ಸೂಕ್ಷ್ಮ ಜೀವವೈವಿಧ್ಯ ತಾಣಗಳಲ್ಲಿ ಒಂದಾದ ಕುದುರೆಮುಖ ರಾಷ್ಟ್ರೀಯ ಉದ್ಯಾನವನವು ಇಂದು ಅಕ್ಷರಶಃ ಅನಾಥಪ್ರಜ್ಞೆ ಅನುಭವಿಸುತ್ತಿದೆ. ಅಪರೂಪದ ಶೋಲಾ ಅರಣ್ಯಗಳು, ವೈವಿಧ್ಯಮಯ ವನ್ಯಜೀವಿಗಳು ಮತ್ತು ಹಲವು ನದಿಗಳ ಉಗಮ ಸ್ಥಾನವಾಗಿರುವ ಈ ಮಹತ್ವದ ಅರಣ್ಯವನ್ನು ಕಾಯಲು ಬೆರಳೆಣಿಕೆಯಷ್ಟು ಸಿಬ್ಬಂದಿ ಮಾತ್ರ ಉಳಿದಿರುವುದು ತೀವ್ರ ಆತಂಕಕಾರಿ ಸಂಗತಿಯಾಗಿದೆ. ಈ ವನ್ಯಜೀವಿ ವಿಭಾಗದಲ್ಲಿ ತಳಮಟ್ಟದ ಸಿಬ್ಬಂದಿ ಕೊರತೆ ಎಷ್ಟು ತೀವ್ರವಾಗಿದೆ ಎಂದರೆ, ಇಡೀ ಅರಣ್ಯ ಸಂಪತ್ತು ಈಗ ಕಾಡುಗಳ್ಳರು ಮತ್ತು ಕಾಳ್ಗಿಚ್ಚಿನ ಭೀತಿಯಲ್ಲಿದೆ.

ಸಿಬ್ಬಂದಿ ಕೊರತೆಯ ತೀವ್ರತೆ

ಕುದುರೆಮುಖ ವಿಭಾಗದಲ್ಲಿ ಒಟ್ಟು 240 ಮಂಜೂರಾದ ಹುದ್ದೆಗಳ ಪೈಕಿ ಬರೋಬ್ಬರಿ 180 ಹುದ್ದೆಗಳು ಖಾಲಿ ಇವೆ. ಇದು ಅರಣ್ಯ ಸಂರಕ್ಷಣೆಯ ನಿರ್ಲಕ್ಷ್ಯಕ್ಕೆ ಕನ್ನಡಿ ಹಿಡಿದಿದೆ. ಅರಣ್ಯದ ಕಣ್ಣು ಮತ್ತು ಕಿವಿಯಂತಿರುವ 'ಬೀಟ್ ಫಾರೆಸ್ಟ್ ಆಫೀಸರ್' ಹುದ್ದೆಗಳ ಸ್ಥಿತಿ ಅತ್ಯಂತ ಶೋಚನೀಯವಾಗಿದೆ. 144 ಮಂಜೂರಾದ ಹುದ್ದೆಗಳಲ್ಲಿ 131 ಸ್ಥಾನಗಳು ಖಾಲಿ ಬಿದ್ದಿದ್ದು, ಕೇವಲ 13 ಮಂದಿ ಇಡೀ ವಿಶಾಲ ವಿಭಾಗದ ರಕ್ಷಣೆಗೆ ನಿಂತಿದ್ದಾರೆ. ಇದಲ್ಲದೆ, 35 ಅರಣ್ಯ ವೀಕ್ಷಕರು ಹಾಗೂ 13 ಡಿ.ಆರ್.ಎಫ್.ಒ (ಡೆಪ್ಯೂಟಿ ರೇಂಜ್ ಫಾರೆಸ್ಟ್ ಆಫೀಸರ್) ಹುದ್ದೆಗಳು ಸಹ ಭರ್ತಿಯಾಗದೆ ಉಳಿದಿವೆ. ಹೀಗಾಗಿ, ಅಲ್ಪಸಂಖ್ಯೆಯಲ್ಲಿರುವ ಸಿಬ್ಬಂದಿಯ ಮೇಲೆ ಅತಿಯಾದ ಕೆಲಸದ ಒತ್ತಡವಿದ್ದು, ಇಷ್ಟು ದೊಡ್ಡ ಅರಣ್ಯದ ಮೇಲೆ ನಿರಂತರ ನಿಗಾ ಇಡುವುದು ಅಸಾಧ್ಯದ ಮಾತಾಗಿದೆ.

ಅರಣ್ಯಕ್ಕೆ ಎದುರಾದ ನಾನಾ ಅಪಾಯಗಳು

ಬೇಸಿಗೆ ಸಮೀಪಿಸುತ್ತಿದ್ದಂತೆ ಕಾಡ್ಗಿಚ್ಚಿನ ಅಪಾಯ ಎದುರಾಗುತ್ತಿದೆ. ಬೆಂಕಿ ರೇಖೆ ನಿರ್ಮಾಣದಂತಹ ಮಹತ್ವದ ಕಾರ್ಯಗಳಿಗೂ ಈಗ ಹೊರಗುತ್ತಿಗೆ ಸಿಬ್ಬಂದಿಯನ್ನೇ ನೆಚ್ಚಿಕೊಳ್ಳಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿದೆ. ಇತ್ತೀಚಿನ ದಿನಗಳಲ್ಲಿ ಅರಣ್ಯ ಒತ್ತುವರಿ, ಕಾಡುಪ್ರಾಣಿಗಳ ಹಾವಳಿ ಮತ್ತು ಕಳ್ಳಬೇಟೆಯ ಪ್ರಕರಣಗಳು ಹೆಚ್ಚಾಗುತ್ತಿರುವುದು ಇಲಾಖೆಯ ನಿದ್ದೆಗೆಡಿಸಿದೆ. ಸಿಬ್ಬಂದಿ ಕೊರತೆಯಿಂದಾಗಿ ಈ ಸಮಸ್ಯೆಗಳನ್ನು ಸಮರ್ಥವಾಗಿ ಎದುರಿಸಲು ಅರಣ್ಯ ಇಲಾಖೆ ಹೆಣಗಾಡುತ್ತಿದೆ.

Edited By :