WATCH: ಅನಧಿಕೃತ ಪಾರ್ಕಿಂಗ್ ಪ್ರಶ್ನಿಸಿದ ಪೊಲೀಸ್ ಜೊತೆ ಕಿಡಿಗೇಡಿಯ ಫೈಟಿಂಗ್ - ಸಂಯಮ ಕಾಪಾಡಿಕೊಂಡ ಸಿಬ್ಬಂದಿ
ಲಾರೆನ್ಸ್, ಇಂಡಿಯಾನಾ: ಅಮೆರಿಕದ ಇಂಡಿಯಾನಾ ಪ್ರಾಂತ್ಯದ ಲಾರೆನ್ಸ್ನಲ್ಲಿರುವ ವಾಲ್ಮಾರ್ಟ್ ಪಾರ್ಕಿಂಗ್ ಪ್ರದೇಶವು ಅಕ್ಷರಶಃ ರಣರಂಗವಾಗಿ ಮಾರ್ಪಟ್ಟಿದ್ದ ಘಟನೆ ನಡೆದಿದೆ. ಅಕ್ರಮವಾಗಿ ವಾಹನ ನಿಲ್ಲಿಸಿದ್ದ ವ್ಯಕ್ತಿಯೊಬ್ಬನನ್ನು ಬಂಧಿಸಲು ಹೋದ ಪೊಲೀಸರ ಮೇಲೆ ಆತ ಹಲ್ಲೆ ನಡೆಸಿದ್ದು, ಈ ರೋಚಕ ದೃಶ್ಯಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
'ಫೈರ್ ಲೇನ್' (ತುರ್ತು ನಿರ್ಗಮನ ದಾರಿ) ನಲ್ಲಿ ನಿಯಮಬಾಹಿರವಾಗಿ ಕಾರು ನಿಲ್ಲಿಸಿದ್ದ ವ್ಯಕ್ತಿಯನ್ನು ಪೊಲೀಸರು ಪ್ರಶ್ನಿಸಿದ್ದಾರೆ. ಈ ವೇಳೆ ಪೊಲೀಸರು ಆತನನ್ನು ಬಂಧಿಸಲು ಮುಂದಾದಾಗ, ಪರಿಸ್ಥಿತಿ ವಿಕೋಪಕ್ಕೆ ತಿರುಗಿದೆ. ಪೊಲೀಸರ ಕೈಯಿಂದ ತಪ್ಪಿಸಿಕೊಳ್ಳಲು ಯತ್ನಿಸಿದ ಆ ಕಪ್ಪು ವರ್ಣೀಯ ವ್ಯಕ್ತಿ, ಅಧಿಕಾರಿಯ ಮೇಲೆ ಸತತವಾಗಿ ಗುದ್ದಿ ಹಲ್ಲೆ ನಡೆಸಿದ್ದಾನೆ.
ವಿಡಿಯೋದಲ್ಲಿ ಆರೋಪಿಯು ಪೋಲೀಸ್ ಅಧಿಕಾರಿಯೊಂದಿಗೆ ಮಲ್ಲಯುದ್ಧಕ್ಕಿಳಿದಂತೆ ಹೊಡೆದಾಡುತ್ತಿರುವುದು ದಾಖಲಾಗಿದೆ. ಅಲ್ಲಿ ನೆರೆದಿದ್ದ ಕೆಲವರು ಈ ದೃಶ್ಯವನ್ನು ಅತ್ಯಂತ ಸಮೀಪದಿಂದ ಚಿತ್ರೀಕರಿಸುತ್ತಾ, ಪೊಲೀಸರ ಕೆಲಸಕ್ಕೆ ಅಡ್ಡಿಪಡಿಸುತ್ತಿರುವುದು ಕಂಡುಬಂದಿದೆ. ಮೊದಲಿಗೆ ಒಬ್ಬರೇ ಅಧಿಕಾರಿ ಹೋರಾಡುತ್ತಿದ್ದರೂ, ನಂತರ ಮತ್ತೊಬ್ಬ ಅಧಿಕಾರಿ ಸ್ಥಳಕ್ಕೆ ಆಗಮಿಸಿ ಆರೋಪಿಯನ್ನು ಹತೋಟಿಗೆ ತರುವಲ್ಲಿ ಯಶಸ್ವಿಯಾದರು.
ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಸಾರ್ವಜನಿಕರು ಪೊಲೀಸರ ಸಂಯಮವನ್ನು ಶ್ಲಾಘಿಸಿದ್ದಾರೆ. "ಆರೋಪಿಯು ಅಷ್ಟೊಂದು ಆಕ್ರಮಣಕಾರಿಯಾಗಿ ವರ್ತಿಸಿದರೂ, ಪೋಲೀಸ್ ಅಧಿಕಾರಿ ತುಪಾಕಿ ಬಳಸದೆ ಕೇವಲ ದೈಹಿಕ ಬಲದಿಂದಲೇ ಪರಿಸ್ಥಿತಿಯನ್ನು ನಿಭಾಯಿಸಿದ್ದು ನಿಜಕ್ಕೂ ಹೆಮ್ಮೆಯ ವಿಷಯ," ಎಂದು ನೆಟ್ಟಿಗರು ಕಾಮೆಂಟ್ ಮಾಡುತ್ತಿದ್ದಾರೆ.
ಬಂಧನದ ವೇಳೆ ಪ್ರತಿರೋಧ ಒಡ್ಡುವುದು ಶಿಕ್ಷೆಯನ್ನು ಮತ್ತಷ್ಟು ಹೆಚ್ಚಿಸುತ್ತದೆ ಎಂಬ ಎಚ್ಚರಿಕೆಯ ಮಾತುಗಳು ಜಾಲತಾಣಗಳಲ್ಲಿ ಕೇಳಿಬರುತ್ತಿವೆ. ಸದ್ಯ ಆರೋಪಿಯ ವಿರುದ್ಧ ಕರ್ತವ್ಯಕ್ಕೆ ಅಡ್ಡಿ ಮತ್ತು ಹಲ್ಲೆಯ ಪ್ರಕರಣಗಳು ದಾಖಲಾಗಿವೆ.
PublicNext
03/04/2026 09:49 pm
ಸಂಬಂಧಿತ ಸುದ್ದಿ
LOADING...
