​ವಾಷಿಂಗ್ಟನ್/ಟೆಹ್ರಾನ್: ಯುದ್ಧದ ಕಾರ್ಮೋಡಗಳ ನಡುವೆ ಅಮೆರಿಕದ ವಾಯುಪಡೆ ಅಸಾಧ್ಯವೆನಿಸುವ ಸಾಹಸವನ್ನು ಮಾಡಿ ತೋರಿಸಿದೆ. ಶತ್ರು ರಾಷ್ಟ್ರ ಇರಾನ್‌ನ ವಾಯುಪ್ರದೇಶದಲ್ಲಿ ಪತನಗೊಂಡ ತನ್ನ ಎಫ್-15 (F-15E) ಯುದ್ಧ ವಿಮಾನದ ಪೈಲಟ್‌ನನ್ನು ಹತ್ತಾರು ವಿಮಾನಗಳು ಮತ್ತು ವಿಶೇಷ ಕಮಾಂಡೋ ಪಡೆಗಳ ನೆರವಿನಿಂದ ಅಮೆರಿಕ ಯಶಸ್ವಿಯಾಗಿ ರಕ್ಷಿಸಿದೆ. ಈ ರೋಚಕ ಕಾರ್ಯಾಚರಣೆಯನ್ನು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ "ಅಮೆರಿಕ ಇತಿಹಾಸದ ಅತ್ಯಂತ ಧೈರ್ಯಶಾಲಿ ರಕ್ಷಣಾ ಕಾರ್ಯಾಚರಣೆ" ಎಂದು ಬಣ್ಣಿಸಿದ್ದಾರೆ.

​​ಕಳೆದ ಶುಕ್ರವಾರ (ಏಪ್ರಿಲ್ 3, 2026) ಇರಾನ್ ವಾಯುಪ್ರದೇಶದಲ್ಲಿ ಗಸ್ತು ತಿರುಗುತ್ತಿದ್ದ ಅಮೆರಿಕದ F-15E ಸ್ಟ್ರೈಕ್ ಈಗಲ್ ಯುದ್ಧ ವಿಮಾನವನ್ನು ಇರಾನ್‌ನ ವಾಯು ರಕ್ಷಣಾ ವ್ಯವಸ್ಥೆ ಹೊಡೆದುರುಳಿಸಿತ್ತು. ವಿಮಾನದಲ್ಲಿದ್ದ ಇಬ್ಬರು ಸಿಬ್ಬಂದಿ ಪೈಕಿ ಒಬ್ಬರನ್ನು ತಕ್ಷಣವೇ ರಕ್ಷಿಸಲಾಗಿತ್ತು. ಆದರೆ, ಮತ್ತೊಬ್ಬ ಅಧಿಕಾರಿ (ವೆಪನ್ ಸಿಸ್ಟಮ್ಸ್ ಆಫೀಸರ್), ಇರಾನ್‌ನ ಗುಡ್ಡಗಾಡು ಪ್ರದೇಶದ ಆಳದಲ್ಲಿ ಸಿಲುಕಿಕೊಂಡಿದ್ದರು.

​ ತೀವ್ರವಾಗಿ ಗಾಯಗೊಂಡಿದ್ದ ಅಮೆರಿಕದ ಆ ಕರ್ನಲ್ ದರ್ಜೆಯ ಅಧಿಕಾರಿ, ಇರಾನ್ ಪಡೆಗಳಿಂದ ತಪ್ಪಿಸಿಕೊಳ್ಳಲು ಸುಮಾರು 7,000 ಅಡಿ ಎತ್ತರದ ಗುಡ್ಡವನ್ನು ಏರಿ ಅಡಗಿಕೊಂಡಿದ್ದರು.

​ಪೈಲಟ್ ಸಿಕ್ಕಿಬಿದ್ದ ಜಾಗಕ್ಕೆ ಇರಾನ್ ಸೈನಿಕರು ಹತ್ತಿರವಾಗದಂತೆ ತಡೆಯಲು ಅಮೆರಿಕ ಹತ್ತಾರು ಅತ್ಯಾಧುನಿಕ ಯುದ್ಧ ವಿಮಾನಗಳು ಮತ್ತು ಡ್ರೋನ್‌ಗಳನ್ನು ನಿಯೋಜಿಸಿತ್ತು. ಶತ್ರು ಪಡೆಗಳು 3 ಕಿ.ಮೀ. ಹತ್ತಿರ ಬಂದರೂ ದಾಳಿ ಮಾಡುವಂತೆ ಸೂಚಿಸಲಾಗಿತ್ತು.

​ ಅಮೆರಿಕದ ಕಮಾಂಡೋಗಳು ಹಗಲು ಹೊತ್ತಿನಲ್ಲೇ ಇರಾನ್ ಗಡಿಯೊಳಗೆ ನುಗ್ಗಿ ಪೈಲಟ್‌ನನ್ನು ಹೆಲಿಕಾಪ್ಟರ್ ಮೂಲಕ ಮೇಲೆತ್ತಿ ಸುರಕ್ಷಿತವಾಗಿ ಕರೆತಂದಿದ್ದಾರೆ.

​​ರಕ್ಷಣಾ ಕಾರ್ಯಾಚರಣೆ ಯಶಸ್ವಿಯಾದ ನಂತರ 'ಟ್ರೂತ್ ಸೋಶಿಯಲ್' ಜಾಲತಾಣದಲ್ಲಿ ಪೋಸ್ಟ್ ಮಾಡಿದ ಅಧ್ಯಕ್ಷ ಟ್ರಂಪ್, "WE GOT HIM!" (ನಾವು ಅವನನ್ನು ಪಡೆದೆವು!) ಎಂದು ಬರೆದು ಸಂಭ್ರಮಿಸಿದ್ದಾರೆ.

​"ನಮ್ಮ ಸೈನಿಕ ಹರಸಾಹಸಪಟ್ಟು ಪಾರಾಗಿದ್ದಾನೆ. ಆತ ತೀವ್ರವಾಗಿ ಗಾಯಗೊಂಡಿದ್ದರೂ ಅತ್ಯಂತ ಧೈರ್ಯಶಾಲಿಯಾಗಿದ್ದ. ಇರಾನ್ ಪಡೆಗಳು ಅವನನ್ನು ಬೇಟೆಯಾಡಲು ಹತ್ತಿರ ಬರುತ್ತಿದ್ದವು. ಆದರೆ, ನಮ್ಮ ವಾಯುಪಡೆಯು ವಿಶ್ವದ ಅತ್ಯಂತ ಮಾರಕ ಆಯುಧಗಳೊಂದಿಗೆ ಹೋಗಿ ಅವನನ್ನು ಕರೆತಂದಿದೆ" ಎಂದು ಟ್ರಂಪ್ ಹೇಳಿದ್ದಾರೆ.

​ಈ ಘಟನೆಯ ಬೆನ್ನಲ್ಲೇ ಇರಾನ್ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದು, ಅಮೆರಿಕ ತನ್ನ ಸಾರ್ವಭೌಮತ್ವವನ್ನು ಉಲ್ಲಂಘಿಸಿದೆ ಎಂದು ಆರೋಪಿಸಿದೆ. ಈ ಕಾರ್ಯಾಚರಣೆಯ ವೇಳೆ ನಡೆದ ಗುಂಡಿನ ಚಕಮಕಿಯಲ್ಲಿ ಇರಾನ್‌ನ ಮೂವರು ರೆವಲ್ಯೂಷನರಿ ಗಾರ್ಡ್‌ಗಳು ಮೃತಪಟ್ಟಿದ್ದಾರೆ ಎಂದು ವರದಿಗಳು ತಿಳಿಸಿವೆ.

​ಪ್ರಸ್ತುತ ರಕ್ಷಿಸಲ್ಪಟ್ಟ ಪೈಲಟ್‌ನನ್ನು ಕುವೈತ್‌ನ ಅಮೆರಿಕನ್ ಮಿಲಿಟರಿ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಚೇತರಿಸಿಕೊಳ್ಳುತ್ತಿದ್ದಾರೆ. ಈ ಕಾರ್ಯಾಚರಣೆಯು ಇರಾನ್ ಮತ್ತು ಅಮೆರಿಕ ನಡುವಿನ ಸಂಘರ್ಷವನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದೆ.