ವಿಜಯಪುರದಲ್ಲಿ ಮತ್ತೆ ಚಡ್ಡಿ ಗ್ಯಾಂಗ್ ಆಕ್ಟಿವ್ - ಸಾರ್ವಜನಿಕರ ನಿದ್ದೆ ಗೆಡಿಸಿದೆ ಡೆಡ್ಲಿ ಗ್ಯಾಂಗ್

ಅಪ್ಲಿಕೇಶನ್‌ನಲ್ಲಿ ಉಚಿತವಾಗಿ ಪೂರ್ಣ ವೀಡಿಯೊವನ್ನು ವೀಕ್ಷಿಸಿ

ವಿಜಯಪುರದಲ್ಲಿ ಮತ್ತೆ ಚಡ್ಡಿ ಗ್ಯಾಂಗ್ ಆಕ್ಟಿವ್ - ಸಾರ್ವಜನಿಕರ ನಿದ್ದೆ ಗೆಡಿಸಿದೆ ಡೆಡ್ಲಿ ಗ್ಯಾಂಗ್

ವಿಜಯಪುರ: ವಿಜಯಪುರದಲ್ಲಿ ಈಗ ಹೊಸದೊಂದು ಆತಂಕ ಶುರುವಾಗಿದೆ. ಬೇಸಿಗೆಯ ಸುಡು ಬಿಸಿಲಿನ ನಡುವೆಯೇ ಜಿಲ್ಲೆಗೆ ಖತರ್ನಾಕ್ ಕಳ್ಳರ ಗ್ಯಾಂಗ್ ಒಂದು ಎಂಟ್ರಿ ಕೊಟ್ಟಿದೆ. ಬರೀ ಚಡ್ಡಿ, ಕಚ್ಚೆ ಧರಿಸಿ, ಮುಖಕ್ಕೆ ಮುಖವಾಡ ಹಾಕಿಕೊಂಡು ಬರ್ತಿರೋ ಈ ಡೆಡ್ಲಿ ಗ್ಯಾಂಗ್, ಸಾರ್ವಜನಿಕರ ನಿದ್ದೆ ಗೆಡಿಸಿದೆ.

ಹೌದು..!ವಿಜಯಪುರ ತಾಲೂಕಿನ ಜುಮನಾಳ ಗ್ರಾಮದಲ್ಲಿ ಈ ಚಡ್ಡಿ ಗ್ಯಾಂಗ್ ಅಕ್ಷರಶಃ ದಾಂಗುಡಿ ಇಟ್ಟಿದ್ದು, ಜನ ಆತಂಕದ ಬದುಕುವಂತಾಗಿದೆ.

ವಿಜಯಪುರ ಜಿಲ್ಲೆಯಲ್ಲಿ ಖತರ್ನಾಕ್ ಕಳ್ಳರ ಹಾವಳಿ ಮಿತಿ ಮೀರಿದೆ. ಬೇಸಿಗೆ ಕಾಲ ಶುರುವಾಗುತ್ತಿದ್ದಂತೆ ವಿಜಯಪುರ ತಾಲೂಕಿನ ಜುಮನಾಳ ಗ್ರಾಮಕ್ಕೆ ಕಳ್ಳರ ಗ್ಯಾಂಗ್ ಎಂಟ್ರಿ ಕೊಟ್ಟಿದೆ. ಬರೀ ಚಡ್ಡಿ, ಕಚ್ಚೆ ಧರಿಸಿ, ಮುಖಕ್ಕೆ ಮುಖವಾಡ ಹಾಕಿಕೊಂಡು ಬರುತ್ತಿರುವ ಈ ಗ್ಯಾಂಗ್ ಕಂಡು ಜನ ಬೆಚ್ಚಿ ಬಿದ್ದಿದ್ದಾರೆ. ಬರೀ ಕೈಯಲ್ಲಿ ಬಾರದ ಈ ಕಳ್ಳರು, ಬೆನ್ನ ಹಿಂದೆ ತಲವಾರ್, ಮಚ್ಚುಗಳಂತಹ ಮಾರಕಾಸ್ತ್ರಗಳನ್ನು ಇಟ್ಟುಕೊಂಡು ಡೆಡ್ಲಿಯಾಗಿ ದಾಳಿ ನಡೆಸುತ್ತಿದ್ದಾರೆ. ನಾಲ್ಕು ಜನರ ಈ ಚಡ್ಡಿ ಗ್ಯಾಂಗ್ ಜುಮನಾಳ ಗ್ರಾಮದಲ್ಲಿ ಸೃಷ್ಟಿಸಿರುವ ಭೀತಿ ಅಷ್ಟಿಷ್ಟಲ್ಲ.

ಬೇಸಿಗೆಯ ಧಗಧಗಿಸುವ ಸೆಕೆಗೆ ಗ್ರಾಮೀಣ ಭಾಗದ ಜನ ರಾತ್ರಿ ವೇಳೆ ತಂಪು ಗಾಳಿಗಾಗಿ ಮನೆ ಹೊರಗೆ ಅಥವಾ ಮನೆಯ ಛತ್ ಮೇಲೆ ಮಲಗುತ್ತಿದ್ದಾರೆ. ಇದನ್ನೇ ಬಂಡವಾಳ ಮಾಡಿಕೊಂಡಿರುವ ಈ ಕಳ್ಳರ ಗ್ಯಾಂಗ್, ಜನ ಹೊರಗೆ ಮಲಗಿರುವ ಮನೆಗಳನ್ನೇ ಟಾರ್ಗೆಟ್ ಮಾಡುತ್ತಿದೆ. ಜನ ಹೊರಗಡೆ ಮಲಗಿದ್ದಾಗ ಸದ್ದಿಲ್ಲದೇ ಮನೆಯ ಬಾಗಿಲು ಮುರಿದು ಒಳನುಗ್ಗುವ ಖದೀಮರು, ಕೈಗೆ ಸಿಕ್ಕಿದ್ದನ್ನೆಲ್ಲಾ ದೋಚುತ್ತಿದ್ದಾರೆ...

ಜುಮನಾಳ ಗ್ರಾಮದ ಶ್ರೀಕಾಂತ್ ಪೂಜಾರಿ ಎಂಬುವರ ಮನೆಯಲ್ಲಿ ಈ ಚಡ್ಡಿ ಗ್ಯಾಂಗ್ ಕಳ್ಳತನ ಮಾಡಿದೆ. ಮನೆಯವರು ಹೊರಗೆ ಮಲಗಿದ್ದನ್ನು ಗಮನಿಸಿ ನುಗ್ಗಿದ ಕಳ್ಳರು, ಮಹಿಳೆಯೊಬ್ಬರ 20 ಗ್ರಾಂ ತೂಕದ ಚಿನ್ನದ ತಾಳಿಸರ ಹಾಗೂ ಮನೆಯಲ್ಲಿದ್ದ 60 ಸಾವಿರ ನಗದನ್ನು ದೋಚಿ ಪರಾರಿಯಾಗಿದ್ದಾರೆ. ಸದ್ಯ ಜುಮನಾಳ ಗ್ರಾಮಸ್ಥರು ಕಳ್ಳರ ಈ ಹಾವಳಿಯಿಂದ ತೀವ್ರ ಆತಂಕಕ್ಕೆ ಒಳಗಾಗಿದ್ದಾರೆ. ಸದ್ಯ ಈ ಕಳ್ಳರ ಓಡಾಟದ ಸಂಪೂರ್ಣ ವಿಡಿಯೋ ಸಿಸಿ ಕ್ಯಾಮೆರಾ ದಲ್ಲಿ ಸೆರೆಯಾಗಿದ್ದು ತಕ್ಷಣವೇ ಪೊಲೀಸರು ರಾತ್ರಿ ಗಸ್ತನ್ನು ಹೆಚ್ಚಿಸಿ, ಈ ಡೆಡ್ಲಿ ಚಡ್ಡಿ ಗ್ಯಾಂಗ್‌ಗೆ ಬ್ರೇಕ್ ಹಾಕಬೇಕೆಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ. ಇನ್ನಾದರೂ ವಿಜಯಪುರ ಜಿಲ್ಲಾ ಪೊಲೀಸ್ ಇಲಾಖೆ ಎಚ್ಚೆತ್ತುಕೊಂಡು, ಜುಮನಾಳ ಗ್ರಾಮ ಸೇರಿದಂತೆ ಸುತ್ತಮುತ್ತಲಿನ ಭಾಗದಲ್ಲಿರುವ ಈ ಕಳ್ಳರ ಗ್ಯಾಂಗ್ ಹೆಡೆಮುರಿ ಕಟ್ಟುತ್ತಾ ಎನ್ನುವುದನ್ನು ಕಾದು ನೋಡಬೇಕಾಗಿದೆ.

ಪಬ್ಲಿಕ್ ನೆಕ್ಸ್ಟ್ ವಿಜಯಪುರ

Edited By :