ಲಂಡನ್‌ನ ಜನನಿಬಿಡ ರಸ್ತೆಯೊಂದರಲ್ಲಿ ಪ್ರವಾಸಿಗರನ್ನು ಆಕರ್ಷಿಸುವ ಮೂಲಕ ಕೇವಲ ಕೆಲವೇ ನಿಮಿಷಗಳಲ್ಲಿ ಹಣ ಗಳಿಸಲು ಮಲಯಾಳಿ ಯುವಕನೊಬ್ಬ ಮಾಡಿದ ವಿಶಿಷ್ಟ ಪ್ರಯತ್ನ ಇದೀಗ ಜಾಲತಾಣದಲ್ಲಿ ವೈರಲ್​ ಆಗಿದೆ.

ವಿಷ್ಣು ವಿಜಯಾಧರನ್ ಎಂಬ ಹೆಸರಿನ ಯುವಕ, ಸೆಂಟ್ರಲ್ ಲಂಡನ್ ಪ್ರದೇಶದಲ್ಲಿ ಅಲ್ಲಿನ ಸ್ಥಳೀಯರು ಹಾಗೂ ಪ್ರವಾಸಿಗರ ಸುಂದರ ಫೋಟೋಗಳನ್ನು ಕ್ಲಿಕ್ಕಿಸಿ ಅವರಿಗೆ ಮಾರಾಟ ಮಾಡುವ ಮೂಲಕ ಹಣ ಗಳಿಕೆ ಮಾಡುತ್ತಿದ್ದ. ತಾನು ತೆಗೆದ ಪ್ರತಿ ಫೋಟೋಗೆ ಐದು ಪೌಂಡ್ (ಸುಮಾರು 540 ರೂಪಾಯಿ) ದರವನ್ನು ನಿಗದಿ ಪಡಿಸಿದ್ದ.

ಲಂಡನ್‌ನಲ್ಲಿ ಪೊಲರಾಯ್ಡ್ ಚಿತ್ರಗಳನ್ನು ಮಾರಾಟ ಮಾಡುವ ಮೂಲಕ ಎಷ್ಟು ಹಣ ಗಳಿಸಬಹುದು ಎಂಬ ವಿಶಿಷ್ಟ ಚಾಲೆಂಜ್ ಜೊತೆಗೆ ವಿಷ್ಣು ಈ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. ಇನ್‌ಸ್ಟಾಗ್ರಾಮ್‌ನಲ್ಲಿ ವಿಡಿಯೋ ಪೋಸ್ಟ್ ಮಾಡಿರುವ ಅವರು, "ನಾಳೆ ಯಾರ ವೀಸಾ ಅವಧಿ ಮುಗಿಯುತ್ತದೆಯೋ ಅವರು ಮಾತ್ರ ಇದನ್ನು ಪ್ರಯತ್ನಿಸಬೇಕು, ಕೇವಲ 10 ನಿಮಿಷಗಳಲ್ಲಿ ನಾವು ಎಷ್ಟು ಹಣ ಗಳಿಸಿದ್ದೇವೆ ಗೊತ್ತಾ?" ಎಂಬ ಶೀರ್ಷಿಕೆಯನ್ನು ನೀಡಿದ್ದಾರೆ. ಇದರೊಂದಿಗೆ, "ನಿಮ್ಮ ವೀಸಾ ನಾಳೆಯೇ ಮುಗಿಯುವುದಿದ್ದರೆ ಮಾತ್ರ ಇಂತಹ ಸಾಹಸಕ್ಕೆ ಕೈ ಹಾಕಿ" ಎಂದು ಹಾಸ್ಯಭರಿತ ಎಚ್ಚರಿಕೆಯನ್ನೂ ನೀಡಿದ್ದಾರೆ.

ಈ ವಿಶೇಷ ಪ್ರಯತ್ನಕ್ಕಾಗಿ ವಿಷ್ಣು ಅವರು ಸತತವಾಗಿ 38 ಫೋಟೋಗಳನ್ನು ಕ್ಲಿಕ್ಕಿಸಬಲ್ಲ ಕೊಡಾಕ್ (Kodak) ಕ್ಯಾಮೆರಾವನ್ನು ಖರೀದಿಸಿದ್ದರು. ಲಂಡನ್‌ಗೆ ಭೇಟಿ ನೀಡಿದ್ದ ಪ್ರವಾಸಿಗರು ವಿಷ್ಣು ಅವರ ಬಳಿ ಅತ್ಯಂತ ಉತ್ಸಾಹದಿಂದ ಬಂದು ಫೋಟೋ ತೆಗೆಸಿಕೊಳ್ಳುತ್ತಿರುವುದು ವಿಡಿಯೋದಲ್ಲಿ ಕಂಡುಬಂದಿದೆ.

ಈ ಅನುಭವದ ಕುರಿತು ಮಾತನಾಡಿರುವ ಯುವಕ, "ಮೊದಲ ಕೆಲವು ಬಿಸಿನೆಸ್‌ಗಳು ಮುಗಿದ ನಂತರ ನಾವೇನೋ ನಿಜಕ್ಕೂ ಮಿಲಿಯನೇರ್‌ಗಳಾಗಿ ಬಿಡುತ್ತೇವೆ ಎಂದೇ ನಾನು ಭಾವಿಸಿದ್ದೆ" ಎಂದು ತಮಾಷೆಯಾಗಿ ಹೇಳಿಕೊಂಡಿದ್ದಾರೆ.

ಆದರೆ, ಕೇವಲ ಹತ್ತು ನಿಮಿಷಗಳು ಕಳೆಯುವಷ್ಟರಲ್ಲಿ ವಿಷ್ಣು ಅವರ ಬಳಿಗೆ ಬಂದ ಮುಂದಿನ ಗ್ರಾಹಕರು ಬೇರೆ ಯಾರೂ ಅಲ್ಲ, ಅವರೇ ಲಂಡನ್ ಪೊಲೀಸರು. ಅಂದಹಾಗೆ, ಲಂಡನ್ ಕಾನೂನಿನ ಪ್ರಕಾರ, ಮುನ್ಸಿಪಾಲಿಟಿಯ ವಿಶೇಷ ಪರವಾನಗಿ (License) ಇಲ್ಲದೆ ರಸ್ತೆಗಳಲ್ಲಿ ವ್ಯಾಪಾರ ಮಾಡುವುದು ಮತ್ತು ಸಾರ್ವಜನಿಕರನ್ನು ತಾವೇ ಭೇಟಿಯಾಗಿ ಇಂತಹ ಬಿಸಿನೆಸ್ ಮಾಡುವುದನ್ನು ಕಡ್ಡಾಯವಾಗಿ ನಿಷೇಧಿಸಲಾಗಿದೆ. ವಿಷ್ಣು ಅವರು ಕೇವಲ 10 ನಿಮಿಷಗಳಲ್ಲಿ 11 ಪೌಂಡ್ (ಸುಮಾರು 1,200 ರೂಪಾಯಿ) ಗಳಿಸುವಷ್ಟರಲ್ಲಿ, ಅಲ್ಲಿಗೆ ಬಂದ ಪೊಲೀಸರು ಮತ್ತು ಸಿಟಿ ಎನ್‌ಫೋರ್ಸ್‌ಮೆಂಟ್ ಅಧಿಕಾರಿಗಳು ರಸ್ತೆಬದಿಯ ವ್ಯಾಪಾರವನ್ನು ತಡೆದಿದ್ದಾರೆ. ಅಲ್ಲದೆ, ವಿಷ್ಣುಗೆ ದಂಡ ಕೂಡ ಹಾಕಿದ್ದಾರೆ.

ಇಂತಹ ಸಣ್ಣ ವ್ಯಾಪಾರವನ್ನು ಮಾಡುವುದಕ್ಕೂ ಮುನ್ಸಿಪಾಲಿಟಿಯಿಂದ ವಿಶೇಷ ಅನುಮತಿ ಪಡೆಯಬೇಕೆಂಬ ವಿಷಯ ತಮಗೆ ತಿಳಿದಿರಲಿಲ್ಲ ಎಂದು ವಿಷ್ಣು ವಿಡಿಯೋದಲ್ಲಿ ಸ್ಪಷ್ಟಪಡಿಸಿದ್ದಾರೆ. ಆದರೆ, ಒಂದು ವೇಳೆ ಸೂಕ್ತವಾದ ಅಧಿಕೃತ ಪರವಾನಗಿಯನ್ನು ಪಡೆದುಕೊಂಡು ಈ ಕೆಲಸವನ್ನು ಮಾಡಿದರೆ, ಇಲ್ಲಿ ಅತ್ಯಂತ ಸುಲಭವಾಗಿ ಒಂದು ಗಂಟೆಗೆ ಬರೋಬ್ಬರಿ 100 ಪೌಂಡ್ (ಸುಮಾರು ಹತ್ತು ಸಾವಿರ ರೂಪಾಯಿ) ವರೆಗೂ ಹಣ ಗಳಿಸಬಹುದು ಎಂದೂ ಸಹ ತಿಳಿಸಿದ್ದಾರೆ.