ಇಂದಿನ ಯುವಜನರಲ್ಲಿ ಭಾರಿ ಸೌಂಡ್ ಮಾಡ್ತಿದೆ 'ಡಿಜಿಟಲ್ ಡಿಟಾಕ್ಸ್' ಟ್ರೆಂಡ್! ಸ್ಮಾರ್ಟ್‌ಫೋನ್ ಅಡಿಕ್ಷನ್‌ನಿಂದ ಹೊರಬರಲು ಯೂತ್ಸ್ ಮಾಡ್ತಿರೋ ಹೊಸ ಪ್ಲಾನ್ ಏನು? ಕಂಪ್ಲೀಟ್ ಸ್ಟೋರಿ ಓದಿ...

ಬೆಳಗ್ಗೆ ಎದ್ದ ತಕ್ಷಣ ಮೊಬೈಲ್ ನೋಡುವುದು, ಆಫೀಸ್‌ನಲ್ಲಿ ದಿನವಿಡೀ ಕಂಪ್ಯೂಟರ್ ಸ್ಕ್ರೀನ್ ಕಣ್ಣಿಗೆ ಕಟ್ಟುವುದು, ಮನೆಗೆ ಬಂದ ಮೇಲೂ ತಡರಾತ್ರಿವರೆಗೆ ಇನ್‌ಸ್ಟಾಗ್ರಾಮ್ ರೀಲ್ಸ್ ಅಥವಾ ಯೂಟ್ಯೂಬ್ ಶಾರ್ಟ್ಸ್ ಸ್ಕ್ರಾಲ್ ಮಾಡುವುದು... ಇದು ಇಂದಿನ ಬಹುತೇಕ ಯುವಜನತೆಯ ದಿನಚರಿ. ​ಆದರೆ, ಈಗ ಮೆಟ್ರೋ ಸಿಟಿಗಳ ಯುವ ಪೀಳಿಗೆಯಲ್ಲಿ ಈ "ಸ್ಕ್ರೀನ್ ಅಡಿಕ್ಷನ್" ನಿಂದ ದೂರವಿರಲು ಒಂದು ಹೊಸ ಟ್ರೆಂಡ್ ಶುರುವಾಗಿದೆ. ಅದೇ 'ಡಿಜಿಟಲ್ ಡಿಟಾಕ್ಸ್' (Digital Detox).

​ಏನಿದು ಡಿಜಿಟಲ್ ಡಿಟಾಕ್ಸ್?

​ದೇಹದಲ್ಲಿರುವ ಕಲ್ಮಶಗಳನ್ನು ಹೊರಹಾಕಲು 'ಡಿಟಾಕ್ಸ್ ಡ್ರಿಂಕ್ಸ್' ಕುಡಿಯುವಂತೆ, ಮೆದುಳಿಗೆ ಮತ್ತು ಮನಸ್ಸಿಗೆ ವಿಶ್ರಾಂತಿ ನೀಡಲು ಸ್ಮಾರ್ಟ್‌ಫೋನ್, ಲ್ಯಾಪ್‌ಟಾಪ್, ಸೋಶಿಯಲ್ ಮೀಡಿಯಾಗಳಿಂದ ನಿರ್ದಿಷ್ಟ ಅವಧಿಗೆ ಸಂಪೂರ್ಣವಾಗಿ ದೂರವಿರುವುದನ್ನೇ 'ಡಿಜಿಟಲ್ ಡಿಟಾಕ್ಸ್' ಎನ್ನಲಾಗುತ್ತದೆ.

ವಾರಾಂತ್ಯದಲ್ಲಿ (Weekends) ಅಥವಾ ದಿನದ ಕೆಲವು ಗಂಟೆಗಳ ಕಾಲ ಇಂಟರ್ನೆಟ್ ಪ್ರಪಂಚದಿಂದ ಸಂಪೂರ್ಣವಾಗಿ ಕಟ್‌ ಆಫ್ ಆಗುವುದು ಈ ಟ್ರೆಂಡ್‌ನ ಮುಖ್ಯ ಉದ್ದೇಶ.

​ಯುವಜನ ಈ ಕಡೆ ತಿರುಗಲು ಕಾರಣವೇನು?

​ಸೋಶಿಯಲ್ ಮೀಡಿಯಾದಲ್ಲಿ ಸದಾ ಇತರರ ಲೈಫ್ ನೋಡಿ 'ಫಿಯರ್ ಆಫ್ ಮಿಸ್ಸಿಂಗ್ ಔಟ್' (FOMO) ಆತಂಕಕ್ಕೆ ಒಳಗಾಗುತ್ತಿರುವುದು. ದಿನವಿಡೀ ನೂರಾರು ರೀಲ್ಸ್, ನೋಟಿಫಿಕೇಶನ್‌ಗಳು ಮತ್ತು ನೆಗೆಟಿವ್ ನ್ಯೂಸ್‌ಗಳನ್ನು ನೋಡಿ ಮೆದುಳು ಆಯಾಸಗೊಳ್ಳುತ್ತಿರುವುದು. ತಡರಾತ್ರಿಯವರೆಗಿನ ಸ್ಕ್ರೀನ್ ಟೈಮ್‌ನಿಂದಾಗಿ ಯುವಜನರಲ್ಲಿ ನಿದ್ರೆಯ ಸಮಸ್ಯೆ (Insomnia) ಹೆಚ್ಚಾಗುತ್ತಿರುವುದು.

​ರೀಲ್ಸ್ ಮೂಲಕವೇ 'ಆಫ್‌-ಲೈನ್' ಕ್ರೇಜ್ ವೈರಲ್!

​ವಿಪರ್ಯಾಸವೆಂದರೆ, ಈ ಡಿಜಿಟಲ್ ಡಿಟಾಕ್ಸ್ ಟ್ರೆಂಡ್ ಕೂಡ ಸೋಶಿಯಲ್ ಮೀಡಿಯಾದಲ್ಲೇ ಭಾರಿ ವೈರಲ್ ಆಗುತ್ತಿದೆ! ಯುವಕ-ಯುವತಿಯರು ತಾವು ವಾರಾಂತ್ಯದಲ್ಲಿ ಮೊಬೈಲ್ ಸ್ವಿಚ್ ಆಫ್ ಮಾಡಿ, ಪ್ರಕೃತಿಯ ಮಡಿಲಿಗೆ ಹೋದ ರೀಲ್ಸ್‌ಗಳನ್ನು #DigitalDetox, #Unplugged ಎಂಬ ಹ್ಯಾಶ್‌ಟ್ಯಾಗ್‌ಗಳೊಂದಿಗೆ ಹಂಚಿಕೊಳ್ಳುತ್ತಿದ್ದಾರೆ. ಮೊಬೈಲ್ ಇಲ್ಲದೆ ಕೇವಲ ಪುಸ್ತಕ ಓದುವುದು, ಟ್ರೆಕ್ಕಿಂಗ್ ಮಾಡುವುದು, ಕರಾವಳಿಯ ಬೀಚ್‌ಗಳಲ್ಲಿ ಸೂರ್ಯಾಸ್ತ ನೋಡುವುದು ಈಗ ಹೊಸ ಸ್ಟೇಟಸ್ ಸಿಂಬಲ್ ಆಗಿ ಬದಲಾಗುತ್ತಿದೆ.

​ಡಿಜಿಟಲ್ ಡಿಟಾಕ್ಸ್ ಮಾಡುವುದು ಹೇಗೆ? ಇಲ್ಲಿದೆ ಸಿಂಪಲ್ ಟಿಪ್ಸ್

ಅನಗತ್ಯ ಆ್ಯಪ್‌ಗಳ ನೋಟಿಫಿಕೇಶನ್‌ಗಳನ್ನು ಇಂದೇ ಮ್ಯೂಟ್ ಮಾಡಿ. ಊಟ ಮಾಡುವಾಗ ಮತ್ತು ಮಲಗುವ ಕನಿಷ್ಠ 1 ಗಂಟೆ ಮುಂಚೆ ಮೊಬೈಲ್ ಬಳಸಬೇಡಿ.‌ ವಾರದಲ್ಲಿ ಒಂದು ದಿನ (ಉದಾಹರಣೆಗೆ ಭಾನುವಾರ) ಕೇವಲ ಅಗತ್ಯ ಕರೆಗಳಿಗಷ್ಟೇ ಫೋನ್ ಬಳಸಿ, ಸೋಷಿಯಲ್ ಮೀಡಿಯಾದಿಂದ ದೂರವಿರಿ.

​ವೀಕೆಂಡ್‌ನಲ್ಲಿ ವಾಕಿಂಗ್ ಹೋಗುವುದು, ಗಿಡಗಳಿಗೆ ನೀರು ಹಾಕುವುದು ಅಥವಾ ನೆಚ್ಚಿನವರೊಂದಿಗೆ ಮುಖಾಮುಖಿ ಕುಳಿತು ಮಾತನಾಡುವುದನ್ನು ರೂಢಿಸಿಕೊಳ್ಳಿ.

​ತಂತ್ರಜ್ಞಾನ ನಮ್ಮ ಬದುಕನ್ನು ಸುಲಭಗೊಳಿಸಬೇಕೇ ಹೊರತು, ನಮ್ಮ ನೆಮ್ಮದಿಯನ್ನು ಕದಿಯಬಾರದು. ನೀವೂ ಈ ವೀಕೆಂಡ್ ಒಮ್ಮೆ 'ಡಿಜಿಟಲ್ ಡಿಟಾಕ್ಸ್' ಟ್ರೈ ಮಾಡಿ ನೋಡಿ.

-ಮನೋಜ್ ಕೆ.ಬೆಂಗ್ರೆ, ಮಂಗಳೂರು