ಟಿಕೆಟ್ ರಹಿತ ರೈಲಿನಲ್ಲಿ ಪ್ರಯಾಣ TTEಗಳ ದೌರ್ಜನ್ಯ : ಅಸಲಿಗೆ ಸಂಕಟ ಯಾರಿಗೆ?
ಬೆಂಗಳೂರು: ಭಾರತೀಯ ರೈಲ್ವೆಯ ಕಾಯ್ದಿರಿಸಿದ ಬೋಗಿಗಳಲ್ಲಿ ಟಿಕೆಟ್ ಇಲ್ಲದ ಪ್ರಯಾಣಿಕರ ಹಾವಳಿ ಹೆಚ್ಚಾಗುತ್ತಿದೆ. ಒಂದು ಕಡೆ ಟಿಕೆಟ್ ಇಲ್ಲದವರು ಸೀಟುಗಳನ್ನು ಆಕ್ರಮಿಸಿ ಇತರ ಪ್ರಯಾಣಿಕರಿಗೆ ಕಿರಿಕಿರಿ ಉಂಟುಮಾಡುತ್ತಿದ್ದರೆ, ಮತ್ತೊಂದೆಡೆ ಅವರನ್ನು ನಿಯಂತ್ರಿಸಬೇಕಾದ TTEಗಳೇ ಪ್ರಯಾಣಿಕರ ಮೇಲೆ ದೈಹಿಕ ಹಲ್ಲೆ ನಡೆಸುತ್ತಿರುವ ಘಟನೆಗಳು ಆತಂಕಕಾರಿ ಬೆಳವಣಿಗೆಯಾಗಿವೆ. ಟಿಕೆಟ್ ರಹಿತ ಪ್ರಯಾಣಿಕರು ಸಮಸ್ಯೆಯಾದರೂ, ಅವರ ಮೇಲೆ ದೈಹಿಕ ದೌರ್ಜನ್ಯ ನಡೆಸುವುದು ಕಾನೂನಿನ ಸ್ಪಷ್ಟ ಉಲ್ಲಂಘನೆಯಾಗಿದೆ.
ಹೌದು ಕಾಯ್ದಿರಿಸಿದ ಬೋಗಿಗಳಲ್ಲಿ ಟಿಕೆಟ್ ಇಲ್ಲದವರು ನುಗ್ಗುವುದು ಪ್ರಮುಖ ಸಮಸ್ಯೆಯಾಗಿದೆ. ಸಾವಿರಾರು ರೂಪಾಯಿ ತೆತ್ತು ಟಿಕೆಟ್ ಕಾಯ್ದಿರಿಸಿದವರಿಗೆ ಇದರಿಂದ ತೀವ್ರ ತೊಂದರೆಯಾಗುತ್ತಿದೆ. ಇದು ಶಿಸ್ತಿನ ಉಲ್ಲಂಘನೆಯಾಗಿದ್ದು, ಸಹ-ಪ್ರಯಾಣಿಕರ ಹಕ್ಕುಗಳನ್ನು ಕಸಿದುಕೊಂಡಂತಿದೆ.
ಸದ್ಯ ವೈರಲ್ ಆದ ವಿಡಿಯೋದಲ್ಲಿ ಟಿಟಿಇ ಮತ್ತು ಪ್ರಯಾಣಿಕನ ನಡುವೆ ವಾಗ್ವಾದ ನಡೆದಿದೆ. ಈ ವೇಳೆ ಟಿಟಿಇ ಪ್ರಯಾಣಿಕ ಕಾಲರ್ ಹಿಡಿದು ಅವಾಚ್ಚೆ ಪದಗಳನ್ನು ಬಳಸಿರುವುದನ್ನು ಕಾಣಬಹುದು. ಕಾನೂನಿನ ಪ್ರಕಾರ ಟಿಕೆಟ್ ಪರೀಕ್ಷಕರು (TTE) ಪ್ರಯಾಣಿಕರ ಮೇಲೆ ಕೈ ಮಾಡುವ ಅಧಿಕಾರ ಹೊಂದಿಲ್ಲ. ಅವರಿಗೆ ದಂಡ ವಿಧಿಸುವ ಅಥವಾ ರೈಲ್ವೆ ಪೊಲೀಸರಿಗೆ (RPF/GRP) ಮಾಹಿತಿ ನೀಡುವ ಅಧಿಕಾರವಿದೆಯೇ ಹೊರತು, ದೈಹಿಕ ಹಲ್ಲೆ ನಡೆಸುವ ಅಧಿಕಾರವಿಲ್ಲ. ಕತ್ತು ಪಟ್ಟಿ ಹಿಡಿಯುವುದು, ಕೆನ್ನೆಗೆ ಹೊಡೆಯುವುದು ಅಥವಾ ಅವಾಚ್ಯ ಶಬ್ದಗಳಿಂದ ನಿಂದಿಸುವುದು 'ರೈಲ್ವೆ ಸೇವಾ ನಡಾವಳಿ ನಿಯಮಗಳು' (Railway Services Conduct Rules) ಅಡಿಯಲ್ಲಿ ಶಿಕ್ಷಾರ್ಹ ಅಪರಾಧವಾಗಿದೆ.
ಟಿಕೆಟ್ ರಹಿತ ಪ್ರಯಾಣಿಕರಿಗೆ ಸಂಬಂಧಿಸಿದಂತೆ ಕಾನೂನು ಸ್ಪಷ್ಟವಾಗಿದೆ. ರೈಲ್ವೆ ಕಾಯ್ದೆ ಸೆಕ್ಷನ್ 138 ರ ಪ್ರಕಾರ, ಟಿಕೆಟ್ ಇಲ್ಲದವರಿಗೆ ದಂಡ ವಿಧಿಸಬಹುದು ಅಥವಾ ಅವರನ್ನು ಮುಂದಿನ ನಿಲ್ದಾಣದಲ್ಲಿ ಕೆಳಗಿಳಿಸಬಹುದು. ಒಂದು ವೇಳೆ ಪ್ರಯಾಣಿಕರು ಅತಿರೇಕವಾಗಿ ವರ್ತಿಸಿದರೆ, TTEಗಳು ತಕ್ಷಣ ರೈಲ್ವೆ ಸುರಕ್ಷಾ ಪಡೆಯ (RPF) ನೆರವು ಪಡೆಯಬೇಕು. ಪ್ರಯಾಣಿಕರ ಮೇಲೆ ದೈಹಿಕ ಹಲ್ಲೆ ನಡೆಸುವ TTEಗಳ ವಿರುದ್ಧ ಇಲಾಖೆಯು ಅಮಾನತು ಅಥವಾ ಕೆಲಸದಿಂದ ವಜಾಗೊಳಿಸುವಂತಹ ಕಠಿಣ ಶಿಸ್ತು ಕ್ರಮಗಳನ್ನು ಕೈಗೊಳ್ಳಬಹುದು.
ಈ ಸಮಸ್ಯೆಗೆ ಪರಿಹಾರವೆಂದರೆ, ಶಿಸ್ತು ತರಲು ಕಾನೂನು ಬಳಸಬೇಕೇ ಹೊರತು, ಕೈ ಬಳಸಬಾರದು. ರೈಲ್ವೆ ಇಲಾಖೆಯು ತಮ್ಮ ಸಿಬ್ಬಂದಿಗೆ, ವಿಶೇಷವಾಗಿ TTEಗಳಿಗೆ, 'ಸಂವಹನ ಕಲೆ' (Soft Skills) ಕುರಿತು ತರಬೇತಿ ನೀಡುವ ಅಗತ್ಯವಿದೆ. ಸೌಜನ್ಯಯುತವಾಗಿ ಮತ್ತು ಕಾನೂನಿನ ಚೌಕಟ್ಟಿನಲ್ಲಿಯೇ ಸಮಸ್ಯೆಗಳನ್ನು ನಿಭಾಯಿಸಲು ಅವರಿಗೆ ಸೂಕ್ತ ಮಾರ್ಗದರ್ಶನ ನೀಡಿದಾಗ ಮಾತ್ರ ಇಂತಹ ಅಹಿತಕರ ಘಟನೆಗಳನ್ನು ತಡೆಯಲು ಸಾಧ್ಯ.
PublicNext
17/12/2025 04:23 pm
ಸಂಬಂಧಿತ ಸುದ್ದಿ
LOADING...
