ಭಾರತದ ಮೊದಲ ಸರ್ಕಾರಿ 'ಚರ್ಮರೋಗ ಸಂಸ್ಥೆ' ಆರಂಭ - ಕಡಿಮೆ ದರದಲ್ಲಿ ಹೈಟೆಕ್ ಚಿಕಿತ್ಸೆ!

ಅಪ್ಲಿಕೇಶನ್‌ನಲ್ಲಿ ಉಚಿತವಾಗಿ ಪೂರ್ಣ ವೀಡಿಯೊವನ್ನು ವೀಕ್ಷಿಸಿ

ಭಾರತದ ಮೊದಲ ಸರ್ಕಾರಿ 'ಚರ್ಮರೋಗ ಸಂಸ್ಥೆ' ಆರಂಭ - ಕಡಿಮೆ ದರದಲ್ಲಿ ಹೈಟೆಕ್ ಚಿಕಿತ್ಸೆ!

ಜೈಪುರ: ಸೌಂದರ್ಯವರ್ಧಕ ಚಿಕಿತ್ಸೆ ಅಂದ ಕೂಡಲೇ ಲಕ್ಷಾಂತರ ರೂಪಾಯಿ ಖರ್ಚು ಮಾಡಬೇಕೆಂದು ಹೆದರುವವರಿಗೆ ಈಗ ಸಿಹಿ ಸುದ್ದಿಯಿದೆ. ರಾಜಸ್ಥಾನದ ಜೈಪುರದಲ್ಲಿರುವ ಸರ್ಕಾರಿ ಸ್ವಾಮ್ಯದ ಸವಾಯಿ ಮಾನ್ ಸಿಂಗ್ (SMS) ಆಸ್ಪತ್ರೆಯಲ್ಲಿ ಭಾರತದ ಮೊದಲ ಸಾರ್ವಜನಿಕ ವಲಯದ 'ಇನ್‌ಸ್ಟಿಟ್ಯೂಟ್ ಆಫ್ ಡರ್ಮಟಾಲಜಿ' (ಚರ್ಮರೋಗ ಸಂಸ್ಥೆ) ಸಾರ್ವಜನಿಕರ ಸೇವೆಗೆ ಸಜ್ಜಾಗಿದೆ.

ವೈದ್ಯಕೀಯ ಮತ್ತು ಆರೋಗ್ಯ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಗಾಯತ್ರಿ ರಾಥೋಡ್ ಅವರ ಪ್ರಕಾರ, ಬ್ರಿಟನ್‌ನ ಲಂಡನ್ ನಂತರ ವಿಶ್ವದ ಎರಡನೇ ಅತ್ಯಾಧುನಿಕ ಚರ್ಮರೋಗ ಸಂಸ್ಥೆ ಎಂಬ ಹೆಗ್ಗಳಿಕೆಗೆ ಇದು ಪಾತ್ರವಾಗಿದೆ. ಖಾಸಗಿ ಆಸ್ಪತ್ರೆಗಳಲ್ಲಿ ಲಕ್ಷಾಂತರ ರೂಪಾಯಿ ವೆಚ್ಚವಾಗುವ ಚಿಕಿತ್ಸೆಗಳು ಇಲ್ಲಿ ಅತ್ಯಂತ ಕಡಿಮೆ ದರದಲ್ಲಿ ಜನಸಾಮಾನ್ಯರಿಗೆ ಸಿಗಲಿವೆ.

ಈ ಸಂಸ್ಥೆಯು ಕೇವಲ ಚರ್ಮದ ಕಾಯಿಲೆಗಳಿಗಷ್ಟೇ ಸೀಮಿತವಾಗಿಲ್ಲ, ಸೌಂದರ್ಯಕ್ಕೆ ಸಂಬಂಧಿಸಿದ ಅತ್ಯಾಧುನಿಕ ತಂತ್ರಜ್ಞಾನಗಳನ್ನು ಒಳಗೊಂಡಿದೆ:

ಕೂದಲು ಉದುರುವಿಕೆಗೆ ಮುಕ್ತಿ: PRP (ಪ್ಲೇಟ್ಲೆಟ್ ರಿಚ್ ಪ್ಲಾಸ್ಮಾ) ವಿಧಾನದ ಮೂಲಕ ಕೂದಲು ಮರುಬೆಳವಣಿಗೆಗೆ ಚಿಕಿತ್ಸೆ.

ವಯಸ್ಸಾದಂತೆ ಕಾಣುವ ಸುಕ್ಕುಗಳಿಗೆ ಬ್ರೇಕ್: HIFU (ಹೈ ಇಂಟೆನ್ಸಿಟಿ ಫೋಕಸ್ಡ್ ಅಲ್ಟ್ರಾಸೌಂಡ್) ತಂತ್ರಜ್ಞಾನ ಬಳಸಿ ಚರ್ಮ ಬಿಗಿಗೊಳಿಸುವಿಕೆ.

ಲೇಸರ್ ಮ್ಯಾಜಿಕ್: ಬಿಳಿ ಕಲೆ (Vitiligo) ಮತ್ತು ಸೋರಿಯಾಸಿಸ್‌ಗೆ ಲೇಸರ್ ಥೆರಪಿ.

ಅಡ್ವಾನ್ಸ್ಡ್ ಮೆಷಿನ್: ಇಲ್ಲಿ ಡಯೋಡ್, ಫ್ರ್ಯಾಕ್ಷನಲ್ CO2 ಸೇರಿದಂತೆ ಆರು ವಿವಿಧ ರೀತಿಯ ಅತ್ಯಾಧುನಿಕ ಲೇಸರ್ ಯಂತ್ರಗಳನ್ನು ಅಳವಡಿಸಲಾಗಿದೆ.

ಜೈಪುರದ ಚರಕ್ ಭವನದಲ್ಲಿರುವ ಈ ಸಂಸ್ಥೆಯು ಖಾಸಗಿ ಆಸ್ಪತ್ರೆಗಳಷ್ಟೇ ಉತ್ತಮ ಗುಣಮಟ್ಟದ ಸೇವೆಯನ್ನು ನೀಡಲಿದೆ. ಹುಟ್ಟಿನಿಂದ ಬಂದ ಸೌಂದರ್ಯ ಸಮಸ್ಯೆಗಳು, ಕಲೆಗಳು ಹಾಗೂ ಇತರೆ ಚರ್ಮದ ಸಮಸ್ಯೆಗಳಿಗೆ ಇಲ್ಲಿ ಪರಿಹಾರ ಸಿಗಲಿದೆ. ಅಧಿಕಾರಿಗಳು ಶೀಘ್ರದಲ್ಲೇ ಈ ಸಂಸ್ಥೆಯನ್ನು ಪೂರ್ಣಪ್ರಮಾಣದಲ್ಲಿ ಕಾರ್ಯಾಚರಣೆಗೆ ತರಲು ಸಜ್ಜಾಗಿದ್ದಾರೆ.

Edited By :