VIDEO: ಅಮೆರಿಕಾದ ಭದ್ರತಾ ಕೋಟೆಗೆ ಲಗ್ಗೆ ಇಟ್ಟ ಡ್ರೋನ್! ಬಾಗ್ದಾದ್ ಸೇನಾ ನೆಲೆ ಮೇಲೆ ಭೀಕರ ದಾಳಿ
ಬಾಗ್ದಾದ್/ವಾಷಿಂಗ್ಟನ್: ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಕಾರ್ಮೋಡ ಮತ್ತಷ್ಟು ಕಪ್ಪಾಗಿದ್ದು, ಇರಾಕ್ನ ಬಾಗ್ದಾದ್ನಲ್ಲಿರುವ ಅಮೆರಿಕದ ಪ್ರಮುಖ ಸೇನಾ ನೆಲೆ 'ವಿಕ್ಟೋರಿಯಾ ಬೇಸ್' ಮೇಲೆ ಎಫ್ಪಿವಿ (FPV) ಡ್ರೋನ್ಗಳ ಮೂಲಕ ಭೀಕರ ದಾಳಿ ನಡೆಸಲಾಗಿದೆ. ಈ ದಾಳಿಯ ದೃಶ್ಯಗಳು ಜಾಗತಿಕ ಮಟ್ಟದಲ್ಲಿ ಸಂಚಲನ ಮೂಡಿಸಿದ್ದು, ಅಮೆರಿಕದ ರಕ್ಷಣಾ ವ್ಯವಸ್ಥೆಯ ಲೋಪದೋಷಗಳನ್ನು ಎತ್ತಿ ತೋರಿಸಿವೆ.
ರಾತ್ರಿ ವೇಳೆಯ ಅಟ್ಟಹಾಸ: ರಾಯಿಟರ್ಸ್ ಮತ್ತು ಫೋರ್ಬ್ಸ್ ವರದಿ ಮಾಡಿರುವಂತೆ, ಅತ್ಯಾಧುನಿಕ ಎಫ್ಪಿವಿ ಡ್ರೋನ್ಗಳು ವಿಕ್ಟೋರಿಯಾ ಬೇಸ್ನ ಒಳಗೆ ನುಗ್ಗಿ ಸ್ಫೋಟಗೊಂಡಿವೆ. ದಾಳಿಯ ಬಳಿಕ ಕಟ್ಟಡಗಳು ಹೊತ್ತಿ ಉರಿಯುತ್ತಿರುವ ಮತ್ತು ದಟ್ಟ ಹೊಗೆ ಆವರಿಸಿರುವ ವಿಡಿಯೋಗಳು ಹೊರಬಂದಿವೆ. ಭಾರಿ ಆರ್ಥಿಕ ಹೊಡೆತ: ಬಿಬಿಸಿ (BBC) ವಿಶ್ಲೇಷಣೆಯ ಪ್ರಕಾರ, ಸಂಘರ್ಷದ ಮೊದಲ ಎರಡು ವಾರಗಳಲ್ಲೇ ಇರಾನ್ ಬೆಂಬಲಿತ ಗುಂಪುಗಳು ನಡೆಸಿದ ದಾಳಿಯಿಂದ ಅಮೆರಿಕಕ್ಕೆ ಅಂದಾಜು 800 ಮಿಲಿಯನ್ ಡಾಲರ್ (ಸುಮಾರು ₹6,700 ಕೋಟಿಗೂ ಹೆಚ್ಚು) ನಷ್ಟ ಸಂಭವಿಸಿದೆ. ಈ ದಾಳಿಗಳು ಅಮೆರಿಕದ ಅತ್ಯಾಧುನಿಕ ವಾಯು ರಕ್ಷಣಾ ವ್ಯವಸ್ಥೆ (Air Defense) ಮತ್ತು ಸಂವಹನ ಜಾಲವನ್ನು ಭೇದಿಸುವಲ್ಲಿ ಯಶಸ್ವಿಯಾಗಿರುವುದು ಪೆಂಟಗನ್ ಪಾಲಿಗೆ ನುಂಗಲಾರದ ತುತ್ತಾಗಿದೆ.
ಅಮೆರಿಕ ಮತ್ತು ಇರಾನ್ ನಡುವಿನ ಈ ನೇರ ಸಂಘರ್ಷವು ಈಗ ನೆರೆಯ ರಾಷ್ಟ್ರಗಳಿಗೂ ಹರಡುವ ಭೀತಿ ಎದುರಾಗಿದೆ. "ಈ ಉದ್ವಿಗ್ನತೆಯು ಯುಎಇ (UAE) ಮತ್ತು ಬಹ್ರೇನ್ನಂತಹ ದೇಶಗಳಿಗೂ ವ್ಯಾಪಿಸುವ ಸಾಧ್ಯತೆಯಿದೆ. ಇದರಿಂದ ಇಡೀ ಗಲ್ಫ್ ಪ್ರದೇಶವು ಮಹಾಯುದ್ಧದ ಅಖಾಡವಾಗಬಹುದು," ಎಂದು ರಾಜತಾಂತ್ರಿಕ ತಜ್ಞರು ಎಚ್ಚರಿಸಿದ್ದಾರೆ. ಇಸ್ರೇಲ್ ಮತ್ತು ಅಮೆರಿಕ ಜಂಟಿಯಾಗಿ ಇರಾನ್ ಮೇಲೆ ನಡೆಸಿದ ದಾಳಿಗೆ ಪ್ರತಿಯಾಗಿ ಈ ಡ್ರೋನ್ ದಾಳಿಗಳು ನಡೆಯುತ್ತಿವೆ ಎಂದು ಹೇಳಲಾಗುತ್ತಿದೆ. ಇದರಿಂದಾಗಿ ಜಾಗತಿಕ ತೈಲ ಮಾರುಕಟ್ಟೆ ಮತ್ತು ಅಂತರಾಷ್ಟ್ರೀಯ ಭದ್ರತೆಯ ಮೇಲೆ ತೀವ್ರ ಪರಿಣಾಮ ಬೀರುವ ಆತಂಕ ಎದುರಾಗಿದೆ.
PublicNext
21/03/2026 12:44 pm
ಸಂಬಂಧಿತ ಸುದ್ದಿ
LOADING...
