ಅಕ್ರಮ ಸಂಬಂಧದ ದ್ವೇಷಕ್ಕೆ ಯುವಕ ಬಲಿ - ಜಮಖಂಡಿಯಲ್ಲಿ ಭೀಕರ ಕೊಲೆ!

ಅಪ್ಲಿಕೇಶನ್‌ನಲ್ಲಿ ಉಚಿತವಾಗಿ ಪೂರ್ಣ ವೀಡಿಯೊವನ್ನು ವೀಕ್ಷಿಸಿ

ಅಕ್ರಮ ಸಂಬಂಧದ ದ್ವೇಷಕ್ಕೆ ಯುವಕ ಬಲಿ - ಜಮಖಂಡಿಯಲ್ಲಿ ಭೀಕರ ಕೊಲೆ!

ಜಮಖಂಡಿ ತಾಲೂಕಿನ ಸಾವಳಗಿ ಪೊಲೀಸ್ ಠಾಣೆ ವ್ಯಾಪ್ತಿಯ ಕನ್ನೋಳಿ ಗ್ರಾಮದ ಬಳಿ ಕೊಲೆ ಪ್ರಕರಣ ವರದಿಯಾಗಿದೆ. ಮೃತರನ್ನು ಸೋಮು ಅಲಿಯಾಸ್ ಸೋಮಲಿಂಗ ಪಡಸಲಗಿ (36) ಎಂದು ಗುರುತಿಸಲಾಗಿದೆ.

ಆರೋಪಿ ಸದಾಶಿವ ಪಡಸಲಗಿ ಮೃತರ ದೊಡ್ಡಪ್ಪನ ಮಗನಾಗಿದ್ದಾನೆ. ಆರೋಪಿಯ ಪತ್ನಿ ಹಾಗೂ ಮೃತರ ನಡುವೆ ಅನೈತಿಕ ಸಂಬಂಧ ಇದೆ ಎಂಬ ಆರೋಪದ ಹಿನ್ನೆಲೆಯಲ್ಲಿ ಇವರಿಬ್ಬರ ನಡುವೆ ಹಳೆಯ ವೈಷಮ್ಯವೂ ಇತ್ತು. ಸೋಮು ಪಡಸಲಗಿ ನಿನ್ನೆ ಸೋಮವಾರ ಸಂಜೆ ಹೊಸ ಕಾರು ಖರೀದಿಸಿ ಪೂಜೆ ಮಾಡಿಕೊಂಡು ಸುಮಾರು 7:30 ಗಂಟೆಗೆ ತಮ್ಮ ಊರಿಗೆ ಮರಳುತ್ತಿದ್ದ ವೇಳೆ, ಸದಾಶಿವ ಪಡಸಲಗಿ ತನ್ನ ಸಹಚರರಾದ ರವಿ ಪಾಟೀಲ್ ಹಾಗೂ ನವಿ ಅವರೊಂದಿಗೆ ಬೇರೆ ಕಾರಿನಲ್ಲಿ ಬಂದು ಕನೋಲಿ ಗ್ರಾಮದ ಮುಖ್ಯ ಜಂಕ್ಷನ್ ಬಳಿ ಕಾಯುತ್ತಿದ್ದರು.

ಈ ವೇಳೆ ಮೃತ ಸೋಮು ಅಲಿಯಾಸ್ ಸೋಮಲಿಂಗ ಪಡಸಲಗಿ ಸ್ಥಳಕ್ಕೆ ಬಂದಾಗ, ಅವರ ಹಾಗೂ ಸದಾಶಿವ ಪಡಸಲಗಿ ನಡುವೆ ವಾಗ್ವಾದ ನಡೆದಿದೆ. ಮೃತರು ಕಾರಿನಿಂದ ಕೆಳಗಿಳಿದ ತಕ್ಷಣ, ಸದಾಶಿವ ಹಾಗೂ ಆತನ ಇಬ್ಬರು ಸಹಚರರು ಸೇರಿ ಮೂರು ಬಾರಿ ಚಾಕುವಿನಿಂದ ಇರಿದಿದ್ದಾರೆ. ಪರಿಣಾಮವಾಗಿ ಸೋಮು ಕಾರಿನ ಪಕ್ಕದಲ್ಲೇ ಕುಸಿದು ಬಿದ್ದು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.

ಕೊಲೆ ಮಾಡಿದ ನಂತರ ಕಾರಿನಲ್ಲಿ ಇದ್ದ ಪೆಟ್ರೋಲ್ ಬಾಟಲಿಯನ್ನು ತೆಗೆದುಕೊಂಡು ಕಾರಿಗೆ ಹಾಗೂ ಮೃತದೇಹಕ್ಕೆ ಬೆಂಕಿ ಹಚ್ಚಲಾಗಿದೆ. ಸದಾಶಿವ ಪಡಸಲಗಿ, ರವಿ ಪಾಟೀಲ್ ಹಾಗೂ ನವಿ ಅವರನ್ನು ಸ್ಥಳದಲ್ಲೇ ವಶಕ್ಕೆ ಪಡೆಯಲಾಗಿದೆ. ಕೊಲೆ ಪ್ರಕರಣದಲ್ಲಿ ಬಳಸಿದ ಆಯುಧವನ್ನೂ ವಶಪಡಿಸಿಕೊಳ್ಳಲಾಗಿದೆ. ಸಾವಳಗಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಮುಂದಿನ ತನಿಖೆ ಕೈಗೊಳ್ಳಲಾಗಿದೆ.

Edited By :