ಡೀಪ್ ಬ್ರೈನ್ ಸ್ಟಿಮ್ಯುಲೇಷನ್ (DBS) ಚಿಕಿತ್ಸೆ ಎಷ್ಟು ಪರಿಣಾಮಕಾರಿ? ವೆಚ್ಚ ಎಷ್ಟು?
ಮಣಿಪಾಲ; ಡೀಪ್ ಬ್ರೈನ್ ಸ್ಟಿಮ್ಯುಲೇಷನ್ (DBS) ಅನ್ನು ಸಾಮಾನ್ಯವಾಗಿ ಔಷಧಿಗಳ ಪರಿಣಾಮ ಕಡಿಮೆಯಾಗುವ ಹಂತದಲ್ಲಿ ಮಾಡಲಾಗುತ್ತದೆ. ಈ ಚಿಕಿತ್ಸೆಯಲ್ಲಿ ಮೆದುಳಿನ ನಿರ್ದಿಷ್ಟ ಭಾಗಕ್ಕೆ ಎಲೆಕ್ಟ್ರೋಡ್ಗಳನ್ನು ಅಳವಡಿಸಿ, ಅವುಗಳನ್ನು ಎದೆಯ ಭಾಗದಲ್ಲಿ ಅಳವಡಿಸುವ ಇಂಪ್ಲಾಂಟೆಬಲ್ ಪಲ್ಸ್ ಜನರೇಟರ್ (IPG) ಎಂಬ ಬ್ಯಾಟರಿಗೆ ಸಂಪರ್ಕಿಸಲಾಗುತ್ತದೆ.
ಈ ಬ್ಯಾಟರಿ ರೀಚಾರ್ಜ್ ಮಾಡಬಹುದಾದ ವ್ಯವಸ್ಥೆಯನ್ನು ಹೊಂದಿದ್ದು, ಮೊಬೈಲ್ ಫೋನ್ ಚಾರ್ಜ್ ಮಾಡುವ ರೀತಿಯಲ್ಲೇ ಮರುಚಾರ್ಜ್ ಮಾಡಬಹುದು. ಒಮ್ಮೆ ಅಳವಡಿಸಿದ ನಂತರ ಸಾಮಾನ್ಯವಾಗಿ 15 ರಿಂದ 25 ವರ್ಷಗಳವರೆಗೆ ಬ್ಯಾಟರಿ ಕಾರ್ಯನಿರ್ವಹಿಸಬಹುದು. ಈ ಅವಧಿಯಲ್ಲಿ ಮೆದುಳಿಗೆ ನಿರಂತರ ವಿದ್ಯುತ್ ಪ್ರಚೋದನೆ ನೀಡುವುದರಿಂದ ಚಿಕಿತ್ಸೆಯ ಪರಿಣಾಮವೂ ಮುಂದುವರಿಯುತ್ತದೆ.
DBS ಚಿಕಿತ್ಸೆ ವಿಶೇಷವಾಗಿ ಕೈ ನಡುಗುವುದು (Tremor), ಚಲನೆಯ ನಿಧಾನಗತಿ (Bradykinesia), ದೇಹದ ಗಟ್ಟಿತನ (Rigidity), ಔಷಧಿಗಳ ಪರಿಣಾಮ ಏರಿಳಿತ (Motor Fluctuations) ಹಾಗೂ ಡಿಸ್ಕೈನೇಷಿಯಾ (Dyskinesia) ಮೊದಲಾದ ಸಮಸ್ಯೆಗಳನ್ನು ನಿಯಂತ್ರಿಸಲು ಪರಿಣಾಮಕಾರಿಯಾಗಿದೆ. ಸೂಕ್ತ ರೋಗಿಗಳಲ್ಲಿ ಸುಮಾರು 70–80% ರಷ್ಟು ಲಕ್ಷಣಗಳಲ್ಲಿ ಸುಧಾರಣೆ ಕಂಡುಬರಬಹುದು.
ಭಾರತದಲ್ಲಿ ಈ ಚಿಕಿತ್ಸೆ ಕಳೆದ 20–30 ವರ್ಷಗಳಿಂದ ಲಭ್ಯವಿದ್ದು, ಆರಂಭದಲ್ಲಿ ದೊಡ್ಡ ನಗರಗಳಿಗೆ ಮಾತ್ರ ಸೀಮಿತವಾಗಿತ್ತು. ಈಗ ಈ ಸೌಲಭ್ಯ ಕೆಎಂಸಿ (KMC) ಸೇರಿದಂತೆ ಹಲವು ಪ್ರಮುಖ ಆಸ್ಪತ್ರೆಗಳಲ್ಲೂ ಲಭ್ಯವಿದೆ.
DBS ಚಿಕಿತ್ಸೆಯ ವೆಚ್ಚ ಹೆಚ್ಚು ಕಾಣಲು ಪ್ರಮುಖ ಕಾರಣ, ಇದರಲ್ಲಿ ಬಳಸುವ ಉತ್ತಮ ಗುಣಮಟ್ಟದ ಆಮದು ಮಾಡಲಾದ ಎಲೆಕ್ಟ್ರೋಡ್ಗಳು ಮತ್ತು ಬ್ಯಾಟರಿ, ಜೊತೆಗೆ ಅತ್ಯಂತ ನಿಖರವಾಗಿ ಶಸ್ತ್ರಚಿಕಿತ್ಸೆ ನಡೆಸಬೇಕಾಗಿರುವುದು. ಸಾಮಾನ್ಯವಾಗಿ ಸುಮಾರು ₹20 ಲಕ್ಷದವರೆಗೆ ವೆಚ್ಚ ಬರಬಹುದು. ಆದರೆ ಒಂದೇ ಬಾರಿ ಚಿಕಿತ್ಸೆ ಪಡೆದ ನಂತರ ಹಲವು ವರ್ಷಗಳ ಕಾಲ ಉತ್ತಮ ಗುಣಮಟ್ಟದ ಜೀವನ ನಡೆಸಲು ಸಾಧ್ಯವಾಗುವುದರಿಂದ, ಸೂಕ್ತ ರೋಗಿಗಳಿಗೆ ಇದು ಅತ್ಯಂತ ಪರಿಣಾಮಕಾರಿ ಚಿಕಿತ್ಸೆಯಾಗಿದೆ.
PublicNext
29/06/2026 04:54 pm
ಸಂಬಂಧಿತ ಸುದ್ದಿ
LOADING...
