ಮುಂಡಗೋಡ: ಮಗಳ ನೆನಪಿನಲ್ಲಿ ಶುದ್ಧ ಕುಡಿಯುವ ನೀರಿನ ಘಟಕ ಸ್ಥಾಪನೆ; ದುಃಖದಲ್ಲೂ ಮಾನವೀಯತೆ ಮೆರೆದ ತಂದೆ.!
ಮುಂಡಗೋಡ: ಮುದ್ದಿನ ಮಗಳನ್ನು ಕಳೆದುಕೊಂಡ ದುಃಖ ಒಂದೆಡೆಯಾದರೆ, ಆಕೆಯ ನೆನಪನ್ನು ಸಮಾಜಮುಖಿ ಕಾರ್ಯದ ಮೂಲಕ ಶಾಶ್ವತವಾಗಿಸುವ ಸಂಕಲ್ಪ ಮತ್ತೊಂದೆಡೆ. ಮಗಳ ಅಗಲಿಕೆಯ ತೀವ್ರ ನೋವಿನ ನಡುವೆಯೂ ತಂದೆಯೊಬ್ಬರು ಮಾನವೀಯ ಕಾರ್ಯಕ್ಕೆ ಮುಂದಾಗುವ ಮೂಲಕ ಸಮಾಜಕ್ಕೆ ಮಾದರಿಯಾಗಿದ್ದಾರೆ.
ಮುಂಡಗೋಡ ಪಟ್ಟಣ ಪಂಚಾಯತಿಯ ಮಾಜಿ ಸದಸ್ಯ ಶೇಖರ್ ಲಮಾಣಿ ಅವರ 15 ವರ್ಷದ ಪುತ್ರಿ ಅಂಜನಿ ಕಳೆದ ಅಕ್ಟೋಬರ್ 23ರಂದು ಅಕಾಲಿಕವಾಗಿ ನಿಧನರಾಗಿದ್ದರು. ಮುದ್ದಿನ ಮಗಳ ಅಗಲಿಕೆಯಿಂದ ಕುಟುಂಬ ಶೋಕಸಾಗರದಲ್ಲಿ ಮುಳುಗಿತ್ತು. ಆದರೆ, ಮಗಳ ನೆನಪನ್ನು ಕೇವಲ ಕುಟುಂಬದೊಳಗೆ ಸೀಮಿತಗೊಳಿಸದೆ, ಸಮಾಜಕ್ಕೆ ಉಪಯುಕ್ತವಾಗುವ ಕಾರ್ಯದ ಮೂಲಕ ಆಕೆಯ ಸ್ಮರಣೆಯನ್ನು ಶಾಶ್ವತಗೊಳಿಸಲು ಶೇಖರ್ ಲಮಾಣಿ ನಿರ್ಧರಿಸಿದ್ದಾರೆ.
ಮಗಳ ನೆನಪಿನಲ್ಲಿ ಮಾನವೀಯ ಕಾರ್ಯ:
ತಮ್ಮ ದಿವಂಗತ ಪುತ್ರಿ ಅಂಜನಿ ಅವರ ಸ್ಮರಣಾರ್ಥ ಮುಂಡಗೋಡಿನ ಲಂಬಾಣಿ ತಾಂಡಾದಲ್ಲಿ ಸ್ವಂತ ವೆಚ್ಚದಲ್ಲಿ ಶುದ್ಧ ಕುಡಿಯುವ ನೀರಿನ ಘಟಕವನ್ನು ಸ್ಥಾಪಿಸಿ, ಸಾರ್ವಜನಿಕರ ಉಚಿತ ಬಳಕೆಗೆ ಸಮರ್ಪಿಸಿದ್ದಾರೆ.
ಮಂಗಳವಾರ ಮಗಳ ಪುಣ್ಯಸ್ಮರಣೆಯ ಅಂಗವಾಗಿ ಈ ಕುಡಿಯುವ ನೀರಿನ ಘಟಕವನ್ನು ಅಧಿಕೃತವಾಗಿ ಲೋಕಾರ್ಪಣೆಗೊಳಿಸಲಾಯಿತು. ಮಗಳ ಅಗಲಿಕೆಯ ನೋವಿನಲ್ಲಿಯೂ ಬಾಯಾರಿದ ಜನರಿಗೆ ನೀರಿನ ಆಸರೆಯಾಗುವಂತಹ ಕಾರ್ಯಕ್ಕೆ ಮುಂದಾಗಿರುವ ಶೇಖರ್ ಲಮಾಣಿ ಅವರ ನಡೆಗೆ ಸಾರ್ವಜನಿಕರು ಹಾಗೂ ಪಟ್ಟಣದ ಪ್ರಮುಖರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಮಗಳು ಇಂದು ನಮ್ಮೊಂದಿಗಿಲ್ಲದಿದ್ದರೂ, ಆಕೆಯ ನೆನಪಿನಲ್ಲಿ ಸ್ಥಾಪನೆಯಾದ ಈ ನೀರಿನ ಘಟಕದ ಮೂಲಕ ನೂರಾರು ಜನರ ದಾಹ ನೀಗಲಿದೆ. ದುಃಖವನ್ನು ಸಮಾಜಸೇವೆಯಾಗಿ ಪರಿವರ್ತಿಸಿದ ತಂದೆಯ ಈ ಕಾರ್ಯ ನಿಜಕ್ಕೂ ಸಾರ್ಥಕತೆಯ ಸಂಕೇತವಾಗಿದೆ.
ರಮೇಶ್ ತಾಳಿಕೋಟಿ ಪಬ್ಲಿಕ್ ನೆಕ್ಸ್ಟ್ ಮುಂಡಗೋಡ
Kshetra Samachara
03/11/2026 11:06 pm
ಸಂಬಂಧಿತ ಸುದ್ದಿ
LOADING...
