ಶೃಂಗೇರಿ ಫಲಿತಾಂಶಕ್ಕೆ ಮಹತ್ವದ ತಿರುವು : ಅಂಚೆ ಮತಗಳ ಮರು ಎಣಿಕೆಗೆ ಹೈಕೋರ್ಟ್ ಆದೇಶ!
ಬೆಂಗಳೂರು/ಚಿಕ್ಕಮಗಳೂರು: ಕಾಫಿನಾಡಿನ ಹೈವೋಲ್ಟೇಜ್ ಕ್ಷೇತ್ರವಾಗಿರುವ ಶೃಂಗೇರಿ ವಿಧಾನಸಭಾ ಚುನಾವಣಾ ಫಲಿತಾಂಶಕ್ಕೆ ಈಗ ಭಾರೀ ಟ್ವಿಸ್ಟ್ ಸಿಕ್ಕಿದೆ. ಕಳೆದ ಚುನಾವಣೆಯಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಟಿ.ಡಿ. ರಾಜೇಗೌಡ ಅವರ ಗೆಲುವನ್ನು ಪ್ರಶ್ನಿಸಿ ಬಿಜೆಪಿ ಅಭ್ಯರ್ಥಿ ಡಿ. ಎನ್. ಜೀವರಾಜ್ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ಕರ್ನಾಟಕ ಹೈಕೋರ್ಟ್, ಅಂಚೆ ಮತಗಳ ಮರು ಎಣಿಕೆಗೆ ಮಹತ್ವದ ಆದೇಶ ನೀಡಿದೆ.
ನ್ಯಾಯಮೂರ್ತಿ ನಟರಾಜನ್ ಅವರ ಏಕಸದಸ್ಯ ಪೀಠವು ಶೃಂಗೇರಿ ಕ್ಷೇತ್ರದ ಒಟ್ಟು 1,811 ಅಂಚೆ ಮತಗಳನ್ನು ಮರು ಎಣಿಕೆ ಮಾಡಬೇಕು ಎಂದು ಸೂಚಿಸಿದೆ. ಜೊತೆಗೆ, ಚುನಾವಣೆಯ ವೇಳೆ ರಿಜೆಕ್ಟ್ ಆಗಿದ್ದ 279 ಅಂಚೆ ಮತಗಳ ಕವರ್ಗಳನ್ನು ಸಹ ಮರು ಪರಿಶೀಲನೆಗೆ ಒಳಪಡಿಸಲು ಆದೇಶಿಸಿದೆ. ಎರಡು ವಾರಗಳೊಳಗೆ ಪ್ರಕ್ರಿಯೆ ಪೂರ್ಣಗೊಳಿಸಿ ಅಂತಿಮ ಫಲಿತಾಂಶ ಪ್ರಕಟಿಸಬೇಕು ಎಂದು ಕೋರ್ಟ್ ತಿಳಿಸಿದೆ.
ಆದರೆ, ಪ್ರಸ್ತುತ ಶಾಸಕ ಸ್ಥಾನವನ್ನು ಅಮಾನ್ಯಗೊಳಿಸದೆ, ಕೇವಲ ಎಣಿಕೆಯಲ್ಲಿ ದೋಷ ಸರಿಪಡಿಸುವತ್ತ ಗಮನ ಹರಿಸಲಾಗಿದೆ. meanwhile, ಆದೇಶದ ವಿರುದ್ಧ ಮೇಲ್ಮನವಿ ಸಲ್ಲಿಸಲು ರಾಜೇಗೌಡ ಪರ ವಕೀಲರು ಸಮಯ ಕೋರಿದ ಹಿನ್ನೆಲೆಯಲ್ಲಿ, ಹೈಕೋರ್ಟ್ ಎರಡು ವಾರಗಳ ತಾತ್ಕಾಲಿಕ ತಡೆ ನೀಡಿದೆ.
ಇನ್ನೊಂದೆಡೆ, “ಮೊದಲು 40 ಮತಗಳಿಂದ ಗೆಲುವು, ನಂತರ 151 ಮತಗಳ ಅಂತರ, ಕೊನೆಯಲ್ಲಿ 201 ಮತಗಳಿಂದ ಸೋಲು ಘೋಷಣೆ—ಈ ಗೊಂದಲವೇ ಅನುಮಾನಕ್ಕೆ ಕಾರಣ” ಎಂದು ಜೀವರಾಜ್ ಹೇಳಿದ್ದಾರೆ. ಮರು ಎಣಿಕೆಯಲ್ಲಿ ಪಾರದರ್ಶಕತೆ ಇದ್ದರೆ ತಾನೇ ಗೆಲ್ಲುವ ವಿಶ್ವಾಸವಿದೆ ಎಂದು ಹೇಳಿದ್ದಾರೆ.
ಇದೀಗ ಎಲ್ಲರ ಕಣ್ಣು ಅಂಚೆ ಮತಗಳ ಮರು ಎಣಿಕೆಯ ಮೇಲೆ ನೆಟ್ಟಿದ್ದು, ಶೃಂಗೇರಿಯಲ್ಲಿ ರಾಜಕೀಯ ಸಂಚಲನ ತಾರಕಕ್ಕೇರಿದೆ.
PublicNext
07/04/2026 11:59 am
ಸಂಬಂಧಿತ ಸುದ್ದಿ
LOADING...
