ವಾಷಿಂಗ್ಟನ್‌ ಡಿಸಿ: ನೀವು ಇಂದು ಬೆಳಗ್ಗೆ ಷೇರು ಮಾರುಕಟ್ಟೆಯನ್ನು ಗಮನಿಸಿದ್ದರೆ, ಅಲ್ಲಿ ಕೆಂಪು ಬಣ್ಣವೇ ಹೆಚ್ಚಾಗಿ ಕಾಣಿಸಿರಬೇಕು. ಅದರಲ್ಲೂ ಇನ್ಫೋಸಿಸ್, ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (ಟಿ.ಸಿ.ಎಸ್), ಎಚ್‌ಸಿಎಲ್ ಟೆಕ್, ಟೆಕ್ ಮಹೀಂದ್ರಾ ಮತ್ತು ವಿಪ್ರೋದಂತಹ ದಿಗ್ಗಜ ಕಂಪನಿಗಳ ಷೇರುಗಳು ಇಸ್ಪೀಟ್ ಎಲೆಗಳಂತೆ ಉರುಳಿಬಿದ್ದಿವೆ. ಬೆಳಗ್ಗೆ 9:30ರ ಹೊತ್ತಿಗೆ, ಈ ದೊಡ್ಡ ಟೆಕ್ ಕಂಪನಿಗಳು ಸುಮಾರು ಶೇ.6ರಷ್ಟು ಕುಸಿತವನ್ನು ಕಂಡಿದ್ದವು. ದಲಾಲ್ ಸ್ಟ್ರೀಟ್‌ನ ಬುಧವಾರದ ಸನ್ನಿವೇಶ ಹೇಗಿತ್ತೆಂದರೆ, ಮುಂಜಾನೆಯೇ ಪ್ರಬಲವಾದ ಭೂಕಂಪ ಸಂಭವಿಸಿದಂತಿತ್ತು. ಆದರೆ, ಈ ಭೂಕಂಪದ ಕೇಂದ್ರಬಿಂದು ಭಾರತವಾಗಿರಲಿಲ್ಲ ಎಂಬುದು ಗಮನಾರ್ಹ.

ಅಮೆರಿಕದಿಂದ ಅಪ್ಪಳಿಸಿದ ಸುನಾಮಿ

ಭಾರತ ಗಾಢ ನಿದ್ರೆಯಲ್ಲಿದ್ದಾಗ, ಪ್ರಪಂಚದ ಇನ್ನೊಂದು ಬದಿಯಾದ ಅಮೆರಿಕದಲ್ಲಿ ಶುರುವಾದ ಮಾರಾಟದ ಭರಾಟೆ, ಭಾರತದ ಷೇರು ಮಾರುಕಟ್ಟೆ ತೆರೆಯುವ ಹೊತ್ತಿಗೆ ಸುನಾಮಿಯಾಗಿ ಅಪ್ಪಳಿಸಿತ್ತು. ಈ ಸುನಾಮಿಯ ತೀವ್ರತೆ ಎಷ್ಟಿತ್ತೆಂದರೆ, ಒಂದೇ ಸೆಷನ್‌ನಲ್ಲಿ ಬರೋಬ್ಬರಿ 285 ಬಿಲಿಯನ್ ಡಾಲರ್‌ ನಷ್ಟ ಉಂಟಾಗಿತ್ತು. ಇದಕ್ಕೆಲ್ಲಾ 'ಆಂಥ್ರೋಪಿಕ್' ಎಂಬ ಕಂಪನಿಯು ಕಾರಣವಾಗಿದ್ದು, ಅದು ಬಿಡುಗಡೆ ಮಾಡಿರುವ ಹೊಸ ಎಐ ಟೂಲ್‌ಗಳು ಜಗತ್ತಿನ ಟೆಕ್ ಮಾರುಕಟ್ಟೆಯನ್ನು ಅಕ್ಷರಶಃ ಚಿಂದಿ ಚಿತ್ರಾನ್ನ ಮಾಡಿವೆ. ಇದರ ಪರಿಣಾಮ ಭಾರತಕ್ಕೂ ತಟ್ಟಿದೆ. ಹಾಗಾದರೆ, ಏನಿದು ಆಂಥ್ರೋಪಿಕ್ ಎಫೆಕ್ಟ್? ಐಟಿ ವಲಯವನ್ನೇ ನಡುಗಿಸಿದ ಆ ಟೂಲ್ ಯಾವುದು? ಬನ್ನಿ ವಿವರವಾಗಿ ನೋಡೋಣ.

ಜಾಗತಿಕ ಹೂಡಿಕೆದಾರರ ನಿದ್ದೆಗೆಡಿಸಿದ ಎಐ ಟೂಲ್‌ಗಳು

ಹೌದು, ಆಂಥ್ರೋಪಿಕ್ ಬಿಡುಗಡೆ ಮಾಡಿರುವ ಹೊಸ ಎಂಟರ್‌ಪ್ರೈಸ್ ಎಐ ಟೂಲ್‌ಗಳು ಜಾಗತಿಕ ಹೂಡಿಕೆದಾರರ ನಿದ್ದೆಗೆಡಿಸಿವೆ. ಇವು ಕೇವಲ ಸಾಮಾನ್ಯ ಅಪ್‌ಡೇಟ್‌ಗಳಲ್ಲ, ಬದಲಾಗಿ ಐಟಿ ಕಂಪನಿಗಳನ್ನೇ ನುಂಗಿಹಾಕಬಲ್ಲ ಸಾಮರ್ಥ್ಯವಿರುವ ಏಜೆಂಟ್‌ಗಳು ಎಂಬ ಭೀತಿ ಈಗ ಆವರಿಸಿದೆ. ಕಳೆದ ರಾತ್ರಿ ಅಮೆರಿಕದ ನ್ಯಾಸ್ಡಾಕ್ ತೀವ್ರವಾಗಿ ಕುಸಿದಿದ್ದು, ಟೆಕ್ ಸ್ಟಾಕ್‌ಗಳಿಗೆ ಬೆಂಕಿ ಬಿದ್ದಿತ್ತು. ಅಮೆರಿಕದ ಷೇರು ಮಾರುಕಟ್ಟೆಯಲ್ಲಿ ಕಳೆದ ರಾತ್ರಿ ನಡೆದಿದ್ದನ್ನು ವಿಶ್ಲೇಷಕರು "ಸಾಸೋಪೋಕ್ಯಾಲಿಪ್ಸ್" (SaaS-pocalypse) ಎಂದು ಕರೆಯುತ್ತಿದ್ದಾರೆ. ಅಂದರೆ, ಸಾಫ್ಟ್‌ವೇರ್ ಸ್ಟಾಕ್‌ಗಳ ಸಾಮೂಹಿಕ ಹತ್ಯಾಕಾಂಡ. ಈ ಹೇಳಿಕೆಯೇ ಸನ್ನಿವೇಶದ ಗಂಭೀರತೆಯನ್ನು ಎತ್ತಿ ತೋರಿಸುತ್ತದೆ. ಆಂಥ್ರೋಪಿಕ್ ಸಂಸ್ಥೆಯು ತನ್ನ ಜನಪ್ರಿಯ ಕ್ಲಾಡ್ ಚಾಟ್‌ಬಾಟ್‌ಗಾಗಿ ಹೊಸ ಪ್ಲಗಿನ್‌ಗಳನ್ನು ಬಿಡುಗಡೆ ಮಾಡಿದ ತಕ್ಷಣ, ಹೂಡಿಕೆದಾರರು ಭೀತಿಯಿಂದ ಷೇರುಗಳನ್ನು ಮಾರಾಟ ಮಾಡಲು ಮುಗಿಬಿದ್ದರು. ಒಂದೇ ಒಂದು ಟ್ರೇಡಿಂಗ್ ಸೆಷನ್‌ನಲ್ಲಿ ಸಾಫ್ಟ್‌ವೇರ್, ಲೀಗಲ್ ಟೆಕ್ ಮತ್ತು ಫೈನಾನ್ಷಿಯಲ್ ಸರ್ವಿಸಸ್ ಕಂಪನಿಗಳ ಸುಮಾರು 285 ಬಿಲಿಯನ್ ಡಾಲರ್‌ (ಸುಮಾರು 23.8 ಲಕ್ಷ ಕೋಟಿ ಭಾರತೀಯ ರೂಪಾಯಿ) ಮೌಲ್ಯ ಮಂಗಮಾಯವಾಗಿದೆ.

ಮಾರುಕಟ್ಟೆಯ ಮೇಲೆ ತೀವ್ರ ಪರಿಣಾಮ

ಥಾಮ್ಸನ್ ರಾಯಿಟರ್ಸ್ ಶೇ.15 ಕ್ಕಿಂತ ಹೆಚ್ಚು ಕುಸಿದರೆ, ಲೆಕ್ಸಿಸ್‌ನೆಕ್ಸಿಸ್‌ನ ಮಾಲೀಕತ್ವ ಹೊಂದಿರುವ ಆರ್‌ಇಎಲ್‌ಎಕ್ಸ್ ಶೇ.14 ರಷ್ಟು ಕುಸಿಯಿತು. ಲೀಗಲ್ ಟೆಕ್ ಕಂಪನಿ ಲೀಗಲ್‌ಜೂಮ್ ಬರೋಬ್ಬರಿ ಶೇ.20 ರಷ್ಟು ಪತನಗೊಂಡಿತು. ಅಮೆರಿಕದ ನ್ಯಾಸ್ಡಾಕ್ ಶೇ.1.4 ರಷ್ಟು ಕುಸಿಯಿತು. ಇದರ ನೇರ ಪರಿಣಾಮ ಭಾರತದ ಮೇಲೂ ಆಗಿದ್ದು, ಇನ್ಫೋಸಿಸ್‌ನ ಎಡಿಆರ್‌ಗಳು (ADR) ಶೇ.5.5 ರಷ್ಟು ಮತ್ತು ವಿಪ್ರೋ ಸುಮಾರು ಶೇ.5 ರಷ್ಟು ಕುಸಿದವು. ಇದೆಲ್ಲದಕ್ಕೂ ಮೂಲ ಕಾರಣ ಆಂಥ್ರೋಪಿಕ್ ಬಿಡುಗಡೆ ಮಾಡಿದ ಆ 11 ಪ್ಲಗಿನ್‌ಗಳು. ಅಕ್ಷರಶಃ ಟೆಕ್ ಸ್ಟಾಕ್‌ಗಳನ್ನು ಆಂಥ್ರೋಪಿಕ್ ಒಂದೇ ಏಟಿಗೆ ಹೊಡೆದುರುಳಿಸಿದೆ.

ಆಂಥ್ರೋಪಿಕ್ ಬಿಟ್ಟ ಆ ಅಸ್ತ್ರವೇನು?

ಆಂಥ್ರೋಪಿಕ್ ನಿಖರವಾಗಿ ಏನನ್ನು ಬಿಡುಗಡೆ ಮಾಡಿದೆ ಎಂಬುದನ್ನು ಗಮನಿಸಿದರೆ, ಜನವರಿ ತಿಂಗಳ ಆರಂಭದಲ್ಲಿ ಆಂಥ್ರೋಪಿಕ್ 'ಕ್ಲಾಡ್ ಕೋವರ್ಕ್' ಎಂಬ ಏಜೆಂಟಿಕ್ ಎಐ ಅಸಿಸ್ಟಂಟ್ ಅನ್ನು ಪರಿಚಯಿಸಿತ್ತು. ಇದು ಕೇವಲ ಮಾತನಾಡುವ ಚಾಟ್‌ಬಾಟ್ ಅಲ್ಲ. ಇದು ಫೈಲ್‌ಗಳನ್ನು ಓದಬಲ್ಲದು, ಫೋಲ್ಡರ್‌ಗಳನ್ನು ಸಂಘಟಿಸಬಲ್ಲದು, ಡಾಕ್ಯುಮೆಂಟ್‌ಗಳನ್ನು ಸಿದ್ಧಪಡಿಸಬಲ್ಲದು ಮತ್ತು ಬಳಕೆದಾರರ ಅನುಮತಿಯೊಂದಿಗೆ ಬಹು-ಹಂತದ ಕಾರ್ಯಗಳನ್ನು ತಾನೇ ನಿರ್ವಹಿಸಬಲ್ಲದು. ಶುಕ್ರವಾರ, ಜನವರಿ 30 ರಂದು ಆಂಥ್ರೋಪಿಕ್ ಈ ಟೂಲ್‌ಗೆ ಶಕ್ತಿ ತುಂಬುವ 11 ಓಪನ್ ಸೋರ್ಸ್ ಪ್ಲಗಿನ್‌ಗಳನ್ನು ಬಿಡುಗಡೆ ಮಾಡಿತು. ಇವು ಉತ್ಪಾದಕತೆ (productivity), ಮಾರಾಟ (sales), ಮಾರ್ಕೆಟಿಂಗ್, ಹಣಕಾಸು, ಡೇಟಾ ವಿಶ್ಲೇಷಣೆ ಮತ್ತು ಗ್ರಾಹಕ ಬೆಂಬಲದಂತಹ ಕೆಲಸಗಳನ್ನು ಸ್ವಯಂಚಾಲಿತಗೊಳಿಸುತ್ತವೆ.

'ಲೀಗಲ್ ಪ್ಲಗಿನ್' ಸೃಷ್ಟಿಸಿದ ಸಂಚಲನ

ಮಾರುಕಟ್ಟೆಯನ್ನು ಬೆಚ್ಚಿಬೀಳಿಸಿದ್ದು 'ಲೀಗಲ್ ಪ್ಲಗಿನ್' ಎಂಬ ಟೂಲ್‌. ಇದು ಕಾಂಟ್ರಾಕ್ಟ್‌ಗಳ ಪರಿಶೀಲನೆ, ಎನ್‌ಡಿಎ ಪರಿಶೀಲನೆ ಮತ್ತು ಕಾನೂನು ಬ್ರೀಫಿಂಗ್‌ಗಳನ್ನು ಕ್ಷಣಾರ್ಧದಲ್ಲಿ ಮಾಡಬಲ್ಲದು. ಇದು ದೊಡ್ಡ ಸಂಚಲನ ಸೃಷ್ಟಿಸಿತ್ತು. ಇದರ ಔಟ್‌ಪುಟ್‌ಗಳನ್ನು ವಕೀಲರೇ ಪರಿಶೀಲಿಸಬೇಕು ಎಂದು ಆಂಥ್ರೋಪಿಕ್ ಹೇಳಿದ್ದರೂ, ಹೂಡಿಕೆದಾರರ ಭಯ ಮಾತ್ರ ಕಡಿಮೆಯಾಗಿಲ್ಲ.

ಭಾರತೀಯ ಐಟಿ ಕಂಪನಿಗಳಿಗೆ ಏಕೆ ನಡುಕ?

ಅಮೆರಿಕದಲ್ಲಿನ ಈ ಬೆಳವಣಿಗೆ ಭಾರತದ ಮೇಲೆ ಏಕೆ ಪರಿಣಾಮ ಬೀರಿದೆ ಎಂಬುದನ್ನು ಗಮನಿಸಿದರೆ, ಭಾರತೀಯ ಐಟಿ ಕಂಪನಿಗಳು ಕುಸಿಯಲು ಪ್ರಬಲ ಕಾರಣವಿದೆ. ಆಂಥ್ರೋಪಿಕ್‌ನ ಈ ಟೂಲ್‌ಗಳು ಬಹುರಾಷ್ಟ್ರೀಯ ಕಂಪನಿಗಳು ಸಾಮಾನ್ಯವಾಗಿ ಭಾರತೀಯ ಐಟಿ ಸೇವಾ ಪೂರೈಕೆದಾರರಿಗೆ ಹೊರಗುತ್ತಿಗೆ ನೀಡುವ ಕೆಲಸಗಳನ್ನೇ ಗುರಿಯಾಗಿಸಿಕೊಂಡಿವೆ. ಡಾಕ್ಯುಮೆಂಟ್ ಪ್ರೊಸೆಸಿಂಗ್, ಕಂಪ್ಲೈಯನ್ಸ್ ಚೆಕ್‌ಗಳು, ಆಪರೇಷನಲ್ ಅನಾಲಿಸಿಸ್ ಮತ್ತು ಇತರ ಬ್ಯಾಕ್ ಆಫೀಸ್ ಕಾರ್ಯಗಳನ್ನು ಈ ಎಐ ಏಜೆಂಟ್‌ಗಳು ಈಗ ಅಗ್ಗದ ದರದಲ್ಲಿ ಮತ್ತು ವೇಗವಾಗಿ ಮಾಡಬಲ್ಲವು ಎಂಬುದು ಸ್ಪಷ್ಟವಾಗಿದೆ. ಇಷ್ಟು ದಿನ ಟಿಸಿಎಸ್, ವಿಪ್ರೋ, ಇನ್ಫೋಸಿಸ್‌ನಂತಹ ಕಂಪನಿಗಳಿಗೆ ಇಂತಹ ಕೆಲಸಗಳಿಂದಲೇ ದೊಡ್ಡ ಆದಾಯ ಬರುತ್ತಿತ್ತು. ಆದರೆ, ಆಂಥ್ರೋಪಿಕ್‌ನ ಘೋಷಣೆ ಹೊರಬಿದ್ದ ತಕ್ಷಣ, ಅಮೆರಿಕದ ಹೂಡಿಕೆದಾರರು ಸಾಂಪ್ರದಾಯಿಕ ಐಟಿ ಸೇವೆಗಳ ಮೇಲಿನ ಹೂಡಿಕೆಯನ್ನು ಕಡಿತಗೊಳಿಸಲು ಪ್ರಾರಂಭಿಸಿದರು. ಇನ್ನು ಮುಂದೆ ಈ ಕೆಲಸಗಳಿಗೆ ಮನುಷ್ಯರು ಬೇಕಿಲ್ಲ, ಎಐ ಸಾಕು ಎಂಬ ಸಂದೇಶ ರವಾನೆಯಾಗಿತ್ತು. ಈ ಭಯ ತಕ್ಷಣದ ವಾಸ್ತವವಲ್ಲದಿದ್ದರೂ, ಷೇರು ಮಾರುಕಟ್ಟೆ ಯಾವಾಗಲೂ ಭವಿಷ್ಯದ ಭಯದ ಮೇಲೆಯೇ ನಡೆಯುತ್ತದೆ. ಹೀಗಾಗಿಯೇ, ಭಾರತೀಯ ಮಾರುಕಟ್ಟೆಗಳು ತೆರೆಯುವ ಹೊತ್ತಿಗೆ ಮಾರಾಟದ ಒತ್ತಡ ಜಾಸ್ತಿಯಾಗಿತ್ತು.

ಈಗಾಗಲೇ ಸಂಕಷ್ಟದಲ್ಲಿದ್ದ ಐಟಿಗೆ ದೊಡ್ಡ ಪೆಟ್ಟು!

ಭಾರತೀಯ ಐಟಿ ಷೇರುಗಳು ಈಗಾಗಲೇ ದುಬಾರಿ ಮೌಲ್ಯದಲ್ಲಿ ವಹಿವಾಟು ನಡೆಸುತ್ತಿದ್ದವು. ಡೀಲ್‌ಗಳ ಏರಿಕೆ ನಿಧಾನವಾಗಿತ್ತು, ಜಾಗತಿಕ ಗ್ರಾಹಕರು ಎಚ್ಚರಿಕೆಯ ಹೆಜ್ಜೆ ಇಡುತ್ತಿದ್ದರು ಮತ್ತು ಅಮೆರಿಕ ಹಾಗೂ ಯುರೋಪ್‌ನಲ್ಲಿ ತಂತ್ರಜ್ಞಾನದ ಮೇಲಿನ ವೆಚ್ಚ ಇನ್ನೂ ದುರ್ಬಲವಾಗಿತ್ತು. ಇಷ್ಟೆಲ್ಲಾ ಆತಂಕ ವ್ಯವಸ್ಥೆಯಲ್ಲಿ ಮೊದಲೇ ಇದ್ದಾಗ, ಒಂದು ಸಣ್ಣ ನೆಗೆಟಿವ್ ಸುದ್ದಿಯೂ ದೊಡ್ಡ ಕುಸಿತಕ್ಕೆ ಕಾರಣವಾಗಬಲ್ಲದು. ಆದರೆ, ಬಂದಿದ್ದು ಸಣ್ಣ ಸುದ್ದಿಯಲ್ಲ, ನಡೆದಿದ್ದು ಜಾಗತಿಕ ಆಘಾತ. ಜೆಫರೀಸ್ ಈ ಮಾರಾಟದ ಭರಾಟೆಯನ್ನು "ಗೆಟ್-ಮೀ-ಔಟ್" (Get-Me-Out) ಶೈಲಿಯ ಟ್ರೇಡಿಂಗ್ ಎಂದು ಕರೆದಿದೆ. ಅಂದರೆ, ಹೂಡಿಕೆದಾರರು ಏನೇ ಆಗಲಿ, ಮೊದಲು ತಮ್ಮ ಷೇರು ಮಾರಿ ಹೊರಬರಲು ಯೋಚಿಸುತ್ತಿದ್ದಾರೆ. ಸಾಫ್ಟ್‌ವೇರ್ ಕಂಪನಿಗಳಿಗೆ ಎಐ ಸಹಾಯ ಮಾಡುತ್ತದೆ ಎಂಬುದು ಹಳೆಯ ಕಥೆಯಾಯಿತು, ಈಗ ಎಐ ಸಾಫ್ಟ್‌ವೇರ್ ಕಂಪನಿಗಳನ್ನೇ ಬದಲಾಯಿಸುತ್ತದೆ ಎಂಬ ಹೊಸ ನೆರೇಟಿವ್ ಸೃಷ್ಟಿಯಾಗಿದೆ.

ಆಂಥ್ರೋಪಿಕ್‌ನ ಮಾಸ್ಟರ್ ಪ್ಲಾನ್ ಏನು?

ಇಲ್ಲಿ ಗಮನಿಸಬೇಕಾದ ರೋಚಕ ಅಂಶ ಏನೆಂದರೆ, ಆಂಥ್ರೋಪಿಕ್ ಬಿಡುಗಡೆ ಮಾಡಿದ ಲೀಗಲ್ ಪ್ಲಗಿನ್ ಯಾವುದೇ ವಿಶೇಷವಾದ ಕೇಸ್ ಲಾ ಇಂಜಿನ್ ಅಲ್ಲ. ಇದರಲ್ಲಿ ಯಾವುದೇ ಸ್ವಂತ ಮಾದರಿ (proprietary model) ಇಲ್ಲ. ವಿಶ್ಲೇಷಕರು ಹೇಳುವಂತೆ, ಇದು ಕೇವಲ ಪ್ರಾಂಪ್ಟ್‌ಗಳು ಮತ್ತು ಕಾನ್ಫಿಗರೇಶನ್‌ಗಳ ಸೆಟ್ ಅಷ್ಟೇ. ಅಂದರೆ, ಕ್ಲಾಡ್‌ಗೆ ಕೆಲಸ ಮಾಡುವುದು ಹೇಗೆ ಎಂದು ಹೇಳಿಕೊಡುವ ಒಂದು ವ್ಯವಸ್ಥಿತ ವಿಧಾನ. ಆದರೆ, ಇದೇ ಅತಿ ದೊಡ್ಡ ಅಪಾಯ ಎನ್ನಲಾಗುತ್ತಿದೆ. ಥಾಮ್ಸನ್ ರಾಯಿಟರ್ಸ್‌ನಂತಹ ಕಂಪನಿಗಳು ಇಷ್ಟು ದಿನ ಕ್ಲಾಡ್ ಅಥವಾ ಓಪನ್ ಎಐ ಮೇಲೆ ತಮ್ಮ ಟೂಲ್‌ಗಳನ್ನು ಕಟ್ಟುತ್ತಿದ್ದವು. ಆದರೆ, ಈಗ ಆಂಥ್ರೋಪಿಕ್ ನೇರವಾಗಿ ರೆಡಿಮೇಡ್ ಪರಿಹಾರಗಳನ್ನು ಕೊಡಲು ಶುರುಮಾಡಿದೆ. ಅಂದರೆ, ಪ್ಲಾಟ್‌ಫಾರ್ಮ್ ಒದಗಿಸುವವರೇ ಈಗ ಸ್ಪರ್ಧಿಗಳಾಗಿದ್ದಾರೆ. ಹಾರ್ವೆ ಎಐ ಮತ್ತು ಲೆಗೋರಾದಂತಹ ಸ್ಟಾರ್ಟ್‌ಅಪ್‌ಗಳು ಆಂಥ್ರೋಪಿಕ್‌ನ ಮಾಡೆಲ್ ಮೇಲೆ ಅವಲಂಬಿತವಾಗಿವೆ. ಈಗ ಆಂಥ್ರೋಪಿಕ್ ತಾನೇ ಆಟಕ್ಕೆ ಇಳಿದಿರುವುದರಿಂದ, ಸಾಂಪ್ರದಾಯಿಕ ಕಂಪನಿಗಳು ಮತ್ತು ಹೊಸ ಸ್ಟಾರ್ಟ್‌ಅಪ್‌ಗಳು ಎರಡಕ್ಕೂ ಕಂಟಕ ಎದುರಾಗಿದೆ. ಕೇವಲ ಮೂರು ವಾರಗಳಲ್ಲಿ ಪ್ಲಗಿನ್ ಬಿಡುಗಡೆ ಮಾಡಿ, ಎಂಟರ್‌ಪ್ರೈಸ್ ಸಾಫ್ಟ್‌ವೇರ್ ಕಂಪನಿಗಳು ತಿಂಗಳುಗಟ್ಟಲೆ ಮಾಡುವ ಕೆಲಸವನ್ನು ಆಂಥ್ರೋಪಿಕ್ ಕೆಲವೇ ದಿನಗಳಲ್ಲಿ ಮಾಡಿ ಮುಗಿಸಿದೆ.

ಅನಿಶ್ಚಿತತೆಯ ಕಾರ್ಮೋಡ ಮುಂದುವರಿಕೆ

ಭಾರತೀಯ ಐಟಿ ಮಾದರಿ ಸಂಪೂರ್ಣವಾಗಿ ಬಳಕೆಯಲ್ಲಿಲ್ಲ ಎಂಬುದು ಈ ಪ್ಯಾನಿಕ್‌ನ ಅರ್ಥವಲ್ಲ. ಆದರೆ, ಹೂಡಿಕೆದಾರರು ಈಗ ಸ್ಪಷ್ಟತೆಯನ್ನು ಬಯಸುತ್ತಿದ್ದಾರೆ. ಈ ಹೊಸ ಎಐ ಯುಗಕ್ಕೆ ಭಾರತೀಯ ಸಂಸ್ಥೆಗಳು ಎಷ್ಟು ವೇಗವಾಗಿ ಹೊಂದಿಕೊಳ್ಳಬಲ್ಲವು ಎಂಬುದನ್ನು ಮಾರುಕಟ್ಟೆ ಕಾಯುತ್ತಿದೆ. ಕಂಪನಿಗಳು ಕ್ಲೌಡ್, ಆಟೊಮೇಷನ್ ಮತ್ತು ಎಐ ನೇತೃತ್ವದ ಸೇವೆಗಳಲ್ಲಿ ಹೂಡಿಕೆ ಮಾಡುತ್ತಿದ್ದರೂ, ಭವಿಷ್ಯದ ಆದಾಯವನ್ನು ರಕ್ಷಿಸಲು ಈ ಬದಲಾವಣೆಗಳು ಸಾಕಷ್ಟು ವೇಗವಾಗಿ ನಡೆಯುತ್ತಿವೆಯೇ ಎಂಬ ಪ್ರಶ್ನೆ ಎದ್ದಿದೆ. ವಿಪರ್ಯಾಸವೆಂದರೆ, ಈ ವಲಯವು ಭಾರತದ ಅತ್ಯಂತ ಜಾಗತಿಕವಾಗಿ ಸ್ಪರ್ಧಾತ್ಮಕ ಕೈಗಾರಿಕೆಗಳಲ್ಲಿ ಒಂದಾಗಿದೆ. ಆದರೆ, ಮುಂದಿನ ದಿನಗಳಲ್ಲಿ ಚಂಚಲತೆ ಇರಲಿದೆ. ಜಾಗತಿಕ ಆಟಗಾರರಿಂದ ಬರುವ ಪ್ರತಿಯೊಂದು ಹೊಸ ಎಐ ಪ್ರಕಟಣೆಯು ಮಾರುಕಟ್ಟೆಯ ನರನಾಡಿಗಳನ್ನು ಪರೀಕ್ಷಿಸುತ್ತದೆ. ಇಂದಿನ ಕುಸಿತವು ತಂತ್ರಜ್ಞಾನದ ಬಗೆಗಿನ ಭಾವನೆ ಎಷ್ಟು ದುರ್ಬಲವಾಗಿದೆ ಎಂಬುದನ್ನು ತೋರಿಸಿದೆ.

ಒಟ್ಟಿನಲ್ಲಿ, ಆಂಥ್ರೋಪಿಕ್‌ನ ಈ ನಡೆ ಷೇರು ಮಾರುಕಟ್ಟೆಯಲ್ಲಿ ಹೊಸ ಅಧ್ಯಾಯವನ್ನು ಬರೆದಿದೆ. ಎಐ ಇನ್ನು ಮುಂದೆ ಕೇವಲ ದೂರದ ಮಾತಲ್ಲ, ಅದು ಷೇರು ಬೆಲೆಗಳು, ಹೂಡಿಕೆದಾರರ ನಿರ್ಧಾರಗಳು ಮತ್ತು ದೀರ್ಘಾವಧಿಯ ವಲಯದ ನಿರೀಕ್ಷೆಗಳ ಮೇಲೆ ನೈಜ ಸಮಯದಲ್ಲಿ ಪ್ರಭಾವ ಬೀರುತ್ತಿದೆ. ಡಾಕ್ಯುಸೈನ್, ಸೇಲ್ಸ್‌ಫೋರ್ಸ್, ಅಡೋಬ್‌ನಂತಹ ಕಂಪನಿಗಳೂ ಈ ಸುಳಿಗೆ ಸಿಲುಕಿವೆ. ಭಾರತೀಯ ಐಟಿ ಕಂಪನಿಗಳು ಈಗ ಎಐ ಒಂದು ಅಪಾಯವಲ್ಲ, ಬದಲಾಗಿ ತಮ್ಮ ಜಾಗತಿಕ ಸ್ಥಾನವನ್ನು ಬಲಪಡಿಸುವ ಅವಕಾಶ ಎಂದು ಸಾಬೀತುಪಡಿಸಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿರುವುದು ನಿಜ. ಇಲ್ಲದಿದ್ದರೆ, ಷೇರು ಮಾರುಕಟ್ಟೆಯಲ್ಲಿ ಇಂತಹ ರಕ್ತಸಿಕ್ತ ಅಧ್ಯಾಯಗಳು ಪುನರಾವರ್ತಿತವಾಗುತ್ತಲೇ ಇರುತ್ತವೆ.