WATCH: ನಮ್ಮ ದಾಂಪತ್ಯ ಕೊನೆಗೊಳ್ಳಲು ಇದೇ ಕಾರಣ : ಬಿಲ್ ಗೇಟ್ಸ್ - ಎಪ್ಸ್ಟೀನ್ ಕರಾಳ ನಂಟು ಬಿಚ್ಚಿಟ್ಟ ಮೆಲಿಂಡಾ ಫ್ರೆಂಚ್ ಗೇಟ್ಸ್ !
ವಾಷಿಂಗ್ಟನ್: ಮೈಕ್ರೋಸಾಫ್ಟ್ ಸಂಸ್ಥಾಪಕ ಬಿಲ್ ಗೇಟ್ಸ್ ಮತ್ತು ಕುಖ್ಯಾತ ಅಪರಾಧಿ ಜೆಫ್ರಿ ಎಪ್ಸ್ಟೀನ್ ನಡುವಿನ ಸಂಬಂಧದ ಬಗ್ಗೆ ಹೊಸ ಸ್ಫೋಟಕ ಮಾಹಿತಿ ಹೊರಬಿದ್ದ ಬೆನ್ನಲ್ಲೇ, ಅವರ ಮಾಜಿ ಪತ್ನಿ ಮೆಲಿಂಡಾ ಫ್ರೆಂಚ್ ಗೇಟ್ಸ್ ತಮ್ಮ ಮೌನ ಮುರಿದಿದ್ದಾರೆ. ಅಮೆರಿಕದ ಎನ್ಪಿಆರ್ (NPR) ವಾಹಿನಿಯ 'ವೈಲ್ಡ್ ಕಾರ್ಡ್' ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಈ ಬೆಳವಣಿಗೆಗಳು ತಮಗೆ "ನಂಬಲಾಗದಷ್ಟು ವಿಷಾದ ಮತ್ತು ನೋವು" ತಂದಿವೆ ಎಂದು ಭಾವುಕರಾಗಿದ್ದಾರೆ.
ಇತ್ತೀಚೆಗೆ ಅಮೆರಿಕದ ನ್ಯಾಯಾಂಗ ಇಲಾಖೆ (DOJ) ಬಿಡುಗಡೆ ಮಾಡಿದ ಎಪ್ಸ್ಟೀನ್ ಪ್ರಕರಣದ ಬೃಹತ್ ದಾಖಲೆಗಳಲ್ಲಿ ಬಿಲ್ ಗೇಟ್ಸ್ ಹೆಸರು ಪ್ರಮುಖವಾಗಿ ಕೇಳಿಬಂದಿದೆ. 2013ರ ಇಮೇಲ್ ಒಂದರ ಪ್ರಕಾರ:
ಬಿಲ್ ಗೇಟ್ಸ್ ಅವರಿಗೆ ರಷ್ಯಾದ ಯುವತಿಯರಿಂದ ಲೈಂಗಿಕ ಸೋಂಕು (STI) ತಗುಲಿತ್ತು ಎಂದು ಎಪ್ಸ್ಟೀನ್ ಆರೋಪಿಸಿದ್ದಾನೆ. ಮೆಲಿಂಡಾ ಅವರಿಗೆ ತಿಳಿಯದಂತೆ ಅವರಿಗೆ ರಹಸ್ಯವಾಗಿ ಔಷಧ ನೀಡಲು ಬಿಲ್ ಗೇಟ್ಸ್ ಪ್ಲಾನ್ ಮಾಡಿದ್ದರು ಎಂಬ ಆಘಾತಕಾರಿ ಅಂಶವೂ ಈ ದಾಖಲೆಗಳಲ್ಲಿದೆ ಎನ್ನಲಾಗಿದೆ.
ತಮ್ಮ 27 ವರ್ಷಗಳ ದಾಂಪತ್ಯ 2021ರಲ್ಲಿ ಅಂತ್ಯವಾಗಲು ಬಿಲ್ ಗೇಟ್ಸ್ ಮತ್ತು ಎಪ್ಸ್ಟೀನ್ ನಂಟು ಕೂಡ ಒಂದು ಪ್ರಮುಖ ಕಾರಣವಾಗಿತ್ತು ಎಂದು ಮೆಲಿಂಡಾ ಈ ಹಿಂದೆಯೇ ಸುಳಿವು ನೀಡಿದ್ದರು. ಇಂದಿನ ಸಂದರ್ಶನದಲ್ಲಿ, "ಎಪ್ಸ್ಟೀನ್ ಜಾಲದಲ್ಲಿ ಸಿಲುಕಿದ ಆ ಯುವತಿಯರ ಪರಿಸ್ಥಿತಿ ನೆನೆದರೆ ಎದೆ ಒಡೆಯುತ್ತದೆ. ನನ್ನ ಮದುವೆಯ ಅತ್ಯಂತ ನೋವಿನ ದಿನಗಳು ಮತ್ತೆ ನೆನಪಾಗುತ್ತಿವೆ," ಎಂದು ಅವರು ಹೇಳಿದ್ದಾರೆ. ಅಲ್ಲದೆ, ಬಿಲ್ ಗೇಟ್ಸ್ ಮೇಲಿನ ಪ್ರಶ್ನೆಗಳಿಗೆ ಅವರೇ ಉತ್ತರಿಸಬೇಕು ಎಂದು ಸ್ಪಷ್ಟಪಡಿಸಿದ್ದಾರೆ.
ಈ ಎಲ್ಲ ಆರೋಪಗಳನ್ನು ಬಿಲ್ ಗೇಟ್ಸ್ ಪರ ವಕ್ತಾರರು ತಳ್ಳಿಹಾಕಿದ್ದಾರೆ. "ಇವೆಲ್ಲವೂ ಸಂಪೂರ್ಣ ಸುಳ್ಳು ಮತ್ತು ಅಸಂಬದ್ಧ. ಎಪ್ಸ್ಟೀನ್ ತನ್ನ ಹತಾಶೆಯಿಂದ ಬಿಲ್ ಗೇಟ್ಸ್ ಅವರ ಗೌರವಕ್ಕೆ ಧಕ್ಕೆ ತರಲು ಇಂತಹ ಕಥೆಗಳನ್ನು ಸೃಷ್ಟಿಸಿದ್ದಾನೆ," ಎಂದು ಅವರು ಪ್ರತಿಕ್ರಿಯಿಸಿದ್ದಾರೆ.
ಸಮಾಜಸೇವೆಯಲ್ಲಿ ತೊಡಗಿರುವ ಬಿಲ್ ಗೇಟ್ಸ್ ಅವರ ಇಂತಹ ವೈಯಕ್ತಿಕ ವಿಚಾರಗಳು ಹೊರಬಂದಿರುವುದು ಸಾರ್ವಜನಿಕರಲ್ಲಿ ಭಾರಿ ಚರ್ಚೆಗೆ ನಾಂದಿ ಹಾಡಿದೆ.
PublicNext
04/02/2026 08:33 pm
ಸಂಬಂಧಿತ ಸುದ್ದಿ
LOADING...
