ಲೈಟರ್ ಗನ್ ಅನ್ನು ರಿಯಲ್ ಗನ್ ಅಂತ ತೋರಿಸಿ ಟೆಕ್ಕಿ ಮನೆಗೆ ರಾಬರಿ ಮಾಡಿದ್ದ ಗ್ಯಾಂಗ್ ಬಂಧನ

ಅಪ್ಲಿಕೇಶನ್‌ನಲ್ಲಿ ಉಚಿತವಾಗಿ ಪೂರ್ಣ ವೀಡಿಯೊವನ್ನು ವೀಕ್ಷಿಸಿ

ಲೈಟರ್ ಗನ್ ಅನ್ನು ರಿಯಲ್ ಗನ್ ಅಂತ ತೋರಿಸಿ ಟೆಕ್ಕಿ ಮನೆಗೆ ರಾಬರಿ ಮಾಡಿದ್ದ ಗ್ಯಾಂಗ್ ಬಂಧನ

ಬೆಂಗಳೂರು: ನಗರದ ಜೆ.ಜೆ. ನಗರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದ್ದ ರೋಚಕ ದರೋಡೆ ಪ್ರಕರಣವೊಂದನ್ನು ಭೇದಿಸಿರುವ ಪೊಲೀಸರು, ಇಬ್ಬರು ಖತರ್ನಾಕ್ ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಬಂಧಿತರನ್ನು ಅಶ್ರಫ್ ಹಾಗೂ ಅಫ್ಜಲ್ ಅಲಿಯಾಸ್ 'ಡಿಚ್ಚಿ' ಎಂದು ಗುರುತಿಸಲಾಗಿದೆ.

ಘಟನೆಯ ವಿವರ:

ಜುಲೈ 6ರಂದು ಟೆಕ್ಕಿಯೊಬ್ಬರ ಮನೆಗೆ ಅಕ್ರಮವಾಗಿ ನುಗ್ಗಿದ್ದ ಈ ಆರೋಪಿಗಳು, ಗನ್ ತೋರಿಸಿ ಬೆದರಿಸಿ ಮನೆಯಲ್ಲಿದ್ದ ಮಹಿಳೆಯ ಮೇಲೆ ಹಲ್ಲೆ ನಡೆಸಿ ಸುಮಾರು 25 ಲಕ್ಷ ಮೌಲ್ಯದ ಚಿನ್ನಾಭರಣ ಹಾಗೂ ನಗದನ್ನು ದೋಚಿ ಪರಾರಿಯಾಗಿದ್ದರು. ಈ ಸಂಬಂಧ ಜೆ.ಜೆ. ನಗರ ಠಾಣೆಯಲ್ಲಿ ದೂರು ದಾಖಲಾಗಿತ್ತು.

ಪ್ರಕರಣದ ಬೆನ್ನತ್ತಿದ ಪೊಲೀಸರು ಆರೋಪಿಗಳನ್ನು ವಶಕ್ಕೆ ಪಡೆದು ತನಿಖೆ ನಡೆಸಿದಾಗ ಕೃತ್ಯಕ್ಕೆ ಬಳಸಿದ್ದ ಗನ್‌ನ ಅಸಲಿಯತ್ತು ಹೊರಬಿದ್ದಿದೆ. ತನಿಖೆಯ ಆರಂಭದಲ್ಲಿ ಆರೋಪಿಗಳು ಅದು 'ಏರ್ ಗನ್' ಎಂದು ಹೇಳಿ ದಾರಿ ತಪ್ಪಿಸಲು ಯತ್ನಿಸಿದ್ದರು. ಆದರೆ, ಪೊಲೀಸರು ಕೂಲಂಕುಷವಾಗಿ ಪರಿಶೀಲಿಸಿದಾಗ ಅದು ಕೇವಲ 'ಲೈಟರ್ ಮಾದರಿಯ ನಕಲಿ ಗನ್' ಎಂಬುದು ಬೆಳಕಿಗೆ ಬಂದಿದೆ. ನೋಡಲು, ತೂಕದಲ್ಲಿ ಮತ್ತು ಆಕಾರದಲ್ಲಿ ಸಂಪೂರ್ಣ ಅಸಲಿ ಗನ್‌ನಂತೆಯೇ ಇದ್ದಿದ್ದರಿಂದ ಸಂತ್ರಸ್ತರು ತೀವ್ರ ಭಯಬಿದ್ದಿದ್ದರು.

ಆರೋಪಿಗಳು ಈಗಾಗಲೇ ಕದ್ದಿದ್ದ ಕೆಲವು ಆಭರಣಗಳನ್ನು ಮಾರಾಟ ಮಾಡಿದ್ದು, ಪೊಲೀಸರು ಉಳಿದ ಚಿನ್ನಾಭರಣ ಹಾಗೂ ನಗದನ್ನು ಜಪ್ತಿ ಮಾಡಿದ್ದಾರೆ. ಬಂಧಿತ ಅಫ್ಜಲ್ ಈ ಹಿಂದೆಯೂ ಇಂತಹ ಕೃತ್ಯಗಳಲ್ಲಿ ಭಾಗಿಯಾಗಿದ್ದ ಹಳೆಯ ಅಪರಾಧಿಯಾಗಿದ್ದು, ಸದ್ಯ ಇಬ್ಬರೂ ಆರೋಪಿಗಳು ಜೈಲುಪಾಲಾಗಿದ್ದಾರೆ.

Edited By :